Read Tzotzil Salmos 99 Bible Online

Salmos 99 - Tzotzil bible

Salmos 99

¹Ti Diose, ja' Ajvalil. Oy spasob mantal bu oy ti c'usi oy xiq'uique. Xniquic ti muc'tiquil lume xchi'uc scotol ti banomile.

²Ti Diose jelavem smuc'ul ti oy ta vits Sione; ti Diose sbainoj ti c'usi sc'an spas ta stojol scotol ti jnaclejetique.

³Lequil c'optabiluc ti sc'oplal un, ti jelavem xu' yu'une, ti xi'bal sbae. Ch'ul Dios ti stuque.

⁴Ajvalilot ti jelavem xu' avu'une, lec ta xavil ti c'usi oy stuq'uile; vo'ot laj aliques ti mu jsatuc jq'uel ti yane. Yu'un ti xnich'nab Jacobe, laj apas ta stojol ti laj stam ech'el avu'un ti c'usi leque xchi'uc c'usi tuq'ue.

⁵Lequil c'optaic un cha'e, ti Ajvalil Dios cu'untique, quejano abaic ta yolon yoc sc'ob. Ch'ul Dios ti stuque.

⁶C'otic ta yajpaletac ti Moisese xchi'uc ti Aarone. Ti c'u yepal ta xlequil-c'opojic ta stojole, oy ta venta ec ti Samuele. C'alal ta sc'anic ti coltaele, ta xtac'batic talel yu'un ti Diose.

⁷Ta voletel toc to c'oponatic talel yu'un ti Diose; ti stuquic une, c'ot ta pasel yu'unic ti smantaltaque, ti oy c'usi jbel tsots albilique.

⁸Cajval, Dios cu'uncutic, laj ono'ox atac'be ti sc'opique. Jun jch'ay mulil colo'il Diosot lac'ot ta stojolic, ac'o mi laj atsits yu'un ti smul scolo'ique.

⁹Lequil c'optaic ti Ajvalil Dios cu'untique, quejano abaic ta stojol ti xch'ul vits yu'un une. Ch'ul Ajvalil ta j'ech'el ma' ti Dios cu'untique.