Read Tzotzil Salmos 57 Bible Online

Salmos 57 - Tzotzil bible

Salmos 57

¹ C'uxubajan cu'un un, Dios, c'uxubajan cu'un un, ta jsa'ilan jpojel ta atojol. Ta jpoj jba ta yolon avaxinal un, ja' to mi ech' ti vocole.

²Xivocolet no'ox ta stojol ma' ti Dios oy ta toyol une, jcoltavanej ta scotol ma' ti Dios cu'un une.

³Ta vinajel to, ta xtal ti syail xc'uxul yo'ntone, ti melel xale; ta xispojun ta yoc ta sc'ob ti buch'u ta scapemal sjol mu ch'anuc xiyutique.

⁴Bitsilun xa ta banomil, c'otemun jech c'u cha'al ti buch'u ta xti'e ta jti'oval león ti volibil xae, co'ol s'elan mi sni' lanza, mi sni' yolob ti stanal yeique, ti co'ol s'elan juxbil espada ta bet'bunel ti yeique.

⁵Cajval Dios, oyot ta vinajel ti oy ta toyole, smacoj sjunlej banomil ti alequil avutsilale.

⁶Laj yac' jpets'al ti jcontrataque yo' jech ta xi'och ta be yu'unic; ti bu ta xi'ech'e, laj sjots'ic ch'en, baj yalel stuquic ma' ti bu taj une.

⁷Jtsinanoj co'nton ta atojol un, Cajval Dios; chapalun xa ta sq'uejintael q'uejimoletic ta atojol.

⁸Julavan xa un, jch'ulel canima. julavan ec un, arpa, jchop o ta vob; naca to ta sacub talel osil ta xijulav.

⁹Ta sba ta sat ti jteclumetic une, Dios, xchi'uc ti muc' ta lumetique, ta jlequil-c'optaot ta sventa ti q'uejimoletic une.

¹⁰Ti syail xc'uxul avo'ntone, j'ech'el c'otem c'alal to vinajel; c'otem ta yaxts'ijan vinajel ti stuq'uil avo'ntone.

¹¹Cajal c'otem ac'oplal ta vinajel un, Cajval Dios. Nojem ta sjunul banomil ti alequil avutsile.