Read Tzotzil Salmos 63 Bible Online

Salmos 63 - Tzotzil bible

Salmos 63

¹ Dios, c'otemot ta Cajval un. J'ech'el tsots ac'oplal ta jsa'ot, taqui ti'il xa ta xca'i oyun ta atojol; sjunul jch'ulel canima ta jc'an ti oyan ta jtojole, co'ol s'elan jun taqui banomil ti mu bajuc ta vo'e, ti mu'yuc xa c'usi maquibaje.

²Ta jc'an ta jq'uelot ta xquilot ca'i ta ach'ulnae yo' jech ta xquil ti amuc'ul atsatsale, ti avutsilale.

³Ti syail xc'uxul avo'ntone, tsots sc'oplal ta j'ech'el, ja' mu sta ti ch'iel c'opojele. Ta jlequil-c'optaot yu'un ti que jti'e.

⁴Ti c'u sjalil cuxulune, ta jlequil c'optaot ta j'ech'el; jnub coc jc'ob ta c'opojel ti'inel ta atojol.

⁵Ta jta ti jun co'nton une, jech c'u cha'al junuc ti buch'u ta sta lec yo'nton scotol yu'un ti lequil ve'lile, ximuyubaj no'ox ta jlequil-c'optaot yu'un ti que jti' une.

⁶C'alal puch'ulun ta x'ech' ti jujun ac'ubale, ta jvulesot ta co'nton.

⁷Yu'un vo'ot ti jcoltavanejot cu'une; ¡ximuyubaj no'ox ta j'ech'el un ti oyun ta yolon aqueoval avaxinale!

⁸Nabal ta atojol ti jcuxlej une; nitbilun avu'un ta abats'i c'ob un.

⁹Ti buch'u oy ta yo'nton ta xismilune, j'ech'el ta xbatic ta muquinal.

¹⁰Yu'un ta xlajic ta milel ta espada, ta xbaleic ta ti'el yu'un ti oq'uiletique.

¹¹Le' une, ti ajvalile xmuyubaj no'ox ta stojol ti Diose. Scotol ta xq'uejinic ti laj sva'an sbaic ta rextico ta stojole, ja'uc ti buch'utic ta sjutic ti c'op une, macbil ye sti' ta xc'otic.