Read Tzotzil Salmos 55 Bible Online

Salmos 55 - Tzotzil bible

Salmos 55

¹A'yibun ti jc'opojel jti'inel une, Dios, mu aq'uelojuc no'ox ti xivocolete.

²Tsaco ich'bun ti jc'ope; tac'bun talel ti jc'opojel jti'inel une, yu'un ilbajinbilun.

³Ta sc'opic no'ox xinicnun ta xi'el yu'un ti jcontrataque, xchi'uc ti x'avlajetic no'ox ti buch'u mu'yuc xch'ulel xa'i sbaique. Lamal ta jba yu'unic ti ilbajinele; ta scapemal xa sjolic ta xistsaquic ta c'op.

⁴Xbitbun xa ta xca'i ti co'nton yu'un ta j'ech'ele; lamal xa c'ot ta jba xi'elal ti lajele.

⁵Li'alub yu'un ma' ti xi'elal une; ¡xinicnun xa yu'un ta j'ech'el!

⁶Xichi laj cale: “Ti oyuc la jxic' jech c'u cha'al ti paloma une, xivilet no'ox batel unbi yo' mu xca'ibe ti xi'elale.

⁷Xivilet no'ox batel ta nom; ta xinaqui ta sbajtical banomil un.

⁸Xivilet no'ox batel ta anil, ta snaq'uel jba ti xvo'o'et no'ox ti iq'ue, ti banomilal vo'e.”

⁹Cajval, tsutsesbo sc'oplal ya'iic, stsacuc sbaic ta c'op stuquic ti c'u s'elan xchapojique, yu'un xvoletic no'ox ta ilbajinvanej ta xquil, ti stsacvanic no'ox ta c'ope,

¹⁰ti c'ac'al ac'ubal xvoletic no'ox ta spa'iel ti jteclume, c'ajomal no'ox sjolinojic ta spasel ti c'usi chopole, ti soquesvaneje.

¹¹Ti ta calleetic yu'unique, snailal ilbajinel xchi'uc lo'lael.

¹²Ti ja'uc laj soquesbun co'nton ti jcontrae, le'e, sts'ic cu'un; ti ja'uc laj syales yoc sc'ob ti buch'u xti'et ti sjolic cu'une, le'e, xu' to jq'uej jba ech'el ta stojolic un.

¹³Le' une, vo'ot la'abolaj ti c'alal jmoj oyotique, ti spajeb lec xquil jbatique,

¹⁴ti jmoj xijvolet ta xch'ulna ti Diose, ti jun xa ti jlo'il ca'yejtique, ti jmoj ta xijxanav ta stojol ti epal jnaclejetique.

¹⁵Ch'ayal yo'nton taaticuc yu'un slajelic ti jcontratac une. Cuxul jip xiicuc ochel ta muquinal, yu'un me'inem ta yo'ntonic ti naca chopole.

¹⁶Le' une, ta jc'anbe vocol ti Diose; ti Ajvalil une ta stic' sba ta spojelun.

¹⁷Ta jc'an parte, ta xi'oc', ta sob, ta smalil c'ac'al, ta ac'ubaltic, ta xa'ibun ma' ti jc'op une.

¹⁸C'alal xyaquet ti letoe, ta stic' sba ta jpojel, manchuc mi ep ta j'ech'el ti jtsacvanej ta c'ope.

¹⁹Ti Dios jpas-mantal sbatel osile, ta xchiquintabun ti jc'ope; ta spec'tsanbe ti sc'oplalique, yu'un mi jutebuc sjelta ti yo'ntonique, mi jutebuc ta xi'taic ti Diose.

²⁰Syales no'ox yoc sc'obic ta stojol ti buch'u lec xil sbaic xchi'uque; mu xc'ot ta pasel yu'unic sc'opic ti laj yalic j'ech'el mu sten sbaique.

²¹X'olet xa yutsil sjubemal ta lajesel ma' ti c'usi ta xalique, le' une, naca letovajel sna' ma' ti snopbenal yu'unique. Mu xa c'usi jech o yutsil ta a'yiel ti sc'opique, ti c'alal ja' jun juxbil espada ta xac' ta j'ech'el une.

²²Ac'bo sbain Dios ti xvulvun no'ox avo'ntone, yu'un staoj yav yicojot ti stuque; mu sq'uelojuc ta xyal ta lum ti buch'u ta xch'unbe ti sc'ope.

²³Ch'ul Dios, mu xcuxi ma' ti jmilvanejetique, ti jutc'opetique, mu sta o'lol xch'iel sc'opojel ta xcham xlajique; ta xbat avu'un ta snatil ti muquinale. Ti vu'un une jpatoj co'nton ta atojolal.