Read Tzotzil Salmos 44 Bible Online

Salmos 44 - Tzotzil bible

Salmos 44

¹Ch'ul Dios, c'otem ta jchiquincutic ti laj yalbuncutic ti jtot jme'cutic ti cuxulic to oxe, ti xi s'elan laj apas ta vo'nee:

²Ta ac'ob, laj ajip laj aten loq'uel ti buch'utic yan yajvalique; laj avac'be svocol ti muc'tiquil lumetique, laj atic' ochel ta naclej ti jtot jme'cutic ti bu taje.

³Laj yu'ninic ti banomile, ti tsalvanem c'otique; ma'uc ta sventa yip ti yoc sc'obique, mi ja'uc ti yespadaique. Laj yu'ninic un ta sventa ti amuc'ul atsatsale xchi'uc ti yipal avu'une, ta sventa ti xchijlajan no'ox ti axojobale, ti mu tenbaj tuch'baj ta avo'nton ta xava'ie.

⁴Ti Ajvalilote, ti Diosot cu'un une, jtsalvanej c'ot avu'un ti ateclumale.

⁵Ta aventa tsalbil c'ot cu'uncutic ti jcontracutique; ¡ta aventa ti juel no'ox ta teq'uel ta xcac'becutic ti buch'u ta xistsacuncutic ta letoe!

⁶Ma'uc ta sventa jyolob, mi ja'uc ta sventa quespada ta jpat co'nton ti tsalvanem ta xic'ot xchi'uque.

⁷Ta aventa ti tsalbil c'ot cu'uncutic ti jcontracutique, ti aq'ueic ta lo'il maxil ti buch'u xti'et sjolic ta jtojolcutique.

⁸Ta aventa un, Ch'ul Dios, mu'yuc xa buch'u jech xtaun o ta xca'icutic, mu xquicta jbacutic ta slequil-c'optaelot une.

⁹Ta xquilcutic ti bajbiluncutic avu'une; laj avac' ti nijil chimil lic'otcutic ta q'uexlale. Mu'yuc xa ta xachi'inuncutic loq'uel xchi'uc ti cajsoldadocutique.

¹⁰Laj apas ti ca'binoj xa no'ox jbacutic yu'un ti cajcontracutique; ti buch'u xti'et sjol ta jtojolcutique, ta xiyelc'anbecutic ti c'usi xal yo'ntonique.

¹¹Co'ol j'elancutic chijetic laj avac'uncutic ta c'abal ti tsobbil ta xbat ta smilobile; tan puc libatcutic avu'un ta stojol ti jyanlumetique.

¹²Mu'yuc stu laj avil ti ateclumale, tsulul laj achon ta j'ech'el; mu'yuc xloc' venta avu'un ti laj achon batel une.

¹³Ti'oltabil lic'otcutic avu'un ta j'ech'el; ti jlac'nacutique mu xilbuncutic ti jsatcutique, lic'otcutic yu'un ta j'ac'-lo'il-maxil.

¹⁴Labanbiluncutic yu'un ti jyanlumetique; sjimolan xa sjolic ta slabaneluncutic ti c'alal ta xiyiluncutique.

¹⁵Mu'yuc ta ilel ti oy bu jliqueluc ti mu'yuc nijil chimilun ta q'uexlal yu'un ti pech'el ta teq'uele,

¹⁶ja' ta scoj ti jcontratac ti mu xiyilbun ti jsate, ti pojbil elc'anbilun yu'une.

¹⁷Ti jech c'ot ta jtojolcutic le' une, ma'uc ta scoj ti laj jch'ayot ta co'ntoncutique, mi ja'uc ti oy bu laj jtencutic comel ti atratee.

¹⁸Mi ja'uc oy bu laj jtenotcutic comel, mi ja'uc oy bu laj jch'ac jbacutic ti bu atamoj batele.

¹⁹Le' une, laj xa avac'uncutic ta tsalel ti bu xa spajebal o ti vocole. Ic'uneb ta j'ech'el ti osil banomil ta jtojolcutique.

²⁰Ti lajuc xa jch'ayotcutic ta o'ntonale, Dios, ti lajuc xa jbic'tajes jbacutic ta yich'el ta muc' ti yan diosetique,

²¹laj avil ti jechuque, xavojtiquin lec ti bu mu xa xvinaj ta q'uelel une.

²²Le' une, ta sventa ti chapal ono'ox jc'oplalcutic ta aventae, co'ol s'elan chij ti jc'oplalcutic ic'bil ta xbat ta smilobile.

²³Julavan un, ¿c'u cha'al ti vayalot no'ox un, Dios? Julavan un, julavan xch'a un. Mu xatenuncutic ta j'ech'el un.

²⁴¿C'u cha'al ta xanac' aba un? ¿C'u cha'al ta xach'ayuncutic ta avo'nton ti liquel cajal no'ox ti vocol ta jtojolcutique?

²⁵J'ech'el pec'tsanbiluncutic xa, mu'yuc xa c'usi xcut jtam jbacutic, naca xa squiiloj sba ta banomil ti lum ach'el cu'uncutique.

²⁶Va'lan, tec'lan un, la' pojuncutic, coltauncutic ta sventa ti syail xc'uxul avo'nton une.