Read Tzotzil Salmos 119 Bible Online

Salmos 119 - Tzotzil bible

Salmos 119

¹ Mu'yuc c'usi sna'ic ta j'ech'el ti buch'u tuc' ta stamic ech'ele, ti yac'oj yo'ntonic ta stojol ti chanubtasel yu'un ti Diose.

²Mu'yuc c'usi sna'ic ta j'ech'el ti buch'u ta spasbeic ti c'usi ta xal ti smantaltaque, ti sjunul yo'ntonic ta snaban sbaic ta stojole,

³ti ma'uc oy ta yo'ntonic ti c'usi ta soquesvane, ti stamojic ech'el bu ta x'iq'ue batel yu'un ti Diose.

⁴Avaloj ono'ox ti tsots sc'oplal c'otuc ta pasel ti c'usitic albil avu'un ta mantaletique.

⁵Toj lec ti c'otuc ta pasel cu'un ti nijil chimilun ti c'usi ta sc'an ti jbel c'usi tsots albil avu'une.

⁶Yu'un mi ta jch'un ta spasel scotol ti c'usi sc'an ti amantaltaque, mu xc'ot ta jtojol ti nijilun ta xicom ta q'uexlale.

⁷C'alal mi c'ot xa ta jol jbaquil ti c'usitic tsots albil avu'un ta amantaltaque, ta xloc' x'ayan ta co'nton ta jlequil-c'optaot unbi.

⁸Oy ta co'nton c'otuc ta pasel cu'un ti c'usitic jbel albil avu'une. Mu me xajip xatenun.

⁹¿C'usi ta xut sba jun querem vinic ti lec tuc' ta xbat ti xcuxlejal ta stuc no'oxe? Ja' no'ox mi ta stam ech'el ta spasel jech c'u cha'al ta xal ti ac'ope.

¹⁰Ta sjunul co'nton tal jnaban jba ta atojol, mu teyuc no'ox aq'uelojun ti bu xu' ta jch'ac jba ta stojol ti amantaltaque.

¹¹Ti yo' mu jta jmul jcolo' ta atojole, ta sventa no'ox ac'op ti bejel lec c'ot ta co'ntone.

¹²Atuc no'ox jun avutsil, Dios, chanubtasun ta yojtiquinel ti c'usitic jbel albil avu'une.

¹³Scotol ti c'usitic nopbil avu'un ti laj avale, oy ta que ta jti' ta xchapel.

¹⁴Ximuyubaj no'ox ta jtam ech'el ti bu ta x'ic'van ech'el ti amantaltaque, ja' yamal sc'oplal ta xcom scotol ti jc'ulejale.

¹⁵Ta jts'ijan jba ta snopel smelol ti c'usitic nopbil avu'une; ta xca'i lec ti bu ta xa'ic'van batel une.

¹⁶Ximuyubaj no'ox xchi'uc ti oy c'usitic jbel albil avu'une, mi ja'uc ta jch'ay ta co'nton ti ac'op une.

¹⁷Ti avajtunel li'e, oyuc ta avo'nton ti c'uxiuque. Ta jch'un ti ac'op une.

¹⁸Jamo jba jsat yo' ta jc'upin ta sq'uelel c'u yutsil ta xachanubtasvan.

¹⁹Manchuc mi j'ech'el beun no'ox li' ta banomile, mu xamacbun ta ya'yiel smelol ti amantaltaque.

²⁰Scotol c'ac'al oyun ta vocol ta xca'i ta yojtiquinel ti c'usitic nopbil avu'une.

²¹Ti vo'ote xu' avu'un ta spajesel ti buch'utic pimubemique, ti bisbil ta cotol chavale, ti sjipoj xa ta spat ta xoconic ti amantaltaque.

²²Q'uejun loq'uel ta stojol ti mu albaj ti c'usi ta xiyalbeicune, ti bajbilun yu'unique, ti vu'une laj jpas ti c'usitic ta xal ti amantaltaque.

²³Manchuc mi oy ta yo'ntonic ta spaybeicun jc'oplal ti viniquetic tsots yabtel yich'ojique, ti avajtunel li'e, ja' no'ox oy ta yo'nton ta snopel ti c'usi ta xal ti oy c'usi jbel tsots albil avu'une.

