Read Tzotzil Salmos 112 Bible Online

Salmos 112 - Tzotzil bible

Salmos 112

¹Jun yutsil ta j'ech'el ma' ti Dios une. Xmuyubaj ma' ti buch'u sna' xi'ta ti Diose, ti ta xc'ot ta yo'nton ti smantaltaque.

²Snitilultac ti buch'u oy stuq'uil yo'ntone, ta staic c'uxubinel, ta staic ti tsots xu' yu'unic ta x'ech'ic ta banomile.

³Yepal no'ox ti sc'ulejalic ta snaic une, oy no'ox slequil yutsil yo'ntonic.

⁴Ti buch'u oy stuq'uil yo'ntone, saquilal osil s'elan xojobin ta ic'al osil, oy slequil, oy stuq'uil, oy sts'iquemal xcuchemal yu'un.

⁵Ti c'usi oy x'ayan yu'un ti vinique, sna' xt'olbij ta yaq'uel ta ch'om, tuc' sjol yo'nton ta x'abtej xchi'uc ti sbolomale;

⁶jech o xal un, mu'yuc c'usi ta xc'ot ta stojol. Ti buch'u oy stuq'uile mu xch'ayat ta o'ntonal.

⁷Mu toj xi'eluc yu'un ti c'usiuc chopol xpuquet sc'oplal ta xich' alele; mu stsic' yo'nton, spatoj yo'nton ta stojol ti Diose.

⁸Stsinanoj yo'nton, mu xi' un; xlabaj no'ox ta sq'uel ech'el ti scontrataque.

⁹Ta xac' yuni limoxna ta stojol ti me'un mu'nate, mu'yuc spajeb ti xc'uxul yo'ntone, jamal ti sba sat yelove.

¹⁰Ti jech ta x'ile yu'un ti buch'u mu'yuc xch'ulel xa'i sbae, xti'et xa ma' ti sjol une, xc'uxet xa ye ma' ti tsalbil cote. Ta xc'ot ta tsutsel sbic'tal yo'nton ma' ti buch'u mu'yuc xch'ulel xa'i sbae.