Read Tzotzil Salmos 50 Bible Online

Salmos 50 - Tzotzil bible

Salmos 50

¹Ti Ajvalil Dios yu'un ti diosetique, c'opoj xa; laj xa svol talel ti jnaclejetic ta banomil ti oyic ta sloq'ueb c'ac'ale, ti oyic ta smaleb c'ac'ale.

²Ta Sión to xtixlajan xojobal ti Diose, ti c'upil sba jteclum yu'une.

³Mu ts'ijiluc ta xtal ti Diose, xi s'elan ta xvul ta loq'uele: jba'be talel yu'un ti jtsutsesvanej c'oq'ue, ti joyobtabil ta jun banomilal vo' xchi'uc yic'ale.

⁴Xi s'elan ta toyol to bu oy ti Diose, ta xavta ti oyic ta vinajele, ti oyic ta banomile, ta xac'be yilic c'u s'elan ta xchapan ti steclumale:

⁵“Volic talel ta jtojol ti buch'u jun yo'ntonique, ti buch'utic laj spasic strateic ta jtojol c'alal laj yac'beicun ti milbil matanale.”

⁶Yu'un ti oyic ta vinajele, jamal ta xalic ja' jun lequil jchapanvanej ti Diose.

⁷“Chiquinta o ava'i li'e, Israel, calab jnich'nab, sc'an ti jamal ta xcal ava'iic ta atojolique. Vu'unun ma' ti Diose, ti Diosun avu'unique.

⁸Mu'yuc ta jajantaot yu'un ti milbil matanaletique, xchi'uc ti chic'bil matanaletic ta xavac'beicune.

⁹Mu'yuc ta jc'anbot ti ch'in vacaxetic ti ta svoq'ues ti avacaxique, mi ja'uc ti ch'in tentsunetic lapal ta acorralique.

¹⁰C'otem ta cu'untac scotol ti colemal chon bolometique, jech c'u cha'al ti te'tical vacax oyic ta vitstique.

¹¹C'otem ta cu'untac ec ti mutetic xvilte-vilte ta muc'tic te'tique, xchi'uc scotol ti xnechet ta osiltique.

¹²Mu ta xcalbot ava'i mi ta xivi'naje, cu'un ti banomil xchi'uc scotol ti c'usi oy ta stojole.

¹³¿Mi xavac'touc ta jmalq'uin jba xchi'uc sbec'tal ti tot vacaxetique? ¿Mi ta xcuch'be xch'ich'el ti tot tentsunetique?

¹⁴Ti matanal ta xavaq'ue, sventa colaval, xavut ti Diose, ti c'otuc ta pasel avu'un ta stojol ti Buch'u oy ta toyole, ti avaloj ta xavac' ta stojole.

¹⁵Taun ta c'oponel ta ti'inel ti c'alal oy c'usi chopol ta xc'ot ta atojole, ta jtic' jba ta apojel, ja' to jech ta xlic alequil c'optaun.”

¹⁶Xi ta x'albat yu'un Dios ti buch'u mu'yuc xch'ulel xa'i sbae: “¿Buch'uot la avaloj aba ya'yel ta yalilanel ti c'usi jbel tsots albil cu'une, mi ta yalilanel ti jtratee,

¹⁷ti mu lecuc ta xava'i ti ta jtojobtasote, mi ja'uc xavac' ta venta ti jc'ope?

¹⁸Ti j'eleq'ue, xatsacbe xa aba ac'obic xchi'uc une; jmoj xa xavoletic xchi'uc ti jmulivajeletique.

¹⁹Ta spasel ti chopole, ta snopel ti jutbil c'ope, xbet'bun liquel ave ta yalel une.

²⁰Xatic'be xa smul ti avinquilele; xasoquesbe xa yo'nton ti achi'iltac ta voq'uele.

²¹Ti va'i yepal apasoj taje, ts'ijilun yu'un; laj anop co'olun jech c'u cha'al ti vo'ote. Le' une, ta aba ta asat ta xcal ti c'usi laj apase, ta jchaptic lec ava'i un.

²²“A'yio ava'iic lec li'e, ti xi s'elan ta xc'ot ta stojolic ti buch'u laj xa xch'ay ta yo'ntonic ti Diose, naca mi xlic jsesinta ti mu'yuc buch'u stic' sba ta apojelique:

²³Ti buch'u ta xac' matanal ta sventa col'albate, ta xich'un ta muc' unbi. Ta jtic' jba ta spojel ti buch'u staoj yav stamoj batel ti bu ta xquic' batele.”