Read Tzotzil Salmos 38 Bible Online

Salmos 38 - Tzotzil bible

Salmos 38

¹Cajval, mu xavutun ta sc'ac'al avo'nton, mi ja'uc xatsitsun ta sti'emal ajol.

²Ts'apal xa ta jtojol ti sni' ayolobtaque; laj xa ayales ti avoc ac'ob ta jtojol une.

³Ti lamal vul ta jtojol ti sc'ac'al avo'nton ta scoj ti jmule, tsacbil ta chamel sjunul ti jbec'tal jtacopale; mu'yuc slequil mi junuc ma' ti jbaquil une.

⁴Abol xa jba yu'un ti jmule; jun muc' ta vocol ti mu xcuch cu'une.

⁵Ta scoj ti bolinebun yu'un ti jpimile, oy stuil sc'a'emal ti jyayijemale.

⁶Scotol c'ac'al, oyun ta at-o'nton, ic'uneb ti osil banomil ta xca'ie, pajal xa ti jol yu'une.

⁷Xtiltun ta xti'van ti jpate; tsacbil ta chamel sjunul ti jbec'tal jtacopale.

⁸Coquijemun ta xca'i ta j'ech'el, mu'yuc xa yipal ta xca'i un; xi'aj un ta scoj xmich'et xc'uxul ti co'ntone.

⁹Dios, xavojtiquin scotol ti yatel co'nton ta atojole, mu'yuc macal ta aba ta asat ti jic' xa co'ntone.

¹⁰Xbitbun xa ti co'ntone, ta xa xic'unib, tal xa lumal toc ta jsat un.

¹¹Ti buch'utic lec xquil jba xchi'uque, xchi'uc ti cuts' calaltaque, nom xa va'ajtic ta xq'uelvanic talel ta scoj ti jyayijemale.

¹²Ti buch'u ta smilun ya'iique, sa'ic xa c'u s'elan ta xilaj o; ti buch'u ta xilbun ya'iic ti jvocole, slo'iltaic xa ti c'otcun ta tsutsele, ti scotol ora snopilan xa ta spayel ti c'ope.

¹³Le' une, ta jpas jba ta cocorix, co'ol s'elan mu xca'i yilel, uma' un yilel, mu xic'opoj.

¹⁴Co'ol j'elan yilel jech c'u cha'al ti buch'u mu xa'i c'oponele, mi jbeluc oy c'usi ta xloc' ta ye ta spaquel ti sc'oplale.

¹⁵Jmalaoj xa no'ox ca'i un, Cajval, Ch'ul Dios, ti vo'ot xatac'be sutel ti sc'opique.

¹⁶Ta jc'an ta atojol un, ti mu stse'inic ta jtojole, ti mu scaj'alic ti cuch xa yu'unic mi mu xa cha'bel jtam jba liquele.

¹⁷Xaval ya'yele, melel mu xa cha'bel jtam jba liquel, yu'un stsacoj yip ti yipal xc'uxul ta jtojole.

¹⁸Ta jam ta yalel ti jmule, yu'un mu xac' jun co'nton ta xca'i.

¹⁹Epaj ta j'ech'el ti jcontrae; yepal ta j'ech'el ti jeche' no'ox xti'et sjolic ta jtojole.

²⁰Ta jtoj ta jol yu'unic ti c'usi lec laj jpasbeique; yu'un oy ta co'nton ta spasel ti c'usi lec une, ta scontrainicun o xchi'uc.

²¹Cajval, mu xavictaun comel jtuc. Ch'ul Dios, mu xanamaj batel ta jtojol.

²²Jcoltavanej, Ch'ul Dios, ta jech yepal un, la' tic'o aba ta jcoltael.