Read Tzotzil Salmos 30 Bible Online

Salmos 30 - Tzotzil bible

Salmos 30

¹ Ta jlequil-c'optaot, Dios, yu'un laj atic' aba ta jcoltael, mu'yuc xavac' ave ati' ta sna'leelicun ti jcontrae.

²Cajval Dios, laj jc'anbot ti coltael une, c'ot ta pasel ti licol avu'une.

³Laj atic' aba ta jpojel un, Dios, ti chamebal xa ox jq'ueloj batele; mu'yuc to xicham, licuxi to avu'un.

⁴Ti vo'oxuc jun ajolic xchi'uc ti Diose, q'uejintaic q'uejimoletic ta stojol, lequil c'opojanic ta sventa.

⁵Jliquel no'ox ti sc'ac'al yo'ntone; sbatel osil mu xlaj ti yutsil slequil yo'ntone. Mi xij'oc'olet ta ac'ubaltique, xijmuyubaj ta sacubel ti osile.

⁶Ti mu'yuc c'usi jnuptanoje, xichi laj jnope: “J'ech'el mu'yuc buch'u xisjipun ta lum.”

⁷Ta sventa ti yutsil slequil avo'nton une, Dios, j'ech'el mu'yuc stijel ta c'op ti bu laj ava'anune. C'alal laj ajaltabun ti coltaele, tey xa no'ox bat jch'ulel yu'un ti xi'ele.

⁸Xi'oc' xi'avan xa ta atojol un, Dios, xivocolet xa ti xichi ta atojol, Dios:

⁹¿C'usi ta xata o mi lichame, ti poybil xa libat ta muquel une? Ti lum ach'ele mu xa stac' slequil-c'optaot, mi ja'uc xa ta yalel ti alequilal avutsilal une.

¹⁰Dios, a'yibun ti jc'ope, c'uxubajuc avo'nton ta jtojol un, coltaun, Dios.

¹¹Ti xime'inal oq'ue, joybij xa ta muyubajel avu'un; laj xa atamun loq'uel ti oyun ta muc'ul vul-o'ntone, laj xa jlap c'u' avu'un ta sventa ti q'uin une.

¹²Jech o xal un, Dios Cajval, mu stac' ti ts'ijilun no'oxe; ta jq'uejinta q'uejimoletic sventa avich'el ta muc', ta yalel ti colavalbune.