Read Tzotzil Salmos 21 Bible Online

Salmos 21 - Tzotzil bible

Salmos 21

¹Dios, xlaet no'ox yo'nton ta xa'i ti ajvalile, yu'un laj avac'be ti yipe; xlaet no'ox yo'nton ta xa'i ta j'ech'el, yu'un tsalvanem c'ot avu'un.

²C'ot ta pasel avu'un ti c'usi laj sc'ane; mu'yuc laj ajaltabe ti c'usi juteb ta yo'ntone.

³Laloc' ta snupel ta be, yepal no'ox ti yutsilal slequilal laj sta avu'une; laj avac'be slap sronail sjol meltsanbil ta oro.

⁴Laj sc'anbot ti xch'iel sc'opojele, ti xi s'elan laj avac'be une: mu'yuc spajeb ti xcuxlej laj avac'be.

⁵Colavalbe ti laj acoltae, cajal c'ot ti sc'oplal ta j'ech'ele; laj sta ich'el ta muc' avu'un, laj avac'be slequilal.

⁶Sbatel osil ava'anoj aba ta stojol; ti va'alot ta stojol une, xlaet no'ox yo'nton ta j'ech'el avu'un.

⁷Ti vo'ot une, ajvalil, j'ech'el mu xayal ta lum, yu'un apatoj avo'nton ta stojol ti Diose; j'ech'el apatoj avo'nton yu'un syail xc'uxul yo'nton ti Buch'u oy ta toyole.

⁸Ta xcuch avu'un ti ta x'och ta avoc ta ac'ob scotol ti avajcontrae; tsalbil ta xc'ot avu'un ta abats'i c'ob scotol ti buch'u xti'et sjolic ta atojole.

⁹Ta xatic' ochel ta c'ac'al jorno bu ta xtil c'alal ta xavul ta xchapanele. Ti capem xa sjol ti Diose, ta stubbe sc'oplal ta c'oc' ti ta stsutsesvan ta j'ech'ele.

¹⁰Ta sba sat viniquetic ta xach'aybe ti sc'oplal li' ta banomile, ti xnich'nabique, ti snitilulique.

¹¹Manchuc mi ta xilbot ya'i avocol, ti chapal xa yu'un ti oy c'usi ta spasbote, mu xc'ot ta pasel yu'unic un.

¹²Bijil satibil ech'el avu'un xchi'uc ti ayolob ti ta xjatav loq'uel avu'une.

¹³Va'lan tec'lan xchi'uc ti amuc'ul atsatsal une, Dios. Jvoluc xa jbacutic ta sq'uejintael q'uejimol ta sventa ti latsalvane.