²⁴Ta sventa ti amantaltaque, ximuyubaj no'ox yu'un, c'otem ta jbijubtasvanej cu'un.

²⁵Ta xloc' xa jch'ulel ta xca'i, ac'bun to ti jcuxlejal jech c'u cha'al ta xal ti c'usi loq'uem ta ave ta xapase.

²⁶Laj cal ta aba ta asat ti c'u j'elane, laj ava'ibun ti jc'ope, chanubtasun ta sventa ti c'usitic oy jbel c'usi tsots albil avu'une.

²⁷Ac'bun jbijil ta stamel batel ti c'usitic ta xal ti nopbil avu'une, ta jc'an ti ja'uc batuc co'nton ta snopilanel smelol ti c'usitic jun yutsiquil pasbil avu'une.

²⁸Xtuch' co'nton yu'un yipal ti oq'uel avanel ta jpase, va'ano aba ta jtojol jech c'u cha'al avac'oj ave ta xapase.

²⁹Mu teyuc no'ox aq'ueloj ti jtamoj batel ta sjutilanel ti c'ope, va'ano aba ta jtojol ti c'u s'elan ta xachanubtasvane.

³⁰Loc' ta t'ujel cu'un ta stamel ech'el sbelel ti melele, juteb ta co'nton ta spasel ti c'usitic albil avu'une.

³¹Cajval, yac' co'nton ti c'usi sc'an ti amantaltaque, mu xavac' c'otuc ta jtojol ti nijil ta xicom ta q'uexlal une.

³²Yu'un cac'ojbe xa yipal ta spasel batel ti amantaltaque, yu'un mu no'ox albajuc laj avac'bun ti smuyubajel co'ntone.

³³Cajval, chanubtasun c'u s'elan ta tamel batel ti c'usi ta xal ti oy c'usitic jbel tsots albil avu'une, yu'un ta jc'an ti jech ta jtam o batel ti c'u sjalil cuxulune.

³⁴Ac'bun sbijil jol co'nton yo' mu xch'ay xca'i ti c'u s'elan ta xachanubtasvane, yu'un ta sjunul co'nton ta jc'an ta jch'un.

³⁵Ac'o jtam batel avu'un ti c'u s'elan ta sc'an ti amantaltaque, ja' ta jta yu'un ti mu'yuc c'usi jna'e.

³⁶C'otuc ta pasel avu'un ti lecuc ya'i amantaltac ti co'ntone, ma'uc me xjelav ti sujel yu'un ti sc'upijel co'ntone.

³⁷Mu teyuc aq'ueloj ta xbat co'nton ta stojol ti loc'tabil diosetique, vulubtasbun jch'ulel yo' ta jtam batel ti lequil be avu'une.

³⁸Va'ano aba atuc ta stojol ti avajtunel li'e yo' ta xc'ot ta pasel ti c'usitic avaloj ta xapas ta stojol ti buch'utic ta xayich' ta muq'ue.

³⁹Q'uejo batel ta jtojol ti utilanel ta xixi' yu'une, yu'un ti c'usitic nopbil avu'une, lec scotol.

⁴⁰Loc' ayan xa ta co'nton ta spasel ti c'usitic nopbil avu'une. Cuxicun to avu'un ta sventa ti alequilal avutsilale.

⁴¹Ac'bun quil, Cajval, ti syail xc'uxul avo'ntone, xchi'uc ti colel avu'un jech c'u cha'al avaloj ono'oxe.

⁴²Ja' to jech xu' ta jtac'be sutel ti buch'u ta xiyutilanune, yu'un c'otem ta yip co'nton ti ac'ope.

⁴³Mu aq'uelojuc no'ox ta xtub ta que ta jti' ti c'usi naca melele, yu'un jpatoj co'nton ta jta ta sventa ti c'usitic nopbil avu'une.

⁴⁴Ta jc'an ta jchan batel ta spasel ti chanubtasel avu'une, ti mu xquicta jba ta spasel ta sbatel osile.

⁴⁵Ja' to jech mu'yuc c'usi jna' ta xicuxi, yu'un jtamoj batel ta spasel ti c'usitic nopbil avu'une.

⁴⁶Ta jva'an jba ta yalel ti amantaltac ta stojol ti ajvaliletique, mi ja'uc juteb q'uexlal ta xca'i.

