Read Tzotzil Salmos 118 Bible Online

Salmos 118 - Tzotzil bible

Salmos 118

¹Colaval, utic ti Diose, yu'un oy yutsil slequil yo'nton, yu'un sbatel osil oy syail xc'uxul yo'nton.

²Xi yalicuc ti israeletique: “Ti Diose, sbatel osil oy syail xc'uxul yo'nton.”

³Xi yalicuc ti paleetique: “Ti Diose, sbatel osil oy syail xc'uxul yo'nton.”

⁴Xi yalicuc ti buch'utic sna' snijan sbaic ta stojol ti Diose: “Ti Diose, sbatel osil oy syail xc'uxul yo'nton.”

⁵Ti mu x'ech' xjelav ti jvocole, lic'opoj ta stojol ma' ti Dios une; laj ya'ibun ti jc'ope, lic'ot ta pojel yu'un.

⁶Chi'inbilun yu'un ti Diose, mu xixi'. ¿Mi oy la buch'u oy c'usi xu' ta xispasbun un?

⁷Ta xiscoltaun, li' oy ta jtojol ma' ti Dios une. Ta xquil ta jba ta jsat un, tsalbil ta xc'otic ti buch'u xti'et sjolic ta jtojole.

⁸Xloc' venta ti ja'uc xich' patel o'ntonal ta stojol ti Diose, altic ti oy no'ox buch'u ta xich' patel o'ntonal ta stojole.

⁹Xloc' venta ti ja'uc xich' patel o'ntonal ta stojol ti Diose, altic ta xich' patel o'ntonal ta stojol ti buch'u cajal yabtel yich'ojique.

¹⁰Ta sventa smuc'ul stsatsal Dios, tsalbil c'otic cu'un ti muc'tiquil lumetic ti laj svol sbaic ta scontrainelicune.

¹¹Macbilun ta be yu'unic ta jujujot; ta sventa smuc'ul stsatsal ti Diose, tsalbil c'otic cu'un.

¹²Co'ol s'elan chanul ajapom laj svol sbaic talel ta jtojol, ja'uc ti sc'ac'al yo'ntonic une, tub jech c'u cha'al jculel no'ox ta xc'ac' ti ch'ixe; tsalbil c'otic cu'un ta sventa smuc'ul stsatsal ti Diose.

¹³Mu'yuc xa syail xc'uxulil laj stacoltaicun yo' ta xiyal ta lum yu'unic, ja'uc ti Dios une laj sva'an sba talel ta scoltaelun.

¹⁴Ta jq'uejinta ma' ti Dios une, laj yac'bun quip jtsatsal, ja' jcoltavanej cu'un.

¹⁵Naca sc'oplal pasbil xa canal ti xmuyubajic no'ox xchi'uquic ti xi ta sq'uejintaic ta jujun snaic ti buch'utic jun sjol yo'ntonique: “C'ot ta jtsalvanej smuc'ul stsatsal ti Diose.

¹⁶Jelavem ta j'ech'el smuc'ul stsatsal ma' ti Dios une. C'ot ta jtsalvanej smuc'ul stsatsal ti Dios une.”

¹⁷Tselbuj to ma' ti oy sc'oplal ta xichame; quil to ma' ti jch'iel jc'opojel ta yalel c'u s'elan laj spas ti Diose.

¹⁸Spajeb xa no'ox tsots jtsitsel laj yac'bun ti Diose, ja' no'ox un, mu sq'uelojuc ti lilaj o yu'une.

¹⁹Jamic sti'tac ti ch'ulnae; ta jc'an ta xi'och batel ta yalbel coliyal ti Diose.

²⁰Ti'na yu'un Dios ma' le' une, ochebal yu'unic ec un ti buch'utic mu yanuc sjol yo'ntonique.

²¹Colaval, xacutot un, Dios, yu'un laj atac'bun ti jc'ope, yu'un vo'ot jcoltavanejot cu'un.

²²Ti ton mu'yuc xtun yu'unic ti jpas-naetique, c'ot ta sliqueb xchiquin ti nae.

²³C'ot ta pasel yu'un Dios ti va'i s'elan taje, ch'ayal ta xc'ot o'ntonal yu'un.

²⁴Yabtel Dios ma' ti xi s'elan ta xc'ot ti sc'ac'alil taj une: xpatet xmuyubaj no'ox ti o'ntonal cu'untic une.

²⁵Avocoluc un, Cajval, pojuncutic. Cajval, avocoluc un, paso ta jtojolcutic ti lecuc batuc cu'uncutique.

²⁶¡Jun yutsil ta j'ech'el ti buch'u ta xtal ta sventa smuc'ul stsatsal ti Diose! Li' to ta xch'ulna ti Diose, ta jc'ancutic ti ataicuc ti slequilal yutsilale.

²⁷Ti Ajvalile, ja' ti Dios une, ti sac jaman no'ox ti jbetic yu'une. Licuc xa ti q'uine, ich'ic talel ti jepbil c'ob te' ti nichimticuc c'otuc bu oy xulubtac ti altare.

²⁸Colaval, xacutot, ta jlequil-c'opta ti amuc'ul atsatsale, vo'ot ti Diosot cu'un une.

²⁹Albeic coliyal ti Diose, yu'un oy slequil yutsil yo'nton, yu'un sbatel osil oy syail xc'uxul yo'nton.