Read Tzotzil Salmos 73 Bible Online

Salmos 73 - Tzotzil bible

Salmos 73

¹Jun yutsil slequil yo'nton ti Dios ta stojol ti Israele, ta stojol ti buch'utic lec yo'ntonique.

²Xi xa yuni muc'ul ti mu liyal ta lume, ti pilts'uj yalel ti cacane.

³It'ix laj ca'i ti caj tsacal xa'i sbaique, ti buch'u toyobbaique, ti buch'u mu'yuc xch'ulel xa'i sbaique.

⁴Mi jutebuc oy ta yo'ntonic ma' ti ta xchamique, yu'un telom ti sbec'tal stacopalic xa'i sbaique.

⁵Mi jutebuc c'otem ta sbec'talic ma' ti oy chamel lajel une; mu'yuc ma' ti oy svocolic jech c'u cha'al ti yane.

⁶Jech o xal un, c'otem ta yuilic ti stoyobbailique; c'otem ta sc'u'ic ta spasel ti c'usi chopole.

⁷Jun sjubemalic ta j'ech'el, uts'ulic no'ox ti satic xchi'uquique; yepal no'ox ta j'ech'el ti xchopolal yo'ntonique.

⁸Spajebal xa no'ox ye sti', toyobba xa'i sba, pimuneb sat xchi'uquic, oy sujelal yu'unic ta spasel ti chopole xchi'uc ti ilbajinvaneje.

⁹C'uc no'ox xtal ta sjolic ta xchopol-c'optael ti vinajele; xpuquet ta scotol banomil ti c'usi xbet'bun yeic ta yalele.

¹⁰Jech o xal un, lequil c'optabilic yu'un ti jnaclejetique, mu xtabatic jset'uc ti xchopolalique.

¹¹Xi ta sjac'be sbaique: “¿Mi yu'un ta la sna' ti Dios une? ¿Mi yu'un ta la xil ti Buch'u oy ta toyol une?”

¹²Q'uelo avil le'e ti buch'u mu'yuc xch'ulel xa'i sbaique. Mu'yuc no'ox c'usi sna', ta scajtsaj muyel xchi'uc ti sc'ulejalique.

¹³Mu'yuc c'usi xtun o ma' ti yutsil slequilal co'nton une, ti jq'ueloj jba ti mu'yuc jsoquesoj ti coc jc'obe.

¹⁴Yu'un c'uc no'ox yorail, ta xquich' pujel ta majel, tsitsbilun ti jujun sob ic'luman une.

¹⁵Ti jechuc laj jnop jech c'u cha'al ti stuquique, laj xa jvalc'un jc'op ta stojol ti avalab anich'nabe.

¹⁶Lic jnopilan c'usi xal o taje, vocol t'un cu'un ta j'ech'el un.

¹⁷C'alal li'och batel ta xch'ulna ti Dios une, lic ca'i ti xi s'elan ta xc'otic ta tsutsele:

¹⁸Va'alic xa batel avu'un ti bu ch'ulul ta j'ech'ele, tacoltabil ta xbat avu'un ta stael ti svocolique.

¹⁹Mu xa ta sjaliluc ta xc'otic ta tsutsel. Ta xi'el no'ox xbat o xchi'uquic.

²⁰C'alal ta xlic ava'an abae, Dios, co'ol s'elan ta xvul xch'ulel ti buch'u vayeme, ta xabaj xaten ti buch'u naca spac'taoj sbaique.

²¹Soquet no'ox banomil laj ca'i yu'un le' une; st'uset no'ox co'nton yu'un ti xc'uxul une.

²²Jun jpimil xca'i jba ta j'ech'el, mu xca'ibe ti xchiquinale; co'ol j'elan jun ca' xca'i jba ta atojol un.

²³Manchuc mi jech un, nabalot ono'ox ta jtojol, anitojun ta jbats'i c'ob un.

²⁴Laj atojobtasun ta sventa ti bijubtasel avu'une; ich'bil ta muc' ta xic'ot avu'un ta slajeb un.

²⁵¿Mi yan xa la xana' Buch'u oy ta vinajel cu'une? C'ajomal no'ox ti vo'ote. Ti nabalun ta atojol une, ech' sc'oplal ta o'ntonal ti c'usi oy ta banomile.

²⁶Ti jbec'tal jtacopale ta xlaj ech'el yip ta xca'i, le' une, c'otem ta jrexto sbatel osil ti Diose, sva'anoj sba ta yac'bel yip ti co'ntone.

²⁷Ti buch'u ta xnamaj ta atojol une, ta xchamic; ta xatubbe sc'oplal ti buch'u mu junuc yo'nton ta atojole.

²⁸Li vu'un une ta xinopaj ta stojol ti Diose, xloc' venta ta xca'i. Cajval Dios, c'otemot ta jnac'obbailot, ta xcac' ta jba ta yalel scotol ti c'usitic laj apase.