⁴⁷Mu comtsanbaj ta xca'i ti amantaltaque, yu'un laj jta ti ximuyubaj yu'une.

⁴⁸Juteb ta co'nton mu tenbaj ta xca'i ti amantaltaque, yu'un batem co'nton ta snopilanel ti c'usitic oy jbel tsots albil avu'une.

⁴⁹Vuleso ta avo'nton ti xi avaloj ta stojol ti avajtunel li'e: ta sventa taje, ja' yip co'nton avu'un ta smalael.

⁵⁰Taje, xi ma' ti spatobil co'nton c'alal oyun ta at-o'ntone: yu'un laj avac' jch'iel ta xca'i ta sventa ti c'usi avalojan ta xapase.

⁵¹Mu'yuc spajeb ye sti'ic ta yilbelun jvocol ti buch'u mu'yuc xch'ulel xa'i sbaique, ti jech taje, mi ja'uc laj jvalopatin comel ti chanubtasel avu'une.

⁵²Yu'un ta to xvul ta co'nton ti c'usitic nopbil avu'un ti laj ca'i ta ba'yele, ti laj jta yu'un ti spatobil co'ntone, Cajval.

⁵³Ti buch'utic chon xa'i sbaic ta banomile, svalopatinojic comel ti chanubtasel avu'une, mu albajuc ta xiyac'beicun ti sc'ac'al co'ntone.

⁵⁴Ti c'usitic jbel tsots albil avu'une, c'otem ta q'uejimoletic cu'un ti yo j'ech'el-beun no'ox ta banomile.

⁵⁵Cajval, c'ac'al ac'ubal ta jvulesot ta co'nton, oy ta co'nton ti c'otuc ta spasel cu'un ti c'usi ta sc'an ti chanubtasel avu'une.

⁵⁶Taje, xi s'elan ma' ti jbainoj ta spasel une: c'otuc ta ch'unel cu'un ti c'usitic nopbil avu'une.

⁵⁷Mu'yuc xa yan ti buch'u oy cu'une, c'ajomal no'ox vo'ot, Cajval, loc' ayan ta co'nton ti laj cac' que jti' ta spasel ti c'usitic ta xal ti ac'ope.

⁵⁸Ta sjunul co'nton laj cac'be yipal ta spasel yo' ta xata cu'un ti lec xava'ie, c'uxubajan cu'un ec un jech c'u cha'al avaloj no'ox ta xapase.

⁵⁹Ta co'nton jtuc lic jnijan jba lec ta snopel, lic jch'un ti amantaltaque.

⁶⁰Ta ora no'ox laj jsuj jba, mu'yuc xjalij cu'un ta yabtelanel ti amantaltaque.

⁶¹Comon volol cajval yu'unic ta xmich'elicun ti buch'u mu'yuc xch'ulel xa'i sbaique, ti jech taj une, mu'yuc laj jch'ay ta co'nton ti chanubtasel avu'une.

⁶²Ac'o mi ta syijil ac'ubal, ta jtij jch'ulel ta yac'belot ti colaval ta sventa ti c'usitic tuc' nopbil avu'une.

⁶³Lec xquil jba xchi'uc ti buch'utic sna' snijan sbaic ta atojole, ti buch'utic ta xc'ot ta pasel yu'unic ti c'usitic nopbil avu'une.

⁶⁴Cajval, nojem ta sbejel banomil ti syail xc'uxul avo'ntone, cojtiquinuc avu'un ti c'usitic jbel tsots albile.

⁶⁵Cajval, lec laj apas ta stojol ti avajtunel li'e, ja' c'ot ta pasel jech c'u cha'al loq'uem ta avee.

⁶⁶Chanubtasun lec yo' jech ta jta ti oy stuq'uil jol co'ntone, ti oyuc lec snopobil cu'une, yu'un jpatoj co'nton ta stojol ti amantaltaque.

⁶⁷C'alal mu'yuc to ox ta jbic'tajes jbae, ep ti bu mu lecuc bat cu'une, tana un, ta jch'un ti ac'ope.

⁶⁸Yan ti vo'ote oy stuq'uil yutsil avo'nton, lec ti c'usi ta xapase, chanubtasun ta sventa ti oy c'usitic jbel tsots albil avu'une.

