Read Tzotzil Salmos 80 Bible Online

Salmos 80 - Tzotzil bible

Salmos 80

¹Ti co'ol a'elan j'il-chijot ta sq'uelel ti Israele, ti co'ol s'elan chij ta xatojobtas ech'el ta be ti Josee, ti oy apasob mantal bu oy ti c'usi oy xiq'uique, a'yio ava'i li'e, lecuc xavil ta aba ta asat ti Efraine,

²ti Benjamine, xchi'uc ti Manasese. Julavan un, la' ta spojeluncutic ta sventa ti amuc'ul atsatsale.

³Ch'ul Dios, c'otuc ta pasel avu'un ti c'u j'elancutic to ox ta ba'yele. Lecuc xaviluncutic ta aba ta asat, va'i unbi, pojbil ta xic'otcutic.

⁴Cajval, Dios ti scotol xu' avu'une, ¿c'u sjalil ilinemot ta j'ech'el yu'un sc'opojel sti'inel ti ateclumale?

⁵Tal avu'un ti nom c'ot ve'el cu'uncutic ti xmalmun liquel ya'lel jsatcutic yu'un ti oq'uele; nom c'ot uch'bajel ta scoj ti mu'yuc spajeb ta xmal ti ya'lel jsatcutique.

⁶Lic'otcutic ta j'ac'-labal avu'un yu'un ti jlac'nacutique; stse'inic xa ta jtojolcutic ti jcontracutique.

⁷Dios ti scotol xu' avu'une, c'otuc ta pasel avu'un ti c'u j'elancutic to ox ta ba'yele. Lecuc xaviluncutuc ta aba ta asat, va'i unbi, pojbil ta xic'otcutic.

⁸Ta Egipto to, laj atam talel sts'unubal ti uvae; laj ajip loq'uel ti jnaclejetic yan yajvalique, lic ats'un ti ats'unub une.

⁹Laj ach'uba ta yaq'uintael ti banomil ta sventa ti ts'unubile; laj yac' yibeltac ti uvae, laj snojesic ti muc' ta lum une.

¹⁰Net'bil com yu'un ta yaxinal ti muc'tiquil vitstique; laj sliman sba batel sc'ob-c'obtac ta sba ti toyol te'tique.

¹¹Laj slim sba ech'el sc'obtac c'alal to ta muc' ta nab, ti c'ot c'alal to ta uc'um Eufrates ti sq'uelomtaque.

¹²¿C'u cha'al un laj ajinesbe ti smocale, ti xu' no'ox ta xva'i sbulic uva ti jxanviletic ta x'ech' ta bee?

¹³Ve'baj ti te'tical chitom ta stsutsesel ti uvae; stsutsesanic ta j'ech'el ti chon bolometic xcotlajan ta banomile.

¹⁴Dios ti scotol xu' avu'une, sutan talel un, avocoluc; ta vinajeluc to, tuc'ulano lec avil ti c'u s'elane, c'uxubajan yu'un ti uva li' une,

¹⁵ti ts'unubal uva vo'ot laj ats'une, ti sq'uelomtac vo'ot laj avalbe sc'oplal ta xcom o une.

¹⁶Ta acapemaluc, ch'aybo sc'oplal ti buch'utic ta xtuch'ique, ti ta x'ech' xchiq'uique.

¹⁷Le' une, coltao ti vinic buch'u laj at'uje, sts'unubal ti vinic vo'ot laj avalbe sc'oplal ta xcom oe.

¹⁸J'ech'el, mu jch'ac jbacutic ta atojol un. Cuxiuncutic avu'un, va'i un, xloc' venta xivocoletcutic liquel ta atojol.

¹⁹Cajval, Ch'ul Dios ti scotol xu' avu'un une, c'otuc ta pasel avu'un ti c'u j'elancutic to ox ta ba'yele. Lecuc xaviluncutic ta aba ta asat, va'i unbi, pojbil ta xic'otcutic.