Read Tzotzil Salmos 17 Bible Online

Salmos 17 - Tzotzil bible

Salmos 17

¹Cajval, ts'etano ani' achiquin ta ya'yiel ti jeche' no'ox xvulvun ti jc'oplale, chiquintao un ti xime'inal oq'ue, chiquintabun ti xic'opoj xiti'ine, ti j'ech'el mu'yuc loq'uem ta que ti naca jutbile.

²Licuc talel ta atojol ti chapanel ta xquich'e, yu'un xana' lec ti c'u s'elan ti chapanele.

³Abainoj un ti c'u s'elan ta jnopilane; ta ac'ubaltic une, avac'oj asat ta sq'uelelun; laj atic'un xa ochel ta c'oc' ta sq'uelel ti co'ntone, mu'yuc laj ata un ti oy c'usi chopol ta jtojole. Mu'yuc calojan ti bu ma'uc smelole,

⁴jech c'u cha'al ta spasic ti yane. Ma'uc jtamoj batel sbelel ti c'usitic chopol ta pasele, co'ol jtamoj ta spasel jech c'u cha'al ta xal ti amantale.

⁵J'ech'el jtamoj batel ti bu atamoj batele, mu'yuc jq'uejoj jba ta atojol un.

⁶Ch'ul Dios, ta xic'opoj ta xiti'in talel ta atojol, yu'un jna' ti ta xatac'bune; a'yibun lec un, ts'etanbun ani' achiquin yu'un ti jc'ope.

⁷Ac'bun quil ti syail xc'uxul avo'nton une, ti ta xapoj yu'un scontra ti buch'u ta sa' spojel ta sventa ti amuc'ul atsatsale.

⁸Chabiun un jech c'u cha'al ta xachabi ti yuninal asate; nac'un ta yolon squeoval yaxinal ti avoc ac'obe

⁹ti jech liquem jc'oplal stsaquelun ta leto yu'unic ti buch'u mu'yuc xch'ulel xa'i sbaique, ti jech macbilun ta be yu'unic ti cuxul jti'oval cajcontrataque.

¹⁰Cajal toyol xa'i sbaic, xtoyetic xchi'uc ti sc'opique.

¹¹Q'uelelic xa ta jtojol ti bu yalel muyelune, ja' xa no'ox smalaojic ti bu xu' telel ta xilaj yu'unique.

¹²Co'ol s'elan leonetic, jti'oval león xa'i sbaic ti lubul xa snac'oj sbaic ta snac'obbailique, ti mu'yuc xa c'usi x'ech' o ta xa'iic ti xbitluj no'ox talel ti lubivaneje.

¹³Va'lan tec'lan un, Dios, tsaco abaic ta c'op xchi'uc. C'asbo ya'i ta puxq'uinbel ti yacanique. Ta sventauc ti avespada une, pojbil c'otcun avu'un ta stojol ti buch'u mu'yuc xch'ulel xa'i sbaique.

¹⁴Ta sventa ti amuc'ul atsatsal une, Dios, pojun ta yoc ta sc'obic, jipo ya'iic loq'uel ta banomil ti c'alal ja' no'ox yuni rextoic c'otem ti sba banomile. Busuluc no'ox avu'un ti sc'ujlejalique, ac'o ve'uc yuch'ic vo' ta st'imesel ti xch'utique, ti xnich'nabique, ti smamobtaque.

¹⁵Melel xcal ti vu'une, xlaet no'ox ta xca'i ta jq'uelbot ti asate, ta xquil ono'ox asat c'alal xiva'et liquele.