⁶⁹Ti buch'utic ch'abal xch'ulelic ta banomile, ta jeche' no'ox ta xisa'beicun ti jmule; yan ti vu'une, ta sjunul co'nton ta xc'ot ta pasel cu'un ti c'usitic nopbil avu'une.

⁷⁰Yu'un ti stuquique yanijem ti snopobil yu'unique; yan ti vu'une ximuyubaj no'ox xchi'uc ti chanubtasel avu'une.

⁷¹Toj lec c'ot ta jtojol yu'un ti jech lic jbic'tajes jbae, ja' lic jchan ti c'usitic ta sc'an ti oy c'usitic jbel albil avu'une.

⁷²Ta xca'i ti vu'une, xloc' venta ta j'ech'el ti c'usitic ta xloc' ta ave ti ta xachanubtasvane, ac'o mi busul no'ox ta j'ech'el ti sepequil oroe, ti platae, ja' mu sta yutsil.

⁷³Yu'un vo'ot atuc laj avac' jch'ulel, li'ayan talel avu'un; ac'bun jbijil yo' ta xch'un cu'un ti amantaltaque.

⁷⁴Ti buch'utic sna' xayich'ot ta muq'ue, xmuyubajic no'ox ti c'alal ta xiyilicune, yu'un ja' xa spatobil co'nton c'otem ti ac'ope.

⁷⁵Cajval, jna' lec ti tuc' scotol ti c'usitic nopbil avu'une, ti oy smelol ti c'alal ta xavac'bun quich' ti jvocole.

⁷⁶Ti syail xc'uxul avo'ntone, ja' tunuc ta spatobil co'nton co'ol s'elan jech c'u cha'al loq'uem ta ave ati' ti ta xapas ta jtojole.

⁷⁷Ac'bun quil ti ts'iquem cuchem avu'une yo' jech ta xicuxi xchi'uc, yu'un xlaet no'ox ta xca'i yu'un ti c'u s'elan ta xachanubtasvane.

⁷⁸Nijil comicuc ta q'uexlal ti buch'utic ch'abal xch'ulelic xa'i sba ta banomil ti ta yilal no'ox yo'ntonic ta xiyilbajinicune; ti vu'une, ja' no'ox oy ta co'nton ta snopilanel ti c'usitic albil avu'une.

⁷⁹Ac'o stsob sbaic talel ta jtojol ti buch'utic sna' xayich'ot ta muq'ue, ti buch'utic xojtiquinic ti c'u s'elan ta xal ti amantaltaque.

⁸⁰Tuc'uc me co'nton ta spasel ti c'usitic jbel tsots albil avu'une yo' jech mu q'uexlaluc ta xicom.

⁸¹Mu xa malabajuc ta xca'i ti c'otuc yorail ta xapojune, yu'un ja' xa c'ot ta spatobil co'nton ti ac'ope.

⁸²Lub xa ta t'ojlej ti jsat ta smalael ti c'usi avaloj ta xapase, yu'un xichi laj cale: “¿C'usi to ora ta xvul ta loq'uel ti spatobil co'nton avu'une?”

⁸³Ac'o mi ch'aybilun xa ta o'ntonal ti jeche' molun xa ta banomile, mu'yuc bu jipoj ta co'nton ti oy c'usitic jbel tsots albil avu'une.

⁸⁴¿C'u to sjalil ta jmala? ¿C'usi to ora ta xachapan ti buch'utic nutsbilun yu'unique?

⁸⁵Ti buch'utic mu'yuc xch'ulel xa'i sbaique, ti svalopatinojic comel ti chanubtasel avu'une, chapal jpets'al yu'unic ti bu ta xi'ech'e.

⁸⁶Va'ano aba, coltaun, yu'un ta jeche' no'ox ti nutsbilun yu'unique. Ti amantaltaque, tuc' scotol.

⁸⁷Jutuc xa sc'an xtub yu'unic jc'oplal li' ta banomile, ja' no'ox un, ti c'usitic nopbil avu'une mi jutebuc laj jten ta co'nton.

⁸⁸Cuxicun to avu'un jech c'u cha'al ti oy syail xc'uxul avo'ntone, jech ta xc'ot ta pasel cu'un ti amantaltac ti loq'uem ta ave ta ati'e.

