Read Tzotzil Salmos 65 Bible Online

Salmos 65 - Tzotzil bible

Salmos 65

¹Ch'ul Dios yu'un ti Sione, ac'otebal o ti lequil c'optabilote; ac'otebal o ti mu stselbuj sc'oplal ti albilot ti oy c'usi ta xavich' ac'bele,

²yu'un ts'etel achiquin ta xava'i ti c'opojel ti'inele. Scotol banomil ta xtal ta atojol un.

³Yu'ninojuncutic ti jpochanilcutique, le' une, ta xach'ay ti jmulcutic une.

⁴Xmuyubaj no'ox ti buch'u laj at'uje, ti buch'u nopol ta xavac' nacluc ta ats'el ta jujunaetic ta ach'ulnae. Yepaluc jtacutic ti lecuc oyuncutic ta ana ta sventa ti yutsilal slequilal ti ach'ulnae.

⁵Jcoltavanej Dios cu'uncutic, ch'ayal no'ox ta xc'ot o'ntonal ti c'u s'elan ta xatac'buncutic talel c'alal ta xatic' aba ta jpojelcutique. Scotol banomil spatoj yo'ntonic ta atojol, xchi'uc ti buch'utic oyic ta jot to nabe.

⁶Yu'un staoj yav va'al ti vitsetic ta sventa ti amuc'ul atsatsale, ti yipal avu'une.

⁷Ta xapajes un ti xvo'o'et no'ox ti nabe, ti xvochvun no'ox ti jnaclejetique.

⁸Ti bu xa oyic ti jnaclejetic ta jujuti' banomile, ta xniquic yu'un ti c'usitic ch'ayal o'ntonal ta xc'ot ta pasel avu'une. Ta aventa un, x'avanic no'ox ta muyubajel ti oyic ta sloq'ueb c'ac'ale, ta smaleb c'ac'ale.

⁹Abainoj ta stuc'ulanel ti banomile; ta xatacbe tal vo' ta stojol, ta xlic ch'iuc talel avu'un ti c'usi xu' ta xaq'ue, ta sventa ti muc'tic no'ox xbalaq'uin ti yoc uc'um avu'une, ta xch'i ti trigo avu'une. Jech ta x'ayan sbeel ti osil avu'une.

¹⁰Jech ta xava'leltas ti xpolte-polte surcoal ti banomile; ta xatus ta parejo ti svoloquil lume, ta yepal vo' ta xc'unib ti banomil avu'une, ta xats'uiltas ti c'usitic xloc' x'ayan une.

¹¹Ts'uiltasbil avu'un ti jabile, ti toquetic avu'une yepal no'ox esomajel yu'un ti c'usi ta xch'ie.

¹²Yax balan no'ox ti yaxal ta sbajtical banomile, yax balan no'ox yutsil ti vitstique.

¹³Lamal no'ox vacaxetic ta stenlejaltic, yax balan no'ox yutsil ti trigo ta stenlejaltique, scotolic xmuyubajic, x'avlajetic, xq'uejinic no'ox.