Read Tzotzil Salmos 84 Bible Online

Salmos 84 - Tzotzil bible

Salmos 84

¹Jun no'ox yutsil ta j'ech'el ti ach'ulnae, Dios ti scotol xu' avu'une.

²Bats'i juteb ta co'nton un, jc'anuc xa ca'i oyucun ta yamaq'uil ti ach'ulnae. Ta sjunul co'nton, ximuyubaj ta jq'uejinta ti j'ac'-cuxlejal Diose.

³Q'uelo avil un, Ch'ul Dios ti scotol xu' avu'une, Ch'ul Ajvalil ti Diosot une, staoj yavilic ta altar avu'un bu ta spasbe stas yolic ti c'upil sba jq'uejimol-mute, xchi'uc ti xjaval-eq'uene.

⁴Siquet no'ox banomil ta xa'i ti buch'utic snainojic ti ach'ulnae, ti mu xlubtsajic ta yalel ti alequilale.

⁵Mu'yuc c'usi sna'ic ta j'ech'el ta staic coltael ta aventae, xchi'uc ti buch'utic xvoletic batel ta vits avu'une.

⁶C'alal ta x'ech'ic ta stenlejal ti sbiinoj Loq'ueb Ya'lel Satile, ta xjoybij ta jun tuquem vo', lequilal yich'oj talel ta xa'i c'alal ta xtal ti vo'e.

⁷Ta stsac lec yipic ta j'ech'el; ta xilic ta vits Sión ti Dios ti cajal yabtel yich'oje.

⁸Cajval, Dios ti scotol xu' avu'une, Diosot yu'un ti Jacobe, ts'etano ani' achiquin yu'un ti jc'opojel jti'inele.

⁹Ti macobbail Ch'ul Diosot cu'uncutique, lecuc xavil ta aba ta asat ti buch'u laj at'uj ta ajvalilale.

¹⁰Xtal yutsil oyucun junuc c'ac'al ta yamaq'uiltac ti ch'ulna avu'une, mu sta ma' ti oyun lajuneb cien (100) c'ac'al ta yane. Xloc' venta ta j'ech'el jtunelucun ta xch'ulna ma' ti Dios cu'une, ma'uc ma' ti ta xcac'be yipal ta spasel ti mu stac' albel sc'oplale.

¹¹Yu'un ti Ajvalil Diose ta xac'botic ti saquil osile, ta stic' sba ta jpojeltic. Ti Diose mu tuch'baj ta xa'i, ta xac' ta ich'el ta muc' ti buch'u ta stuc'ulan sbaique, mu'yuc c'usi ta xjaltabatic jutebuc.

¹²Cajval, ti scotol xu' avu'une, mu'yuc c'usi sna'ic avu'un ti buch'utic spatoj yo'ntonic ta atojol une.