⁸⁹Cajval, ti ac'ope sbatel osil mu xtub, yu'un ta vinajel to liquem talel ti yipe.

⁹⁰Sbatel osil, oy ti slequil stuq'uil avo'ntone, yu'un vo'ot laj achotan ti banomile, ja' jech lec com o.

⁹¹Scotol ti c'usitic oye, staoj yav lec oyic, yu'un jech c'ot ta pasel jech c'u cha'al nopbil avu'une, yu'un scotolic taje, ja' ta xtunic ta atojol.

⁹²Ti mu'yucuc ta xiyac'bun smuyubajel co'nton ti chanubtasel avu'une, lilaj xa yu'un ti at-o'nton jechuque.

⁹³Mi ja'uc ta jch'ay ta co'nton ti c'usitic nopbil avu'une, yu'un ja' ta sventa ti laj avac' ta xicuxie.

⁹⁴Coltaun un cha'e, yu'un avu'unun, yu'un ja' jtamoj ta spasel ti c'usitic nopbil avu'une.

⁹⁵Ti jti'-joltavanejetique xchapanoj xa sbaic c'usi ora ta xitsuts yu'unic, ja'uc ti vu'une cac'oj co'nton ta stojol ti amantaltaque.

⁹⁶Quiloj xa ta jba ta jsat ti c'usitic ta xc'ot ta pasele, ta xlaj sc'oplal, ja'uc ti amantaltaque mu'yuc spajeb ta j'ech'el.

⁹⁷Mu tenbaj ta co'nton xca'i ti chanubtasel avu'une. Ti c'usi ta xale, ja' ta jnopilan ta x'ech' cu'un ti c'ac'ale.

⁹⁸Ti amantaltaque, j'ech'el mu'yuc buch'u xispojbun, xjelav to laj jta jbijil yu'un, mu sta sbijil ti jcontrataque.

⁹⁹X'ech' to xca'ibe smelol, jc'ol to mu sta com cu'un ti cajchanubtasvanejtaque, yu'un ep ta x'abtej jol ta snopbel smelol ti amantaltaque.

¹⁰⁰X'ech' to xca'ibe smelol, jc'ol to mu sta com cu'un ti moletic ich'bil ye sti'ique, yu'un cac'oj co'nton ta spasel ti c'usitic nopbil avu'une.

¹⁰¹Laj xa quicta comel ta steq'uel xaniel scotol ti bu chopol ta x'ic'van batele yo' jech ta xc'ot ta pasel cu'un ti ac'ope.

¹⁰²Mu'yuc jch'acoj jba ta spasel ti c'usitic nopbil avu'une, yu'un vo'ot jchanubtasvanejot cu'un.

¹⁰³Ti c'usi avaloj ta xapase, co'ol s'elan ajapom ta xa'i ti quee, ti chi' xa ta jbic' yalel ta xca'ie.

¹⁰⁴Ta sventa ti c'usitic nopbil avu'une, ta jta ep jbijil yu'un, jech o xal ta jcontrain scotol ti c'usi jeche' no'ox nopbil ta pat jolale.

¹⁰⁵Ti ac'ope yac'oj xojobal bu ta jtec' batel ti coque, sac jaman no'ox ech'el ti jbe yu'une.

¹⁰⁶Ti oy c'usi laj jva'an jba ta yalele, xi s'elan ta xc'ot ta pasel cu'une; ta xlic cabtelan ta spasel ti c'usitic tuc' nopbil avu'une.

¹⁰⁷Cajval, ta xilaj ta xca'i, quiluc to ti jch'iel jc'opojel jech c'u cha'al avaloj ta xapase.

¹⁰⁸Cajval, tsacbun ich'bun ti matanaletic ti loc' ta que ta jti'e, chanubtasun lec ta sventa ti c'usitic nopbil avu'une.

¹⁰⁹Chapal ono'ox jc'oplal yu'unic ti ta xilaje, ja' no'ox un, mi ja'uc ta jch'ay ta co'nton ti chanubtasel avu'une.

¹¹⁰Ti jti'o'ntonetique sa'olanic xa c'u s'elan ta xiyal ta lum yu'unic, le' une, mu xquicta jba ta spasel ti c'usi nopbil avu'une.

