Read Tzotzil Salmos 74 Bible Online

Salmos 74 - Tzotzil bible

Salmos 74

¹Ch'ul Dios, ¿c'u cha'al j'ech'el laj ajip laj atenuncutic comel? ¿C'u cha'al j'ech'el lic ti sc'ac'al avo'nton ta stojol ti avuni chijtac xlamet ta yaxaltique?

²Vuleso ta avo'nton ti ateclumale, ti ta sliquebal no'ox lalub lacham talel yu'une, ti laj atic' aba ta spojel yo' jech ta xc'ot ta avu'une. Vuleso ta avo'nton ec un ti vits Sión ti bu lanaquie.

³La' q'uelo avil ti mu'yuc spajeb ta xjin batele; ti jcontrainvanejetique laj xa slilinic ta soquesel scotol ti c'usi oy ta ch'ulnae.

⁴Ti avajcontrataque xq'uejinic no'ox ta ach'ulna ti tsalvanic xae; laj xa sva'anic jyanlum banderaetic

⁵ti ta yac'ol sti' ochebale. Co'ol s'elan junuc jsi'biletic xbajlajetic ta pimilal te'tique,

⁶ta soquesel slilinel ta eq'uel xchi'uc martillo ti xch'alet no'ox ac'bil xnichimal ti te'e.

⁷Laj spajbeic sc'ac'al ti ach'ulnae; ta j'ech'el laj soquesbeic sc'oplal ti ataobil ta na'ele, ti busul xa c'ot ta lumtic yu'unique.

⁸C'ot ta nopel yu'unic ti j'ech'el ta xistsutsesuncutic jcotolcutique; ¡laj spajbeic sc'ac'al scotol ti jteclume, ti bu ta jtsob jbacutic ta sventa yich'elot ta muq'ue!

⁹Ta jech yepal ch'ay xi ti c'usitic sna' xac' ta ilel ti amuc'ul atsatsale; mi junuc xa ti j'alc'op une, mi jutebuc jna'cutic c'u sjalil ta xjalij.

¹⁰Ch'ul Dios, ¿c'u sjalil ta soques o'ntonal ti jcontrainvanejetique? ¿C'u sjalil ta sbisot ta cotol chaval?

¹¹¿C'u cha'al nac'al avu'un smuc'ul stsatsal ti avoc ac'ob une? ¿C'u cha'al ya'luc un ameyoj ti ac'ob une?

¹²Vo'ne xa talel ma' ti c'otemot ta Ajvalilot cu'une. Li vo'ot une, Ch'ul Dios, xi s'elan c'otem ta pasel ti yepal no'ox latsalvan talel li' ta banomile:

¹³Ta amuc'ul ta atsatsal, ch'ac ta o'lol ti nab avu'une; laj avoc'anbe sjol ti jsibtasvanej muc' ta chonetic oy ta muc' ta nabe.

¹⁴Laj apech'be ta teq'uel sjol ti j'ac'-xi'el muc' ta chon Leviatán sbie, ti sti'ic avu'un ti chonetic xcotlajan ta sbajtical banomile.

¹⁵Ta aventa, laj tucuc talel ti sat vo'etique, ti uc'umetique, ti ta aventa c'ot ta taquijel avu'un ti mu albajuc smuc'tiquil ti uc'ume.

¹⁶Abainoj ta sventainel sacubel ti osile, yic'ubel ti ac'ubale, yu'un vo'ot laj ameltsan ti ue, ti c'ac'ale.

¹⁷Laj aval bu c'alal ta xc'ot ti banomile; laj achapan bu ta xlic yorail ti snatil c'ac'ale, ti bu ta xlic yorail ti scomil c'ac'ale.

¹⁸Mu xch'ay xava'i un, Cajval, mu xicta sba scontrainelot ti avajcontrae; pimunebic ti jnaclejetic ti ta sbisot ta cotol chavale.

¹⁹Mu xapas un ti ta xach'ayuncutic ta avo'ntone. Co'ol j'elancutic jech c'u cha'al ti tórtolae, mu'yuc quipcutic; mu xavac'uncutic ta yoc ta sc'ob ti jti'ovaletic une.

²⁰Vuleso ta avo'nton ti atratee, yu'un tsatsajem ta j'ech'el ti c'op li' ta jteclum ti bu c'alal smacoje.

²¹Mu aq'uelojuc ta x'aq'ue ta lo'il maxil ti buch'utic ilbajinbile; c'otuc ta pasel ti lequil-c'optabilucot yu'un ti me'unetique, xchi'uc ti buch'u biq'uit yac'oj sbaique.

²²Va'lan tec'lan un, Ch'ul Dios, pojo aba ti soquem ac'oplale. Mu xch'ay xava'i ta bet'bunel yeic ta soquesel ac'oplal ti buch'u pimuneb xa'i sbaique.

²³Mu xch'ay xava'i ti x'avlajetic no'ox ti avajcontrae, ti cajtsajem ta vulvunel ti toyobbaetique.