Read Tzotzil Salmos 141 Bible Online

Salmos 141 - Tzotzil bible

Salmos 141

¹Xichi xi'avet ta atojol, Dios: la' ta jtojol un, a'yio ti jc'opojel jti'inel xivocolet ta atojole.

²Co'oluc smuil pom c'otuc ta atojol ti jc'opojel jti'inele. Ti jnuboj coc jc'obe, jechuc c'otuc ta atojol jech c'u cha'al ti matanal ta xich' aq'uel ta mal c'ac'ale.

³Cajval, va'anbo yajval ta sventainel ti que jti'e ti mu xbet'bunuc no'oxe.

⁴Teno loq'uel ta jtojol ti xac' no'ox jol ta spasel ti chopole. Mu aq'uelojucun no'ox ta yabtelanel ti c'usi ta soquesvane, mi ja'uc ti capalun xa ta ve'el uch' vo' xchi'uc ti jchopol joletique.

⁵Jc'uxubinel ta xca'i ti ta xistsitsun ti buch'u xa'ibe sni' xchiquinale. Lequil muil poxil ta xca'i yu'un ti buch'u ta xisjajantaune. Mu jbaj ma' taj une, xic'opoj xiti'in xa yu'un un, manchuc mi tsots ta svulun.

⁶Sjipelicuc ta lum ta xc'ot ta stojolic ti banquilal yu'unic ti jchopol joletique, ta xlic yilic ta sba ta satic ti jun yutsil c'usitic ta xcale.

⁷Ti sbaquilic une, tan puc ta xbat bu oy ti muquinale, co'ol jech c'u cha'al ta xich' pasel spolol-polol ti banomile.

⁸Cajval jCh'ul-Tot, cac'oj ti jsat ta atojole. Ta jsa' jpojel ta atojol, mu xajip xatenun.

⁹Pojun ti mu xi'och ta pets' ti bu sva'anojique; pojun coltaun un ti chapal xa yu'unic jpets'al ti jchopol joletique.

¹⁰Ti chapal xa jpets'al yu'un ti buch'u mu'yuc xch'ulel xa'i sbaique, c'otuc ta sba stuquic un, vechetcun no'ox jelavel ti vu'une.