¹¹¹Ti jrexto ta sbatel osile, ja' ti amantaltaque, yu'un ja' ta sventa ta jta yu'un ti xmuyubaj co'ntone.

¹¹²C'ot ta co'nton ta spasel ti c'usi ta sc'an ti oy c'usitic jbel albil avu'une, ti j'ech'el mu xch'ay ta bee, ja' to ti c'uxi c'ot ta stsutsebe.

¹¹³Yanijem co'nton yu'unic ti buch'utic naca ta spac'ta sbaique, ja'uc ti ac'ope jun yutsil ta xca'i ta co'nton.

¹¹⁴Yu'un vo'ot jpojvanej jnac'vanej c'otemot cu'un, yu'un ta sventa ti ac'ope, ja' jpatoj co'nton yu'un.

¹¹⁵¡Ch'aco abaic loq'uel ta jtojol jti'o'ntonetic, ta jc'an ti c'otuc ta pasel smantaltac ti Dios cu'une!

¹¹⁶Ac'bun quip yo' ta xc'ot ta pasel jech c'u cha'al avaloje, yu'un ja' to jech ta xicuxi, mu xach'aybun ta be ti oy c'usi jpatoj co'nton ta jtae.

¹¹⁷Va'ano aba ta jtojol yo' jech colem ta xic'ot, ja' to jech ta xc'ot ta pasel cu'un ta j'ech'el ti oy c'usitic jbel tsots albil avu'une.

¹¹⁸Bajbil tenbil ta xc'ot avu'un ti buch'utic ta svalopatinic comel ti oy c'usitic jbel tsots albil avu'une, yu'un mu'yuc xa stuq'uil ta xavil ti snopbenal yu'unique.

¹¹⁹Ti jti'o'ntonetic ta banomile, co'ol s'elan c'a'ep ta xavil. Mu tenbaj ta xca'i ti amantaltaque.

¹²⁰Ti jbec'tal jtacopale ta xnic yu'un ti xi'elal ta aba ta asate, ja' yu'un un, nijil chimilun ta spasel ti c'usitic nopbil avu'une.

¹²¹Mu'yuc quictaoj jba ta spasel ti c'usi lec ta q'uelele; mu me teyuc no'ox aq'uelojun ti ta xi'och ta yoc ta sc'ob ti buch'utic ta xilbun ti jvocole.

¹²²Va'ano, tec'ano aba ta sventa ti jlequilale yo' jech mu xquich' ilbajinel yu'un ti buch'utic mu'yuc xch'ulel xa'i sbaique.

¹²³Lub xa ta t'ojlej ti jsat ta smalael ti ta xtal acoltaune, yu'un jmalaoj xa ti ta xtal apojune, yo' jech ta xc'ot ta pasel jech c'u cha'al ti loq'uem ta avee.

¹²⁴Ti avajtunel li'e, c'otuc ta pasel ta stojol jech c'u cha'al nopbil avu'un ta syail xc'uxul avo'ntone, ac'bun quil ta yojtiquinel ti c'usitic jbel tsots albil avu'une.

¹²⁵Yu'un avajtunelun, ac'bun sbijil ti jol co'ntone, yu'un ta jc'an ta xcojtiquin ca'i ti amantaltaque.

¹²⁶Cajval, yorail xa ti oy c'usi xu' ta xavac' iluc ta jtojole, yu'un oy xa buch'u laj svalopatinic comel ti chanubtasel avu'une.

¹²⁷Yan ma' ti vu'une, ja' xloc' venta ti mu jipbaj ta xca'i ti amantaltaque, ja' peq'uel sc'oplal ta xca'i ti t'ujbil oroe.

¹²⁸Ja' yu'un un, ja' jtamoj ech'el ta spasel ti c'usitic nopbil avu'une, jech o xal ta jcontrain scotol ti c'usi jeche' no'ox nopbil ta pat jolale.

¹²⁹Toj ech'em no'ox yutsil ti amantaltaque, jech o xal ta jch'un.

¹³⁰Smelol ti ac'optac ta xich' aq'uel ta na'ele, ta xjam yu'un ti snopobile, ta stojobtasatic yu'un ti buch'u ch'abal ti sbijilique.

