Read Tzotzil Salmos 71 Bible Online

Salmos 71 - Tzotzil bible

Salmos 71

¹Cajval, ta jsa'ilan jpojobbail ta atojol; j'ech'eluc mu lo'labiluc xic'ot avu'un.

²C'otcun ta colel avu'un, ti pojbiluc c'otcun avu'une, yu'un oy yutsil stuq'uil avo'nton. Coltaun un, luban chaman cu'un un.

³Jechuc a'elan jech c'u cha'al ton ti bu ta jpoj jbae, jechuc a'elan jech c'u cha'al natil luchlebal ti bu ta jnac' jbae, ti pojbilune. Jun toyol luchlebal c'otemot cu'un.

⁴Cajval Dios, pojun ta yoc ta sc'ob ti buch'u mu'yuc xch'ulel xa'i sbae, ta yoc ta sc'ob ti jmilvanejetique, ti buch'u jbel ta c'op xa'i sbaique.

⁵Ta jqueremal ono'ox, c'otemot ta spatobil co'nton un, Dios jtsinanoj jba avu'un un.

⁶Ic'bil, japbilun xa ono'ox avu'un c'alal oyun ta xch'ut ti jme'e. Lic'ot ta voq'uel avu'un un. J'ech'el ta jlequil-c'optaot un.

⁷Yepal no'ox ti ch'ayal c'ot yo'ntonic ti j'ac'-labalun laj yilique, jechuc un, ipaluc ti c'otemot ta jpojobbailot une.

⁸Scotol c'ac'al, oy ta que ta jti' ta yalel ti alequilal avutsilale.

⁹Mu xajip xatenun mi limolib xae; mu xatenun ti c'alal mu'yuc xa yipal cu'une.

¹⁰Ti cajcontrataque xchi'uc ti buch'u ta xismil ya'iique, ta sco'oltas sjolic ta xchapel sc'opic ta scontrainelun.

¹¹Xi ta xalic une: “Nutsic tsaquic ya'i, yu'un jipat tenat xa comel yu'un ti Diose, mu'yuc xa buch'u stic' sba ta spojel.”

¹²Mu xanamajes aba ta jtojol, Cajval Dios, la' tic'o aba ta jpojel un.

¹³Aq'ueuc ta xq'uexlal, tsutsuc sc'oplalic ta j'ech'el ti jcontratac ti q'uelel ta xtuch'el ti jcuxleje. Aq'ueuc ta lo'il maxil ya'iic ti buch'u ta xilic ya'iic ti jvocole.

¹⁴Le' une, staoj yav li' ta jmalae, xlic xcaj no'ox ta jlequil-c'optaot.

¹⁵Scotol c'ac'al, ta xcalilan ti laj apojuncutique, ti laj achapanuncutique. Mu xa xtal ta jol ma' ti c'u yepal taj une.

¹⁶Cajval, ta jlo'iltabe sc'oplal ma' ti c'usi muc'tic c'ot ta pasel avu'un une; ta jvinajes sc'oplal ti vo'ot no'ox oy slequil yutsil avo'ntone.

¹⁷Cajval Dios, ta jqueremal ono'ox laj achanubtasun talel, ti yacalun to ta yalel une, ti jun no'ox smuc'tiquil ti avabtel laj apase.

¹⁸Cajval Dios, mu xajip xatenun mi liyijub xa une, mi sac chijan xa ti jole. Tsots to sc'oplal ta xcalbe ya'iic amuc'ul atsatsal ti jch'iel jc'opojeletic li'e, xchi'uc ti ta to xtale.

¹⁹Ti chapanel avu'une, Ch'ul Dios, ta xc'ot c'alal to vinajel, yepal no'ox muc'tic ta xc'ot ta pasel avu'un. Mu'yuc buch'u xco'olaj jech c'u cha'al ti vo'ote.

²⁰Manchuc mi laj quil ta jsat lamal c'ot ta jba ti vocole, ti ilbajinele, licuxi to ta ach' avu'un; ta xatoyun liquel ti pac'alun ta lum ach'ele.

²¹Ta xava'an aba ta yepajesel ti c'usi lec ta xc'ot ta jtojole, ta xlic apatbun co'nton.

²²Ch'ul Diosot yu'un ti Israele, Cajval Dios, xlomet no'ox ti vobe, ti jchop o ta vobe, ta sq'uejintael q'uejimoletic, xchi'uc ti alequil-coptael ti jun ajol avo'ntone.

²³Ta sjunul co'nton loq'uem ayanem ti ximuyubaj xchi'uc ti que jti' ta sq'uejintaelote yu'un laj atic' aba ta jpojel.

²⁴Ja' jech xtoc scotol ora ta xloq'uilan ta que ta jti' ti oy stuq'uil avo'ntone, yu'un ti buch'utic ta xil ya'iic ti jvocole, q'uexlaluc c'otic ta j'ech'el un.