Read Tzotzil Salmos 143 Bible Online

Salmos 143 - Tzotzil bible

Salmos 143

¹A'yibun ti jc'opojel jti'inel, Cajval, ts'etanbun ani' achiquin ti xivocolete. Tac'bun jc'op ca'yej, yu'un oy atuq'uil, jun avo'nton.

²C'alal ta xata ta iq'uel ti avajtunele, ma'ucuc me ti chapanel ta stae, yu'un mu'yuc junuc ma' ti ch'abal smul ta aba ta asate.

³Ti jcontrataque ta xiyilbeicun ya'i ti jvocole, net'bilun xa ta banomil yu'unic; ta stsatsal sujicun batel ti jcuxuc xa ta ic'al osile, jech c'u cha'al ti buch'u chamic xa le' talel ta vo'nee.

⁴Mu xnel xjelav ta xca'i ti vocol yu'une; mu xa tsacaluc ta xca'i ti co'ntone.

⁵Ti c'u s'elan laj c'otuc ta pasel ta vo'nee, ta jvules ta co'nton; ta jnopilan scotol ti c'usitic laj apase.

⁶Xye'elet ma' ti coc jc'ob ta aba ta asate, ti jtauc to ti junuc co'ntone, co'ol xa j'elan jech c'u cha'al ti taquin banomile.

⁷Tac'bun no'ox talel xch'a ti jc'op jti'inele, laj xa ti yipal une. Mu xajalan ti jcoltaele yo' jech mu ta jtabe stasal ti animaetique.

⁸Ta sacubel no'ox osil, ac'bun jna' ti syail xc'uxul avo'ntone, yu'un yac'oj jol jbaquil jpatoj co'nton ta atojol. Ac'bun jna' ti c'u s'elan ta jpas jbae, yu'un ta xcal ta atojol ti yatel co'ntone.

⁹Pojun ta yoc ta sc'ob ti cajcontrataque, Cajval, yu'un jsa'ilan xa jpojobbail ta atojol.

¹⁰Chanubtasun ta spasel ti c'u s'elan oy ta avo'ntone, yu'un vo'ot ti Diosote. Stojobtasucun batel ta lequil be ti yutsilal snopbenal avu'une.

¹¹Ch'i c'opojcun to ta aventa, Cajval. Ti jech oy atuq'uil alequilale, loq'uesun ti li' ta vocole.

¹²Tubo sc'oplal ti cajcontrataque ta sventauc syail xc'uxul avo'nton, j'ech'eluc tsutsesbun scotol jcontratac ti vu'un avajtunelune.