Read Tzotzil Salmos 62 Bible Online

Salmos 62 - Tzotzil bible

Salmos 62

¹C'ajomal no'ox ta stojol Dios ta jta ma' ti lamajem co'ntone; ti jpojel jcoltaele ta xlic talel ta stojol.

²C'otem ta jcoltavanej, ta jchabivanej cu'un. Mu xiyal ta lum, yu'un c'otem ta jnac'obbail.

³¿C'usi to ora ta xavicta abaic ta stsaquelun ta c'op ti vo'oxuque, ta sjipelun yalel co'ol j'elan jun pac'bal ta xa xlom ya'ie, jun moc ti lomel xa mu ta xlome?

⁴Yu'un c'ajomal no'ox xnopnun ta sjolic ta xisjipicun ta lum; lec xa xa'iic sjutel ti c'ope. Yilele, jun xa yutsil ma' ti ye sti' ta jtojole, sbisicun xa ta cotol chaval ta yut yo'ntonic un.

⁵C'ajomal no'ox ta stojol Dios ta jta ma' ti lajemuc co'ntone; ta stojol ta xlic talel ma' ti spatobil co'ntone.

⁶Ta xiscolta, ta xisnac'un un, mu xiyal ta lum, c'otem ta jnac'obbail.

⁷Ti jcoltaele, ti quich'el ta muq'ue, ta xlic talel ta stojol ti Diose, yu'un c'otem ta jpojobbail jnac'obbail.

⁸Jteclumaltac, pato avo'ntonic ta stojol un. Ta sjunuluc avo'ntonic, c'opojanic, ti'inanic ta stojol, yu'un c'otem ta jpojobbailtic ma' ti Dios cu'untique.

⁹Ma' ti jmojuc ta xich' bisele, co'ol no'ox sba, manchuc mi c'ulej, mi me'un, yu'un naca yeilal no'ox yu'unic ti buch'uuc no'oxe.

¹⁰Mu xapat xa avo'nton yu'un ti tsatsal vinic xava'i abae, mi ja'uc ta xrioxinel ti elc'ajele yo' jech ta xac'ot ta c'ulej. Mi laj ata ti caj tsacal xava'i abae, mu xapat avo'ntonic yu'un ti taq'uine.

¹¹Oy bu xi laj yalilan Dios ti c'opoj talel laj ca'ie: ti muc'ul tsatsalile, ti syail xc'uxul o'ntonale, liquem talel ta stojol ti Diose, xchi'uc jujun ta stojbe ti c'u s'elan laj xa spasique.