Read Tzotzil Salmos 66 Bible Online

Salmos 66 - Tzotzil bible

Salmos 66

¹Jnaclejetic ti oyoxuc ta scotol ti banomile, muyubajanic ta sq'uejintael ti Diose.

²Q'uejintaic q'uejimoletic ta sventa ti yutsil slequile, junuc yutsil ti q'uejimol ta squejintabele.

³Xi xavalbeic ti Diose: “Jun yutsil ti avabtele. Alunebic xa ta xyalic ta lum ti avajcontratac ta sventa ti amuc'ul atsatsale.

⁴Scotol banomil ta snijan xchiman sbaic ta yich'elot ta muc' ta sq'uejintael q'uejimoletic ta aventa.”

⁵La' q'uelo avilic yabtel ti Diose, ti xi s'elan laj spas ta stojol ti jnaclejetique:

⁶Ti nabe, ti uc'ume, laj sjoybin ta taquin banomil yo' ech' xtuch'ic ti jtot jme'tic ta vo'nee. Muyubajcutic ta stojol Dios un cha'e.

⁷Ta sventa ti smuc'ul stsatsale, ta spas mantal sbatel osil; yac'oj ech'el sat ta stojol ti jujun muc'tiquil lume yo' mu stoy sbaic ti jtoyobbaetic ta stojole.

⁸Muc'tic lumetic, lequil c'optaic ti Dios cu'untique. Laetanic liquel ta sq'uejintael ti lametel q'uejimole.

⁹Yu'un li' to va'al teq'uelotic yu'une, mu'yuc to xijyal ta lum yu'un.

¹⁰Cajval Dios, laj xa avac'uncutic ta lajeltsael; bec'bil xa loc' quic'obalcutic jech c'u cha'al ta xich' vosesbel sc'a'epal ti platae.

¹¹Li'ochcutic ta pets' avu'un un; jun yalal ti quicatscutic laj jtacutic avu'une.

¹²Aq'ueloj xa no'ox ti buch'uuc xispujuncutic ta teq'uele; laj jtacutic sibtasel ti li'ech'cutic ta vo' ta c'oq'ue, le' une, c'ot ta pasel avu'un un, siquet to ti banomil tana une.

¹³Ta xc'ot ta pasel cu'un un ta yaq'uel ti chic'bil matanaletic ti caloj ta xcac' ta atojol c'alal ta xi'och ta ach'ulnae,

¹⁴ti laj cac' que ta yalel ti ta xcac' c'alal yacal ta xquich' ti ilbajinele.

¹⁵Ta jchic' ta sba avaltar chon bolometic ti lec jubemique, ta yaq'uel ti tot vacaxe, ti tot tentsune, xchi'uc ti jun yutsil smuil chic'bil chijetique.

¹⁶La'ic acotolic ti xana' xaxi'taic ti Diose; chiquintao ava'iic ta xcal ava'iic jlo'il ti c'u s'elan laj spas ta jtojole.

¹⁷Laj cavta, laj jam que jti', lic'opoj ta stojol ta yalbel yutsilal.

¹⁸Ati yanuc ti snopobil cu'une, mu'yuc laj stac'bun jc'op ma' ti Dios une.

¹⁹Le' une, laj ya'ibun, laj xchiquintabun ti jc'opojel jti'inele.

²⁰Jun yutsil ta j'ech'el ma' ti Dios une, ti mu'yuc laj sbajbun ti jc'opojel jti'inele, ti mu ja'uc laj sjaltabun ti syail xc'uxul yo'ntone.