Read Tzotzil Salmos 49 Bible Online

Salmos 49 - Tzotzil bible

Salmos 49

¹A'yio ava'iic li'e, jteclumetic, jnaclejetic ta scotol banomil,

²jech c'u cha'al ti jc'ulejetique, xchi'uc ti me'un mu'natetique, jech c'u cha'al ti cajal xa'i sbaique, xchi'uc ti biq'uit yac'oj sbaique,

³ta xic'opoj ava'i ta sventa ti jbijile, ta yalel ti chucul ta a'yiel c'u s'elan jnopoje,

⁴lic xa jts'etan jchiquin yu'un ti xi x'ale ti c'ope, xlomet xa xchi'uc svobal ti c'usi chucul ta a'yiel ta xcale.

⁵¿C'u la cha'al ta xixi' yu'un ya'yel un, c'alal ta xvul ta loq'uel junuc c'ac'al ti c'usi chopole, ti volibilun yu'un xchopolalic ti jcontrataque?

⁶Ti stuquique spatoj yo'ntonic ta sc'ulejalic; cajal xa xa'i sbaic ti c'usi oy yu'unique.

⁷Mi junuc oy buch'u stac' ta spoj sba ta stuc no'oxe, mi jutebuc stac' stojbe Dios ti tselbujuc ti stsutsesele.

⁸Mi junuc oy buch'u stac' sman o xcuxlejal xchi'uc ti staq'uine,

⁹ti xcuxi o sbatel osil yu'une, ti mu xil chamel lajele.

¹⁰Xvinaj scotolic ti co'ol ta xchamique, ti buch'utic oy sbijilique, ti mu'yuc sbijilique. Yan xa ti buch'u ta x'ich'bun comel ti sc'ulejalique.

¹¹Ac'o mi laj sbiinbe sbiic ti slumalique, ta xc'ot ta sna sbatel osil ti muquinale, j'ech'el com o ti bu taje.

¹²Ma'uc sventa sbatel osil talem ti vinique; manchuc mi toj ech'em no'ox ti sc'ulejale, ta xchamic jech c'u cha'al ti chon bolometique.

¹³Jech ta xc'ot ta stsutsel ti buch'u mu xcham ta xalbe sbae; jech ta xc'ot ta stsutsel ti buch'u ta xac' sba ta ich'el ta muq'ue.

¹⁴Macbilic ech'el yu'un yajval lajebal ti jnaclejetic taje, co'ol s'elan junuc jq'uel-chij tuc' ta x'iq'ueic batel ta smilobilic jech c'u cha'al junuc ti chije. Ti ta yoc'omal une, tsalbil ta xc'otic yu'un ti buch'utic lec sjol yo'ntonique; yacal ta tsutsel ech'el ti yip smuc'ul stsatsalique, ta xc'ot ta snaic ti muquinale.

¹⁵Ti Diose ta xiyic'un batel un, ta xispojun yo' mu xistsalun ti lajebale.

¹⁶Mu xyanij ajol yu'un ti buch'u cajtsajem xa ech'el xchi'uc ti sc'ulejale, ti jelavem yutsilal ti snae.

¹⁷Ti ta sta yorail ta xchame, mu'yuc c'usi ta xich' batel un; mu tijiluc ta xbat ta muquinal ti c'usi c'upil sba oy yu'une.

¹⁸Manchuc mi xmuyubaj laj ya'i ti cuxul to oxe, ti ich'bil ta muc' yu'un jnaclejetic ti jc'ulej xa'i sbae,

¹⁹ta xc'ot sc'ac'alil un ti ta xchame, mu xa xil ti saquilal osile.

²⁰Ma'uc sventa sbatel osil talem ti viniquetique; manchuc mi toj ech'em ti sc'ulejale, ta xcham ta xlaj jech c'u cha'al ti chon bolometique.