Read Tzotzil Salmos 59 Bible Online

Salmos 59 - Tzotzil bible

Salmos 59

¹ Cajval Dios, pojun ta yoc ta sc'ob ti jcontrataque, coltaun un ta stojolic ti jsa'-c'opetique.

²Tic'o aba ta jpojel ta stojol ti buch'u yan sjol yo'ntonique, pojun ta yoc ta sc'obic ti jmilvanejetique.

³Yu'un yepal ti buch'u cajal xa'i sbaique, ti smaloj xa yorail ta xismilique.

⁴Mu cajaluc xca'i jba, mi ja'uc jtaoj jmul, mu'yuc c'usi chopol jpasoj, Cajval. Manchuc mi jech un, yac'ojbeic ono'ox yipal ta stsaquicun ta c'op. Va'lan, tec'lan cu'un un, la' nupun ta be, q'uelo avil ti c'u j'elane.

⁵Dios ti scotol xu' avu'une, Diosot yu'un ti Israele, va'lan, tec'lan un, tsitso ya'i ti buch'u yan yajvalique; mi jutuc xc'uxubaj avo'nton yu'un buch'u jpay c'op ti mu'yuc xch'ulel xa'i sbaique.

⁶Xvochetic no'ox ta sutic talel ta ac'ubaltic jech c'u cha'al junuc ts'i' ta sjoyobtael ta xaniel ti jteclume.

⁷Xvajet no'ox svoc yeic, xcapetic xa xi ta xalique: “Mu'yuc buch'u xijya'iotic ma' li' une.”

⁸Le' une, xatse'in no'ox ta stojolic un, Dios; xalabaj no'ox ta stojol ti buch'u yan yajvalique.

⁹J'ech'el chabibilun avu'un, Dios Cajval, c'otemot ta jnac'obbail, ta jpojobbail.

¹⁰Ti mu xistuch' ta yo'nton ti Diose, ta xtal snupun ta be; ta xquil ta jba ta jsat yu'un ti tsalbil ta xc'ot ti jcontrataque.

¹¹J'ech'el mu xc'uxubaj avo'nton yu'un yo' jech mu xch'ay ta yo'nton ti jteclumale, tan puc batuc avu'un ta sventauc ti amuc'ul atsatsale, c'oticuc ta j'ac'-lo'il-maxil avu'un. Jpojvanej cu'untic ma' ti Dios une.

¹²Scotol ti c'usi ta xalique, ta sta o smulic; lamaluc c'otuc ta sbaic ti stoyobbailique, ti mu xc'ot xc'opojique.

¹³Ta sc'ac'aluc avo'nton, tsutseso, ch'aybo sc'oplal ta j'ech'el un. Tubuc ta j'ech'el ti sts'unubalique. Yich'uc na'el, ti Ajvalile, ja' Dios yu'un ti Jacobe, xchi'uc ti bu xa jujuti' oy ti banomile.

¹⁴Ti jcontrataque, co'oluc s'elan ts'i' vajvunuc ta ac'ubaltic ta sjoyobtael ti jteclume,

¹⁵ti yalel muyelicuc ta sa'el ti sve'elique, ti mu xnoj lec ti xch'utique, ti xme'inal oq'uic ta x'ech' yu'unic ti ac'ubaltique.

¹⁶Ja'uc ti vu'un une ta jq'uejintaot c'alal ta sacub talel ti osile; jam xa que ta yalel ti syail sc'uxul avo'ntone, ti amuc'ul atsatsale, yu'un c'otemot ta jpojobbail, ta jnac'obbail c'alal ta xquich' ilbajinele.

¹⁷Ta jq'uejinta q'uejimoletic ta atojol, Cajval Dios, c'otemot ta jpojobbail, ta jnac'obbail, yu'un mu xituch' ta avo'nton ti vo'ot une, Dios.