¹³¹Jc'anuc xa ca'i ti teyuc ta que ta jti' ta yalel ti amantaltac ti spajeb yutsil ta xca'ie.

¹³²Ac'o tal asat ta jtojol, c'uxubajuc avo'nton cu'un jech c'u cha'al ta xapas ta stojol ti buch'utic yac'oj yo'nton ta atojole.

¹³³Va'ano aba yo' lec ta xbat cu'un ti c'usi ta xal ti ac'ope, mu teyuc no'ox aq'ueloj ta xiyu'ninun ti c'usi toj chopole.

¹³⁴Pojun yo' mu xistsalun ti ilbajinel yu'unique, ta jc'an ta xc'ot ta pasel cu'un ti c'usitic nopbil avu'une.

¹³⁵Junuc yutsil ti asat avelov ta stojol ti avajtunel li'e, chanubtasun xtoc ta sventa ti oy c'usitic jbel tsots albil avu'une.

¹³⁶Mu'yuc spajeb ti xmalmun ta xbein ti ya'lel jsate, ta scoj ti mu'yuc ich'bil ta muc' ti chanubtasel avu'une.

¹³⁷Cajval, ti vo'ote oy alequil atuq'uil, tuc' ta j'ech'el ti c'usitic nopbil avu'une.

¹³⁸Scotol ti amantaltaque, naca tuc', naca melel.

¹³⁹Mu ts'icbaj ta xa'i co'nton yu'unic ta scoj ti valopatinbil com ac'op yu'unic ti cajcontrataque.

¹⁴⁰Ti tsots vocoletic laj vuluc ta loq'uele, vinaj ti tsalbil c'ot ta sventa ti c'usi avaloj ta xapase, ja' yu'un un, mu ictabaj ta xa'i ti avajtunel li'e.

¹⁴¹Mu'yuc jtu, bajbil c'otemun, le' une, mu'yuc laj jch'ay ta co'nton yu'un ti c'usitic albil avu'une.

¹⁴²Ti chapanel avu'une tuc' ta j'ech'el; ti chanubtasel avu'une ja' melel ono'ox.

¹⁴³Quiloj xa ti mu x'ech' xjelav ti vocole, ti utilanele, ja' no'ox un, ta sventa ti amantaltaque laj yac'bun ti xmuyubaj liquel ti co'ntone.

¹⁴⁴Tuc' ono'ox ta j'ech'el ti amantaltaque; Ac'bun sbijil jol co'nton yo' jech ta xicuxi.

¹⁴⁵Ta yutil co'nton, ta xi'avan talel ta atojol, Cajval; tac'bun talel, yu'un ta jc'an ti c'otuc ta pasel cu'un ti oy c'usitic jbel albil avu'une.

¹⁴⁶Xi'avalet talel ta atojol, coltaun yo' ta xc'ot ta pasel cu'un ti amantaltaque.

¹⁴⁷Mu to ta sacub talel ti osile, ta xlic jc'anbot ti coltaele, jpatoj xa co'nton yu'un ti c'usi avaloje.

¹⁴⁸Ti c'usi avaloj ta xapase, jviq'uil-satioj ta snopel smelol ti jliquel yic'ubel ti osile.

¹⁴⁹A'yibun ti jc'opojel jti'inele, Cajval, ta sventa ti syail xc'uxul avo'ntone, quiluc to ti jch'iel jc'opojel jech c'u cha'al albil jc'oplal avu'une.

¹⁵⁰Ti jti'o'nton j'ilbajinvanejetique, q'uelelic xa ta jtojol, yu'un mu'yuc c'usi bal o laj ya'iic ti chanubtasel avu'une.

¹⁵¹Ti vo'ot eque, Cajval, mu nomuc oyot, yu'un melel scotol ti amantaltaque.

¹⁵²Le'tic xa talel laj cojtiquin ti amantaltaque, ti j'ech'el o laj acomese.

¹⁵³Q'uelo avil, mu x'ech' xjelav ti jvocole, pojun, ti chanubtasel avu'une mu'yuc jch'ayoj ta co'nton.

¹⁵⁴Macbun ta be ti jvocole, q'uejun nac'un; quiluc to ti jch'iel jc'opojel avu'un jech c'u cha'al avaloje.

