Read Tzotzil Salmos 35 Bible Online

Salmos 35 - Tzotzil bible

Salmos 35

¹Contraino ya'i un, Dios, ti buch'u ta xiscontrainune, tsaco ya'i ta leto ti buch'u ta xilbun ya'i ti jvocole.

²Tsaco lapo ti amacobbaile, la' tic'o aba ta jpojel un.

³Tamo ti alanza une, va'ano aba ta jpojel ta stojol ti buch'u ta xiyilbajine; vinajeso aba ti jpojvanejot cu'une.

⁴Q'uexlaluc xa, jatavuc ech'el ya'iic ti buch'u ta xismilune; q'uexlaluc jatavuc ech'el ya'iic ti buch'u ta xilic ya'iic ti jvocole.

⁵Jechuc c'otuc ta stojolic jech c'u cha'al ti jobel bec'bil ta xbatic ta iq'ue, tenaticuc batel ya'iic yu'un ti yaj'ánjel Diose.

⁶Ic'unebuc, ch'ululuc ta j'ech'el ti sbe xanavique, ilbajinbiluc yu'un ti yaj'ánjel Diose.

⁷Mutsul jsat, laj yac'beicun jpets'al; muts'ul jsat, laj sjoc'beicun jch'enal yo' ta xisjipicun ochel.

⁸Ta jechuc yepal lamluc c'otuc ta sbaic ti yilbajinelique. Ta jechuc yepal ochuc yalel ta spets'al stuquic ti laj spasique. Lamluc c'otuc ta sbaic ti svocolique.

⁹Va'i unbi, ta xlic muyubajcun ta stojol ti Dios une, yu'un c'ot ta pasel ti laj stic' sba ta spojelune.

¹⁰Ta sjunul co'nton xichi ta xcale: “¿Buch'u la xco'olaj xchi'uc jech c'u cha'al ti vo'ot une, Dios? Ti me'un mu'nate, xchi'uc ti buch'u mu'yuc xa c'usi xut sbaique, ta xc'ot ta colel, ta xatic' aba ta spojel ti ilbajinbilic yu'un ti buch'u cajal xa'i sbaique, ti ilbil ti svocolic yu'une.”

¹¹Ta sva'an sbaic ta rextico ti buch'u mu'yuc xch'ulel xa sbaic ta sjac'belun ti c'usi mu xtac' cu'une.

¹²Laj stojbeicun sutel ta chopol ti c'usi lec laj jpasbeique, ti ep ta xcat co'nton yu'un le' une.

¹³Ti ip ta xa'iique, laj jvul co'nton yu'unic, laj jlap lajemal c'u'il, laj jcomtsan cot; mu xquicta jba ta c'opojel ti'inel ta yut co'nton.

¹⁴Oyun ta at-o'nton, mu xa oyucun ta banomil laj ca'i, co'ol s'elan sme'inalil anima jme', mi sme'inalil junuc ti jchi'il ta voq'uel laj ca'ie.

¹⁵Le' une, ti taj to patal lic'ot une, scotolic stse'inic xa ta jtojol, co'ol xa s'elan jun jyanlum laj yilicun ti mu xiyojtiquinique, ti mu x'ech' xjelav laj yilic ti jvocole.

¹⁶Ep laj jta vocol yu'unic, laj slabanicun, spajicun xa ta q'uelel ta sc'ac'al yo'ntonic.

¹⁷¿C'u sjalil ti aq'ueloj no'ox le' une, Cajval? Ma'uc xcac' o jol jbaquil yu'unic, pojun ta yoc ta sc'ob ti loquetel nuc' leonetic le'e.

¹⁸Colaval xacutot ta sba ta sat yepal ti ateclumale; ti c'u yepal oyique, ta sba ta satic ta jlequil-c'optaot.

¹⁹Mu xavac' xc'ot ta pasel ti xmuyubaj liquel ti jcontrae; mu xneletuc xa satic ta sq'uelicun ti ta jech no'ox yepal xti'et ti sjolic ta jtojole.

²⁰Yu'un ma'uc ta sa'ic ti lamajem yo'ntonique, yacal ta snopilanic c'u s'elan ta xaq'uic ta c'abal ti buch'utic ma'uc jliquesej c'op ta muc' ta lume.

²¹Xi ta xalic ti xbet'bun no'ox yeic ta jtojole: “Laj quiltic ta jba ta jsatic ti vi yelanil c'ot une.”

²²Chajal ta aba ta asat un, Cajval. Ma'ucuc ti tsij xachi une. Mu xanamaj ta jtojol un.

²³Va'ano, tec'ano aba, Cajval Dios, tijo avo'nton cu'un. Pojun, va'ano aba cu'un.

²⁴Chapanun, Cajval Dios, ti c'u s'elan xc'ot o ta xavil ti chapanele. Mu stse'inicuc xa ta jtojol ti jcontrataque.

²⁵Ch'ayuc ta be ti xi snopoj ta xalique: “Ja' jech ma' ti oy ta co'ntontic ta jq'ueltic ca'itic le' une. Laj xa quilbetic yuni vocol ta j'ech'el un.”

²⁶Xq'uexlaluc stuc c'otuc ta sba ti buch'utic xmuyubajic xa yu'un ti quilbajinele; xq'uexlaluc stuc c'otuc ta sba ti buch'utic cajal xa'i sbaique, ti mu'yuc jtu ta xiyilique.

²⁷Le' une, ti buch'utic ta sq'uelic ya'iic ti tsalvanem ta xic'ote, mu'yucuc xa c'usi sna'ic, avanicuc ta muyubajel ti mu xlaj ta alel yu'unic ti xiuc yalique: “Jelavem smuc'ul ma' ti Diose, lec ta xa'i ti stauc yutsilal ti yajtunele.”

²⁸Oy ta que ta jti' ta yalel ti lequil chapanel avu'une; scotol c'ac'al ta xcalilan ti alequilal une.