Read Tzotzil Salmos 5 Bible Online

Salmos 5 - Tzotzil bible

Salmos 5

¹Cajval, Ajvalilot, Diosot cu'un, ts'etano ani' achiquin yu'un ti jc'ope, bainbun un ti xi'oc' xi'avane.

²A'yibun ti xivocolet une, Ch'ul Ajvalil. Ti jech Diosote, ta xic'opoj xiti'in ta atojol.

³Sob xa no'ox, ts'eteluc ani' achiquin ta ya'yiel ti jc'opojel jti'inele; sob ta j'ech'el, ta jchapbot ava'i talel ti c'usitic ta xc'ot ta jtojole, ts'ijil xa ta jmala ti ta xatac'bun talele.

⁴Ma'uc jun Diosot ti lec ta xava'i ti c'usi chopole; mu xu' xnaqui ta atojol ti buch'u mu'yuc xch'ulel xa'i sbaique.

⁵Mu xavac' ochuc ta atojol ti jtoyobbaetique; soquet ajol yu'un ti buch'u mu'yuc xch'ulel xa'i sbaique.

⁶Ta xatubbe sc'oplal ti jutc'opetique; ta xajip xaten ti jpayc'opetique, ti jmilvanejetique.

⁷Ja'uc ti vu'une xu' xi'och ta ach'ulna ta sventa ti mu albajuc ti syail xc'uxul avo'ntone; ta sjunul co'nton ta xaquich' ta muc' ti jq'ueloj batel ti ach'ulnae.

⁸Cajval, ti ta xilbun ya'i jvocol ti cajcontrae, ac'bun un cha'e ti yutsil slequil ajole, tojobtasun ta stamel batel ti lequil tuq'uil bee.

⁹Mi ja'uc jamal ta xalic ti c'usi ta xloc' ta alel yu'unique; soquem ta j'ech'el ti yo'ntonique. Co'ol to s'elan xch'enal anima sjoplej ti c'usi ta xloc' ta alel yu'unique; xbet'bun no'ox ta j'ech'el yeic ta sjutel ti c'ope.

¹⁰Ac'bo ya'iic stojic un, Ch'ul Dios. Cajaluc c'otuc ta sbaic avu'un ti c'u s'elan scaj-chapojique. Jipbil tenbiluc avu'un ti yepal no'ox ti smulique, yu'un laj xa scontrainot.

¹¹Muyubajicuc no'ox ti buch'u ta sa' spojel ta atojole. Q'uejinicuc no'ox ta muyubajel, yu'un vo'ot atic'oj aba ta xchabiel. Ti buch'utic mu tuch'baj xaya'i ta yo'ntonique, xmuyubajic no'ox ta aventa.

¹²Ja' yu'un un cha'e, Dios, va'ano aba ta xc'uxubinel ti buch'utic jun yo'nton ta atojole; volibilicuc yu'un ti slequil yutsil avo'nton jech c'u cha'al ti macobbaile.