Read Tzotzil Salmos 41 Bible Online

Salmos 41 - Tzotzil bible

Salmos 41

¹Mu'yuc c'usi sna' ta j'ech'el ti buch'u ta stic' sba ta scoltael ti buch'u mu'yuc c'usi xut sbae, xchi'uc ti me'un mu'nate; ti yorail ta xvul ta loq'uel ti ep ta tos vocole, ta xpoje yu'un ti Diose.

²Q'uelbil, chabibil, ac'bil xcuxlej yu'un ti Diose, xmuyubaj no'ox ta x'ech' ta banomil; ti c'usi xtal no'ox sjol ta spasbat yu'un ti scontrae, mu q'uelbilic no'ox.

³C'alal puch'ul ta svayeb xchi'uc ti svocole, ta x'ac'bat yip yu'un ti Diose; ti xchamele, ta xjoybinbat ta slequilal.

⁴Xichi laj cal une: “C'uxubajuc avo'nton ta jtojol un, Dios, colesun, manchuc mi jun spimil ti jmul jtaoj ta atojol une.”

⁵Ti jcontrataque xi s'elan ta sq'uelic ya'iic ti juch'tsajcun ta j'ech'ele: “¿C'usi to ora ta xcham ti ch'ab xi sc'oplal ti slo'il ya'yejale?”

⁶Ta xtal sq'uelicun un, yan ti sjol yo'ntonique; bejel ta yo'ntonic scotol ti c'usi mu'yuc stuq'uile, yeinojic xa ta yalel ti ta xloq'uic batel ta bee.

⁷Ti buch'u xti'et sjolic ta jtojole, svol xa sbaic sbiselun ta cotol chaval; ti snopilanic xa ti ta scoj jmul ta xquich' ti jvocole,

⁸ti xi ta xalique: “Yabtel pucuj ma' ti xchamel staoj le'e; puch'tsajem xa ta svayeb, mu xa cha'bel stam sba liquel.”

⁹Joybij ta jcontra yilel un, ma' ti buch'u lec xquil jba xchi'uque, ti laj jnop mu yanuc yo'nton ta jtojole, ti jmoj live'cutic xchi'uque.

¹⁰Le' une, c'uxubajuc avo'nton ta jtojol un, Dios, va'tsanun liquel ta spacbel sutel ya'iic.

¹¹Ta jna' unbi ti lec xavilune, ti xi s'elan ta xc'ot ta pasel avu'une; ma'uc ti stse'in xlabaj xa ti jcontra ti tsalbil xa lic'ot yu'une.

¹²Le' une, ti jech mu'yuc jsoquesoj jc'oplal ti li' cuxulune, tamun liquel un, icun japun ta avoc ta ac'ob, ta aventauc ti oyucun ta atojole.

¹³Lequil-c'optabiluc ta j'ech'el ti Ajvalil Dios yu'un ti Israele, tana li'e, jechuc o ta x'albat sbatel osil. Jechuc.