Read Tzotzil Salmos 90 Bible Online

Salmos 90 - Tzotzil bible

Salmos 90

¹Cajval, ti jujuvoc' li'ech'cutique, vo'ot ti jpojobbailcutique.

²Ta sliquebal c'alal ch'abal to ox ti vitsetique, ti mu'yuc to ox ti banomile, xchi'uc ti ch'abal to ox ti c'usitic oye, vo'ot ono'ox Diosot ti oy c'usi laj ech'uque, ti yacal li'e, xchi'uc ti ta to xvul ta loq'uele.

³Ja' avabtel ta xjoybij ta lum ach'el ti buch'u loc' sc'oplal avu'un ti c'alal xachi ta xavale: “Joybijanic xch'a ta lum ach'el.”

⁴Ta melel un, ti jmil (1,000) jabile, co'ol s'elan ta xava'i ti jun c'ac'al ech' voljee, co'ol s'elan jech c'u cha'al jayib no'ox ora ta x'ech' ti ac'ubale.

⁵Smeset no'ox batel avu'un ti jnaclejetique, co'ol s'elan vayel ta x'ech' un.

⁶Co'ol s'elan jech c'u cha'al ti momol ta xvoc' talele, ti ts'o'ol ta nich ta sacube, nucultajem xa ta smalel c'ac'al un, ch'ab xi ti sc'oplale.

⁷Melel un, j'ech'el ta stsutsesuncutic ti sc'ac'al avo'ntone, ti ch'abal xa jch'ulelcutic ta xiyictacutic comel une.

⁸Ti jmulcutique, ti jchopolalcutique, chajal c'otem le' ta aba ta asat.

⁹Melel, ti jcuxlejalcutique ta xc'ot ta tsutsel ti lamal vul ta jtojolcutic ti sc'ac'al avo'ntone, co'ol s'elan junuc jic'-o'ntonal ta xbat ma' ti jabilalcutique.

¹⁰Lajuneb xchanvinic (70) jabil no'ox ma' ti jch'iel jc'opojelcutique; ta xc'otic ta chanvinic (80) jabil ma' ti buch'u tsots xch'ich'elique; yu'un mi oy to cuxlejal ti ech' xa yorail ti ch'iel c'opojele; naca xa vocol ilbajinel q'uelel talel. J'ech'el no'ox ta xi'ech'cutic jech c'u cha'al anil ta x'ech' ti jujun jabile.

¹¹¿Mi oy la buch'u xojtiquin ta j'ech'el ti sc'ac'al avo'ntone? ¿Mi oy la buch'u xojtiquin ti scapemal ajole?

¹²Chanubtasuncutic un cha'e c'u s'elan ta jtunescutic ti jujun c'ac'al ta x'ech'e yo' jech ta xbijub ti jol co'ntoncutique.

¹³Sutan talel ta jtojolcutic, Cajval, ¿c'u to sjalil ta xajaliltas aba un? C'uxubajan yu'un ti avajtuneltac li'e.

¹⁴Ta sacubel osil une, mu'yucuc xa c'usi jna'cutic yu'un ti syail xc'uxul avo'nton ta jtojolcutique yo' ximuyubajcutic no'ox ta q'uejimol yu'un ti c'usitic ta xc'ot ta pasel ti li' cuxuluncutique.

¹⁵Ac'buncutic ep jabil ti muyubajele, jech c'u cha'al ep jabil li'ech'cutic ta vocole.

¹⁶C'otuc ta pasel avu'un ta stojol ti avajtuneltaque xchi'uc ti snitilulique, ti yilicuc ti avabtele, ti avutsil alequile.

¹⁷Oyuc ta jtojoltic yutsil yo'nton ti Cajvaltique, ti Dios cu'untique. Va'ano aba ta stojol ti cabtelcutique, Cajval. Jech, Cajval, va'ano aba ta stojol ti cabtelcutique.