Read Tzotzil Salmos 7 Bible Online

Salmos 7 - Tzotzil bible

Salmos 7

¹Cajval, Dios cu'un, ta jsa' jpojel jchabiel ta atojol, mu xavac'un ta yoc ta sc'ob scotol ti buch'u ta xilic ya'iic ti jvocole.

²Naca mi co'oluc s'elan junuc león ta xisbal ta lilinel, ti mu'yuc xa buch'u stic' sba ta jpojele, ti q'uelbilun xa no'ox ta xislilinic ta j'ech'ele.

³Cajval, Dios cu'un, ¿c'usi jtosucal laj jsa' o ti jvocol xchi'uque? ¿Mi yu'un oy bu yal ti coc jc'ob une?

⁴¿Mi yu'un laj jpacbe sutel ta chopol ti c'usi lec laj spasbun ti buch'u lec xquil jba xchi'uque? ¿Mi ta jech no'ox yepal laj quilbe svocol ti jcontrae?

⁵Ti mi jech une, ac'o yilbun jvocol ti cajcontra unbi, ti jochetcun yu'unic ta lum mi li'och ta yoc ta sc'obique, ti ju'biluc ta teq'uel ti lec jc'oplal une.

⁶Ta sc'ac'aluc avo'nton, va'lan tec'lan un, Cajval. Tic'o aba ta spaquel ti jelav xa scapemal sjol ta jtojol ti cajcontrataque. Ti vo'ot ti laj ava'an aba ta yalel ti ta xatic' aba ta jchapanvaneje, paco ti jc'oplal une.

⁷Voluc setluc talel ta atojol ti muc'tiquil lumetique, chotano apasob mantal ta toyol ti bu oyique.

⁸Ti jech abainoj ta xchapanel ti muc'tiquil lume, Cajval, chapanun ec un jech c'u cha'al ti yutsil slequil co'ntone, chapanun un jech c'u cha'al mu'yuc ti jmule.

⁹Dios ti oy avutsilale, ti chajal aba asat ta yilel ti c'usi ta xich' nopele, ti c'usi xa slo'il xmaxil ti yut o'ntonale, c'otuc ta tubbel avu'un xchopolalic ti buch'u mu'yuc xch'ulel xa'i sbaique. Jun yo'nton oyuc avu'un ti buch'u oy stuq'uil yutsilale.

¹⁰Ti Dios ti oy ta toyol cajale, ta xischabiun, ta stic' sba ta spojel un ti buch'utic jamal lec ti yo'ntonique.

¹¹Jun tuq'uil jchapanvanej ma' ti Dios une; scotol c'ac'al scontrainoj ta j'ech'el ti chopole.

¹²Mi ta xch'ac sba ta j'ech'el ti vinic ta stojol ti Diose, xjuxbe xa liquel ye yuni espada ma' ti Dios une, tsots xa xach'oj ti syolobe.

¹³Tilem xa sc'ac'al sni' syolob ta sbijil sati ech'el; ¡chamebal xa xal o ti yabtejebtac chapal yu'une!

¹⁴Q'uelo avil xi s'elan ta xc'ot ta stojol ti buch'u mu'yuc xch'ulel xa'i sbaique: xbalet xa liquel xchi'uc svocol ti lec laj ya'i ti yabtel laj sliquesique, ta xlic stsac yip yu'unic un, ta xc'ot ta t'omel yu'unic ti naca lo'lavanej laj spasique.

¹⁵Ta xbaj yalel stuc ma' ti ta natil joc' laj smeltsane.

¹⁶Ti xchopolal nabal ta stojole, ti xlic ta lum ti c'usi mu'yuc smelol ta spase, lamal ta xc'ot ta sba stuc un.

¹⁷Ta jlequil-c'opta ma' ti Cajvale, oy yutsil slequil ma' ti stuque. Ta jq'uejinta q'uejimoletic ta sventa ti Cajvale, ti ac'bil ta toyol cajal ti sc'oplale.