¹⁵⁵Ti coltael avu'une nom oy ta stojolic ti buch'u mu'yuc xch'ulel xa'i sbaique; mu'yuc sts'acliojic ta spasel ti c'usitic jbel tsots albil avu'une.

¹⁵⁶Cajval, mu no'ox albajuc ti ts'iquemal avu'une, quiluc to jch'iel jc'opojel jech c'u cha'al albil avu'une.

¹⁵⁷Ep ta j'ech'el ti cajcontratac ta xaq'uicun ya'iic batel ta lum ach'ele, ja'uc ti vu'un une, mu'yuc ta jch'ac jba ta stojol ti amantaltaque.

¹⁵⁸Mu ts'icbaj ta xca'i yu'unic ti j'ac'vanejetic ta milel ti mu xich'ic ta muc' ti amantaltaque.

¹⁵⁹Aviloj, Cajval, ti batem co'nton yu'un ti c'usitic nopbil avu'une, quiluc to jch'iel jc'opojel avu'un ta sventa ti syail xc'uxul avo'ntone.

¹⁶⁰Stsacleb yip ti ac'ope, ja' ti melele; scotol ti c'usitic nopbil avu'une, sbatel osil tuc' ta j'ech'el.

¹⁶¹Ta yilal no'ox yo'ntonic ta xiyilbajinicun ti buch'utic cajal viniquetic xa'i sbaique, ja' no'ox un, ti co'ntone xi'taoj lec ti ac'ope.

¹⁶²Ti vu'une ximuyubaj no'ox yu'un ti oy c'usi avac'oj ave ta xapase, co'ol xa j'elan ta xca'i jech c'u cha'al ti buch'u busul no'ox ti sc'ulejale.

¹⁶³Mu'yuc stu cu'un ti c'usi jutbile, mu xa jc'an jq'uelbe sat, ti chanubtasel avu'une, jun no'ox yutsil ta xca'i.

¹⁶⁴Scotol c'ac'al, xilequil-c'opoj no'ox ta atojol ta sventa ti tuc' ti c'usi loq'uem ta nopel avu'une.

¹⁶⁵Ti buch'utic mu ictabaj ta xa'iic ti chanubtasel avu'une, mu'yuc c'usi sna' ta xa'iic ta j'ech'el, mi jtosuc ti oy c'usi ta slubtsanatic yu'une.

¹⁶⁶Cajval, oyun ta smalael ti ta xacoltaune, yu'un cac'oj co'nton ta yabtelanel ti c'usi ta sc'an ti amantaltaque.

¹⁶⁷Cajal sc'oplal c'otem cu'un ti amantaltaque, mu jutebuc tenbaj ta co'nton ta xca'i.

¹⁶⁸Cajal sc'oplal c'otem cu'un ti c'usitic nopbil avu'une, ti amantaltaque; ti c'u j'elane xavojtiquinun lec.

¹⁶⁹Tac'bil c'otuc avu'un ti xi'oc' xi'avane, Cajval, ac'bun sbijil jol co'nton jech c'u cha'al ta xal ti ac'ope.

¹⁷⁰C'otuc ta atojol ti jc'opojel jti'inele, pojun coltaun jech c'u cha'al avaloj ta xapase.

¹⁷¹Naca yalel alequilal ti oy ta que ta jti'e, yu'un laj achanubtasun ta sventa ti oy c'usi jbel tsots albil avu'une.

¹⁷²Laetuc ti que jti' ta sq'uejintael ti c'usi avaloj ta xapase, yu'un tuc' scotol ti amantaltaque.

¹⁷³Mu xajalta ti avoc ac'ob ta scoltaelune, yu'un lec ta xca'i ti c'usitic nopbil avu'une.

¹⁷⁴¡Ta jc'an ti ac'o acoltaune, Cajval! Ximuyubaj no'ox yu'un ta xca'i ti chanubtasel avu'une.

¹⁷⁵Ta jc'an ti cuxicun to avu'un yo' jech ta jlequil-c'optaot, sbainucun ta spojelun ti coltael avu'une.

¹⁷⁶Co'ol j'elan junuc ch'ayemal chij, ¡la' sa'un un, yu'un mu'yuc jch'ayoj ta co'nton ti amantaltaque!