Read Tzotzil Salmos 72 Bible Online

Salmos 72 - Tzotzil bible

Salmos 72

¹Ch'ul Dios, abolajan avocoluc ac'bo stuq'uil ajol ti ajvalile, ti lequil chapanel avu'une, ti stuq'uilal ajole,

²yo' jech oy stuq'uil yutsil avu'un ta sventainel ti jteclum avu'une, xchi'uc ti me'un mu'natetique.

³Ti muc'tiquil abnaletique xchi'uc ti vitstique, staicuc yu'un oyuc ti yutsilal ti mu'yucuc c'usi sna'ic ti jteclume.

⁴Stic'uc sba ti ajvalil ta spojel ti me'un mu'nate, stic'uc sba ta spojel xnich'nab ti buch'utic mu'yuc c'usi oy yu'unique; pech'biluc ta teq'uel comuc yu'unic yip ti j'ilbajinvanejetique.

⁵Ti c'u to sjalil xojobin ti c'ac'ale, ti ue, j'ech'el xi'uc ti ajvalil ta atojole.

⁶Co'oluc s'elan vo' xchajet talel, ti co'oluc sts'ujubal job ac'ubal ta smaltael ti banomil xchi'uc ti momoletique.

⁷Ayanuc ta j'ech'el ti yutsil stuq'uil ti lamajemuc c'op ti jech ochem ta ajvalile, ja' to ti c'uxi ic' muts'an com ti banomile.

⁸Sventainuc ech'el ti jujujot nabetique, ti uc'um Eufratese, ti bu xa c'alal oy jujuti' ti banomile.

⁹Ti yajcontratac snainojic ti sbajtical banomile, talicuc sbic'tajes sbaic ta stojol.

¹⁰Ich'batuc talel matanaletic xchi'uc yan c'usitic ta xloc' ta yo'ntonic ti ajvaliletic yu'un ti Tarsise, ti nacalic bu joyobtabil ta nabe, ti ajvaliletic ti nacalic ta Sabae, ti ta Sebae.

¹¹Squejanuc sbaic scotol ti ajvaliletic ta stojole. C'otuc ta yajtuneltac scotol ti muc'tiquil lumetique.

¹²Yu'un ti Diose ta stic' sba ta scoltael ti me'un mu'nat xvocolet ta stojole, xchi'uc ti buch'u oy c'usi tsots sc'oplal ta xtun yu'un ti mu'yuc buch'u xcoltaune.

¹³Xc'uxubaj yo'nton ta stojol ti buch'u biq'uit yac'oj sbaique; ta stic' sba ta spojel ti me'unetique.

¹⁴Ta stic' sba ta scoltael ti buch'u mu xnel x'ech' ti svocolique, ti bu ilbajinbilique, yu'un tsots sc'oplal ti cuxiicuque.

¹⁵Mu xch'ay sc'oplal ma' ti ajvalil une, ac'batuc ti oro ti ta xlic talel ta Sabae. C'oponbil ti'inbiluc ti Dios ta sventae. J'ech'el lequil c'optabiluc.

¹⁶Busuluc ta j'ech'el ti trigo ta jteclume, ti busetuc loc'uc ta vitstique. Voc'uc talel ta banomil ti sat ts'unubil jech c'u cha'al ta xvoc' ta Libanoe, cha'q'uetuc no'ox ta ch'iel ti trigo jech c'u cha'al ta Libanoe, spajebaluc yepal ch'iuc ti trigo jech c'u cha'al ti momoletic oy ta osiltique.

¹⁷J'ech'eluc oyuc ta eil ti'il sc'oplal ti ajvalile; jechuc s'elan c'ac'al jalijuc ta xvinaj ti cuchem yu'une. Ja'uc ta sventa staicuc ti mu'yucuc c'usi sna'ic scotol ti muc'tiquil lumetic ta banomile. Stuc xa no'ox jech ta j'ech'el xiicuc yu'un ti muc'tiquil lumetique.

¹⁸Lequil c'optabiluc ta j'ech'el ti Diose, ti Ajvalil Dios yu'un ti Israele, ti stuc no'ox oy c'usitic muc'tic ta xc'ot ta pasel yu'une.

¹⁹Ti sbateluc osil lequil c'optabiluc ta sventa ti yutsilale; nojuc ta scotol banomil ti xojobin no'ox ti yutsilale. Jech c'otuc ta pasel un.

²⁰C'ot ta tsutsel sc'opojel sti'inel ti David xnich'on ti Isaie.