Read Tzotzil Salmos 98 Bible Online

Salmos 98 - Tzotzil bible

Salmos 98

¹Q'uejintaic ta junuc ach' q'uejimol ti Diose, ch'ayal o'ntonal yu'un ti c'usitic ta spase. Tsalvanem c'ot ta sventa ti jelavem smuc'ul stsatsal xchi'uc ti xch'ul c'obe.

²Scaj'aloj xa ti Diose ti ta stsalvan ta j'ech'ele; ta sba ta sat ti muc'tiquil lumetique, laj yac' ta ilel ti tuq'uil chapanele.

³Yu'un ti syail xc'uxul yo'ntone, ti jun sjol yo'nton ta stojol ti steclumal Israele, mu'yuc xch'ay o. Ta jujuti' bu xa oy ti banomile, laj xa yilic ta sba ta satic ti c'otem ta jtsalvanej ti Dios cu'untique.

⁴Jnaclejetic ta sbejel banomil, muyubajanic ta sq'uejintael ti Diose, ac'beic yipal ya'i ti bu xa c'alal xac' ti muyubajel ta xava'iique, q'uejintaic q'uejimoletic un.

⁵Q'uejintaic q'uejimoletic ta stojol Dios ti jmojuc xa xyal anuq'uic xchi'uc ti arpae, xchi'uc ti c'usitic yan ta xich' tijele.

⁶Muyubajanic ta sq'uejintael ti Ajvalil Diose, ti xnupij xchi'uc ti c'usitic jupanbil ta xich' oq'uisanele.

⁷Vo'o'etuc ec ti nabe, muyubajuc scotol ti c'usitic cuxul ta stojole; jechuc ec ti banomile xchi'uc ti jnaclejetic yu'une.

⁸Jeltosuc xa c'u s'elan xchajet yech'omal ti uc'ume, ti muyubajicuc ta avanel ec ti vitsetic

⁹ta stojol ti Dios ti ta xtal sventain ti banomile, yu'un co'ol ta stuq'uil ta yutsil ti mu jeltosuc ta xil ta sba ta sat ta sventainel ti jteclumetic ta banomile.