Read Tzotzil Salmos 147 Bible Online

Salmos 147 - Tzotzil bible

Salmos 147

¹Jun yutsil ta j'ech'el ti Diose. Xloc' venta ta jq'uejinta q'uejimoletic ta stojol ti Dios cu'untique. Stuc no'ox yich'uc q'uejintael ta c'upil sba q'uejimoletic.

²Ti Diose ta xcha'va'an ti jteclum Jerusalene; ta stsob talel ti israeletic ti tan puc batemique.

³Ta xpoxtabe ti buch'utic xmich'mun ti yo'nton ta xa'iique; ta xpixbe ti syayijemalique.

⁴Sbainoj c'u yepal c'ot ti c'analetique, oy sbitac yac'ojbe ti jujune.

⁵Cajal c'otem sc'oplal ti Dios cu'untique; oy smuc'ul stsatsal, mu tabaj ti sbijile.

⁶Ti Diose ta stam ta stoy liquel ti buch'u biq'uit yac'oj sbae, ja'uc ti buch'u mu'yuc xch'ulel xa'i sbae, ta spec'tsanbe sc'oplal.

⁷Laetuc siquetuc o'ntonal ta sq'uejintael ti Diose; lometuc xa ti arpa ta sq'uejintael q'uejimoletic ta stojol ti Dios cu'untique.

⁸Yu'un xtemet no'ox talel yu'un ti toc ta vinajele, ti xchapanoj xa ta xac' taluc ti chaquilo' ta banomile, ti ta xac' ch'iuc talel smomolal ti osiltique.

⁹Ta smalq'uin ti chon bolometique; ta smalq'uinbe yalabtac xtoc ti jojetic ti xch'ivlajan no'ox ta sc'anique.

¹⁰Mauc lec ta xa'i ti Diose, ti jpat xa co'ntontic yu'un ti ca'e, yu'un ti buch'u xu' yu'une.

¹¹Ti c'usi lec ta xa'ie, ja' ti buch'utic sna' sbic'tajes sbaic ta stojole, ti buch'utic spatoj yo'ntonic ta sventa ti syail xc'uxul yo'ntone.

¹²Jteclum Jerusalén, lequil c'opojan ta stojol ti Diose; Jteclum Sión, albo slequilal ti Dios avu'une.

¹³Laj yac'be yiptac stsacleb syavialtac ti ti'naetic avu'une; laj sva'an sba ta stojol anich'nab ta yut ti jteclume.

¹⁴Ta slamajes c'op ti bu c'alal ta xpaj talel ti avosilale, ta xac'bot ave' alajes ti lequil trigoe.

¹⁵Naca ta sc'op stuc ti c'usitic ta xc'ot ta pasel li' ta banomile.

¹⁶Ta x'esomaj yu'un ti taiv ti sac botan no'ox jech c'u cha'al ti tsotse, co'ol s'elan pucuc xvajet no'ox ta stani yalel tal.

¹⁷Xlamet ta xac' taluc ti bote; oy siquil ta j'ech'el, ta xjoybij ta bot yu'un ti vo'e.

¹⁸Le' une, ta sventa sc'op ta xlic uluc yu'un; xjumet no'ox ta xtal ic' yu'un, ta xlic xanavuc yoc ti vo'e.

¹⁹Ti sc'ope, ti c'usi jbel tsots albil yu'une, ti c'usitic nopbil yu'une, laj yac'be sventain ti Jacobe, Israel ti yan sbie.

²⁰Mu jechuc laj spasbe ti yan muc'tiquil lume; j'ech'el mu'yuc bu laj sna'ic yu'un ti c'usitic albil yu'une. Jun yutsil ta j'ech'el ma' ti Dios une.