Read Tzotzil Salmos 77 Bible Online

Salmos 77 - Tzotzil bible

Salmos 77

¹Tsots xivocolet ta c'opojel ta stojol ti Diose yo' jech ta xa'ibun ti jc'ope.

²C'alal sc'ac'alil oyun ta vul o'ntone, ta jt'un ta jsa' ti Cajvale, mu xquicta jba snubel coc jc'ob ta c'opojel ti'inel ta ac'ubaltic. Mu ta jta ti smuc'ul co'nton ta xca'ie.

³Ta jvules ta co'nton ma' ti Dios une, ta xi'oc'; ta xlic jnopilan ti c'u s'elane, ta xlic tsic'uc co'nton un.

⁴Mu xavac' jmuts' jliqueluc ti jsat une, Cajval; xich'ayet no'ox un, mu xa c'usi loc' ta alel cu'un.

⁵Ta jnopilan c'u s'elan ech' talel ti c'ac'ale, ti sjabilal le' talel ta vo'nee;

⁶ta jvules ta jol ti xiq'uejin no'ox ta ac'ubaltique. Xichi ta jnope, ta jac'be jba ta yut co'nton:

⁷¿Mi j'ech'el ta x'ilin ti Diose? ¿Mi mu'yuc xa ta xlic c'uxubajuc yo'nton ta jtojolcutic?

⁸¿Mi xch'ay xa o sc'oplal ti syail xc'uxul yo'ntone? ¿Mi j'ech'el ch'ay o sc'oplal yu'un ti oy c'usi yaloj ta xaq'ue?

⁹¿Mi ch'ay o sc'oplal yu'un slequil yutsil yo'nton ti Diose? ¿Mi j'ech'el capem o sjol ti mu xa xc'uxubaj jset'uque?

¹⁰Ti bu toj c'ux ta xca'i ta j'ech'ele, ja' ti c'alal ta jnop ti Buch'u oy ta toyole ti laj xa syanijes sba ta jtojolcutique.

¹¹Ta jvules ta co'nton un, ti c'usitic ch'ayal ta xc'ot o'ntonal yu'un ti laj spasanan talel le' ta vo'ne ti Cajvale.

¹²Ta jvules ta co'nton scotol un ti c'u s'elan laj spas talele.

¹³Ta j'ech'el, Ch'ul Diosot un, jun yutsil ti avabtel ta xapase, ¿mi yu'un oy to la yan dios jech smuc'ul stsatsal jech c'u cha'al ti vo'ot une?

¹⁴Vo'ot no'ox Diosot ti ch'ayal ta xc'ot o'ntonal yu'un ti c'usi ta xapase. Laj avac' ta ojtiquinel amuc'ul atsatsal ta stojol ti muc'tiquil lume.

¹⁵Ta amuc'ul ta atsatsal, laj apoj ti ateclumale, xnich'nab ti Jacobe, xchi'uc ti Josee.

¹⁶Ch'ul Dios, c'alal laj yilot ti nabe, lic xi'uc, c'alal snabil lic syuq'uilan sba.

¹⁷Xchajet no'ox talel vo' yu'un ti toque; xc'avlajet no'ox liquel ti chauc ta vinajele; buyuc no'ox xjaplajet ti sac tsele.

¹⁸Xvinaj to ta muc' ta sutub ic' xc'avlajet no'ox avu'un ti chauque; sac jaman no'ox ta sac tsel c'ot avu'un ti banomile, c'uy ta niquel ti banomil une.

¹⁹Laj ajam ech'el abe ta nab un; yepal no'ox vo' laxani ech'el, le' une, mu'yuc buch'u laj sta ta tunel ti yav avoque.

²⁰Co'ol s'elan lametel chij, laj atojobtas ta beinel ti ateclumal ta sventa ti Moisese, xchi'uc ti Aarone.