Read Tzotzil Salmos 83 Bible Online

Salmos 83 - Tzotzil bible

Salmos 83

¹Ch'ul Dios, ¡ma'ucuc ti ch'an xachi une, ti mu'yuc c'usi ta xavale, ti ts'ijilot xa une!

²Q'uelo avil xi s'elan ta spasic ti acontra xti'et sjolic ta atojole; toyobba xa'i sbaic, xvoletic xa ta scontrainelot.

³Xtojobeic lec c'u s'elan xchapojic ta spasbel ti ateclumale, ta stojol ti buch'utic chabibil avu'une.

⁴Snopojic xa ta xtal stub ti jc'oplalcutique yo' jech ch'ay xi sc'oplal ti muc' ta lumuncutique, yo' jech mu xa xich' svulesel ta o'ntonal ti Israele.

⁵Xi s'elan laj xa spas strateic ta scontrainelote, co'ol s'elan jun no'ox vinic laj xa scomon-pay ti sc'opique:

⁶Ti buch'u nacalic ta axibalna ta Edome, ti Ismaele, snitilultac ti Agar xchi'uc ti Moabe,

⁷ti Gebale, ti Amone, xchi'uc ti Amaleque, ti filisteoetic nacalic ta Tiroe.

⁸Ma'uc no'ox taje, laj xa scomon-vol sc'opic xchi'uc ti asirioetique, ti tsots yo'ntonic yu'un xnich'nab ti Lote.

⁹Jech xapas ta stojol un jech c'u cha'al laj apasbe ti Madiane, jech c'u cha'al laj apasbe ti Sisarae, jech c'u cha'al laj apasbe ti Jabin ta uc'um Cisone,

¹⁰ti tub sc'oplalic ta Endore, ti c'otic ta sc'a'al banomil une.

¹¹Jech xapas ta stojolic ti cajal viniquetic yu'unique, jech c'u cha'al laj apasbe ti Orebe xchi'uc ti Zeebe. Jech xapasbe ta stojolic ti banquilaletic yu'unique, jech c'u cha'al laj apasbe ti Zebae, xchi'uc ti Zalmunae,

¹²ti oy ta yo'ntonic ta yu'ninel ya'iic bu ti jamal yaxaltic yu'un Diose.

¹³Dios Cajval, paso ta stojolic un, baleticuc batel jech c'u cha'al jun ch'ix, jech c'u cha'al junuc taquin yanalte' ti bec'bil ta xbat ta iq'ue,

¹⁴jech c'u cha'al c'oc' ta xchic' ti te'tique, ta xtil ti te'tic yu'un ti slebe,

¹⁵yich'icuc ya'iic sibtasel ta ts'otetel sutub ic' avu'un, bec'bil batuc avu'un ta ti'ol lometel vo' xchi'uc ti yic'ale.

¹⁶Ac'bo ya'iic q'uexlal, Cajval, yo' ta snaban sbaic ta atojol un.

¹⁷J'ech'el q'uexlaluc c'oticuc, q'uexlal cham lajicuc ya'iic.

¹⁸sna'icuc ti vo'ot Diosote, ti oyot ta toyol yu'un scotol ti banomile.