Read Tzotzil Salmos 28 Bible Online

Salmos 28 - Tzotzil bible

Salmos 28

¹Dios, ti jpojvanejot cu'une, xi'oc'olet ta atojol. Mu xajalta aba ta staq'uel talel ti jc'ope. Mi ta xajalta aba ta staq'uel ti jc'ope, laj xa jtabe stasal jech c'u cha'al ti buch'utic chamemic xae.

²A'yibun ti xi'avet ta sc'anel coltael ti jnuboj coc jc'ob ta stuq'uil ti ach'ulnae.

³Mu jmojuc xajochbun ta cacan xchi'uc ti buch'u mu'yuc xch'ulel xa'i sbaique, mu xc'ot ta jtojol avu'un jech c'u cha'al ta xc'ot ta stojol ti jchopol joletique, ti jun xa yutsil ti ye sti'ic yilele, ti nojem ta yo'ntonic ta spasel ti chopole.

⁴Pacbo sutel jech c'u cha'al laj spasique, tojbo sutel ti c'u s'elan laj xa spasique, ti c'u s'elan chopol stamojique.

⁵Yu'un mu'yuc ta yo'ntonic ti c'usitic laj spas ti Diose, ac'o stubbe sc'oplal ti mu xa stam sbaic liquel yu'une.

⁶Ech'em no'ox yutsil ma' ti Dios une, laj ya'i ti xivocolet ta stojole.

⁷Muc'ul tsatsal jpojvanej cu'un ma' ti Dios une; j'ech'el laj jpat co'nton ta stojol un, laj scoltaun. Xmuyubaj xa ma' ti co'ntone; ta xiq'uejin un, ta xcalbe coliyal ti Diose.

⁸C'otem ta yip smuc'ul stsatsal steclumal ma' ti Dios une; scoltaobba, spojobbail ti ajvalil laj st'uje.

⁹Tic'o aba ta scoltael ti ateclumal une, Dios, va'ano aba ta stojol ti avu'untaque. Co'oluc a'elan junuc jq'uel-chij ta xchabiel; scotoluc c'ac'al, petbiluc ta avoc ta ac'ob un.