Read Tzotzil Salmos 145 Bible Online

Salmos 145 - Tzotzil bible

Salmos 145

¹Ta xcalbe sc'oplal ti amuc'ul atsatsale, Cajval, Dios ti Ajvalilote, sbatel osil ta jlequil-c'optaot.

²Jujun c'ac'al ta jlequil-c'optaot, sbatel osil ta xcalilan ti avutsile.

³Ech'em smuc'ul stsatsal ti Dios, sc'otebal o ti lequil c'optabile; mu stac' a'yeluc bu c'alal ti smuc'ul stsatsale.

⁴Ta totil me'il, ta alab nich'nab, ta slequil c'optaic ti avabteltaque; ta xalolanbeic sc'oplal ti c'usitic muc'tic laj c'otuc ta pasel avu'une.

⁵Ta xich' alel ti jun avutsil ti jcuch-abtelote, ta xcalbe sc'oplal ec un ti c'usitic ch'ayal ta xc'ot o'ntonal yu'un ti ta xapase.

⁶Ta xich' albel sc'oplal ti c'usitic muc'tic xi'bal sba ta xapase, ta xcalbe sc'oplal ec un ti amuc'ul atsatsale.

⁷Ta xich' albel sc'oplal ti yepal no'ox ti slequilal yutsilal avo'ntone, x'avanic no'ox ta yalel ti tuc' avo'ntone.

⁸Ti Diose, c'un yo'nton, sna' xc'uxubaj, spajebal xa ti syail xc'uxul yo'nton ti oy ts'iquemal xcuchemal yu'une.

⁹Oy slequil ti Dios ta stojol scotole, ta xc'uxul yo'nton ta sq'uel ta xchabi ti yabteltaque.

¹⁰Yalicuc un, Dios, ti jun yutsil scotol ti avabteltaque. Slequil c'optaucot ti mu yanuc yo'ntonic ta atojole.

¹¹Slo'iltaicuc ti xtixet no'ox yutsil bu ta xaventainvane. Yich'uc alel ti muc'tic no'ox ti c'usitic ta xc'ot ta pasel avu'une.

¹²C'otuc ta sni' ta xchiquinic jnaclejetic ti amuc'ul atsatsale, ti xtixlajan no'ox yutsil ti bu ta xaventainvane.

¹³Ti avabtel ta ajvalilale, sventa sbatel osil, sbatel osil ti ventainvanej avu'une.

¹⁴Ti buch'utic lomemique, ta xtoyeic liquel yu'un ti Diose; ta snit liquel un ti buch'utic lubtsajemic xae.

¹⁵Scotolic t'ojol satic ta atojol ta smalael ma' ti yuni ve'elic ta xavac'bee.

¹⁶Ta yutsil avo'nton, ta ac'ob atuc, ta xavac'be yo' ta xnoj lec xch'ut scotol ti c'usitic xvic'lajan sate.

¹⁷Jun yutsil ti c'usitic ta spas batel ti Diose, ta slequil yo'nton ti c'usitic ta snope.

¹⁸Ti buch'u xvocoletic ta stojol ti Diose, nopol va'al ta sts'elic, ti sjunul yo'ntonic xvocolet ta stojole.

¹⁹Ta xc'ot ta pasel yu'un ti c'usitic ta sc'anic ti buch'utic ta xich'ic ta muq'ue; c'alal ta sc'anic coltaele, ta x'a'yibat sc'opic, ta xpojatic yu'un.

²⁰Ti Diose ta spoj ti buch'utic mu xtenvan ta o'ntonale, ja'uc ti buch'u mu'yuc xch'ulel xa'i sbae, ta stubbe sc'oplal.

²¹Slequil-c'opta no'ox Dios ti que jti'e. Sbateluc osil, scotolicuc lequil c'opojicuc ta sventa.