Read Tzotzil Proverbios 10 Bible Online

Proverbios 10 - Tzotzil bible

Proverbios 10

¹Xi s'elan laj yal sc'optac ti Salomone: Ti alab nich'nabil ti xac' lec sjolilal yu'une, xmuyubaj no'ox yu'un ti stot sme'e, ja'uc ti nich'nabil ti pim no'ox xa'i sbae, ta x'ac'van ta vocol.

²Ti c'ulejal ti ma'uc lequil tabile, mu'yuc c'usi sbejtsaj yu'un, ja'uc ti bu lequil tabile, jun no'ox o'ntonal yu'un.

³Ti Diose mu sq'uelojuc no'ox ta xlaj ta vi'nal ti buch'u lec ta spas sbae, ja'uc ti buch'u mu'yuc xch'ulel xa'i sbae, sq'ueloj ma' ti xmich'mun ti xch'ute.

⁴Mi xnel no'ox ta juteb abtele, sal me'unal xal; mi baxbol ta spasel ep abtele, muc'ul c'ulejal xal.

⁵Ti ochem yipal ta stsobel ti ts'unubil ta yoraile, bijubel xal; mi pajal jolal ta vayel ta yorail ta xich' tsobel ti ts'unubale, q'uexlal apun xal.

⁶Ti vinic buch'u lec ta spas sbae, naca c'uxbinel ta xvul ta stojol, yan ti buch'u mu'yuc xch'ulel xa'i sbae, xlaj o ta xa'i xchi'uc ti svocole.

⁷Naca c'uxubinel ta svulesat ta o'ntonal ti lequil vinic ech'e, ja'uc ti buch'u mu'yuc xch'ulel xa'i sbae, ch'ay xi ta o'ntonal.

⁸Ti buch'u oy sbijile, ta xc'ot lec ta yo'nton ti tojobtasele, ja'uc ti buch'u oy ta ye ta sti' ta yalel ti c'usi chopole, ta sta svocol xchi'uc.

⁹Ti buch'u mu'yuc c'usi chopol spasoje, mu'yuc xi'el ta xa'i, ja'uc ti buch'u chopol stamoj batele, ta scoj xchopolal ta sta svocol xchi'uc.

¹⁰Ti buch'u quemel no'ox ti sate, muc'tic no'ox ti c'usi chopol ta xc'ot ta pasel yu'une; ti buch'u oy ta ye ta sti' ta yalel ti c'usi chopole, ta sta svocol xchi'uc.

¹¹Ti c'usitic ta xloc' ta ye ta sti' ti buch'u lec yo'ntone, xijcuxi yu'un ti sc'ope, ja'uc ti buch'u mu'yuc xch'ulel xa'i sbae, yo'nton sna' ti ta xve' ya'ie.

¹²Ti ti'emal jolile ta sliques ti letoe, ja'uc ti xc'uxul o'ntonale sna' xch'ay scotol ti c'usi mu lecuc ta xc'ot ta pasele.

¹³Naca ich'el ta muc' ta sta ti buch'u oy ta ye ta sti' ti bijilile; jmoj te' xt'ajluj ta spat ta sta ti buch'u mu'yuc xch'ulel xa'i sbae.

¹⁴Ti c'u yepal staoj ta ojtiquinel ti buch'u oy sbijile, ts'ijil no'ox xchi'uc; ti xbet'bun no'ox yeilal yu'un ti buch'u pimuneb xa'i sbae, ta x'aq'ue ta vocol xchi'uc.

¹⁵Spojobbail ti jc'uleje, ta sc'ulejal no'ox spatoj yo'nton xchi'uc; ti me'un mu'nate, ja' yuni lajeb o ti sal me'un ta j'ech'ele.

¹⁶Ti buch'u oy stuq'uil c'usi ta spase, ja' smoton ti cuxlejale, ja'uc ti buch'u mu'yuc xch'ulel xa'i sbae, naca smul ta scaj-tsobilan.

¹⁷Ti buch'u ta svic' sat yu'un ti tojobtasele, sbelel xcuxlejal stamoj batel, ja'uc ti buch'u stselbun no'ox ti tojobtasele, sbelel xa ch'ayel stamoj batel.

¹⁸Pac'taejbail xal ti buch'u mu xac' ta ilel ti oy sc'ac'al yo'ntone; ti buch'u xpuquet no'ox yu'un ti lo'il maxile, ta scoj mu xa'i sba.

¹⁹Ti buch'u mu tabaj ye sti'e, ta sta smul; ti buch'u ta jech yepal ta spajes ti ye sti'e, oy sbijil.

²⁰T'ujbil plata s'elan ye sti' ti buch'u oy stuq'uile; snopbenal yu'un ti buch'u mu'yuc xch'ulel xa'i sbae, mu'yuc c'usi balinbaj.

²¹Ye sti' ti buch'u oy stuq'uile, yepal no'ox ta staan tojobtasel yu'un, ja'uc ti buch'u pimuneb xa'i sbae, ja' xac' o sjol sbaquil xchi'uc.

²²C'ulejal xal ti sva'anoj sba ti Diose, ma'uc ta xaq'uilan vul o'nton.

²³Ti buch'u pimuneb xa'i sbae, lec xa'i ta spasel ti chopole; ti buch'u oy sbijile, lec xa'i ti bijilile.

²⁴Ti bu jtos ta xi' yu'un ti buch'u mu'yuc xch'ulel xa'i sbae, ja' ta xc'ot ta stojol, ja'uc ti bu juteb ta yo'nton ta sta ya'i ti buch'u oy stuq'uile, ja' ta xc'ot ta stojol.

²⁵Ti buch'u mu'yuc xch'ulel xa'i sbae, ta xch'ay o c'alal ta x'ech' balatuc yu'un ti sutub ic'al vo'e, ja'uc ti buch'u oy stuq'uil yutsile, staoj yav va'al ta xcom.

²⁶Ti buch'u ta stac batel ta abtel jun ch'ajil vinique, jun to pajal vino ta xa'i ta ye ti jtacvaneje, mi mo'oje, jun to jtub satil ch'ail ta xc'ot ta sat.

²⁷Ta xnatij cuxlejal mi xi'tabil ti Diose; ja'uc ti buch'u mu'yuc xch'ulel xa'i sbae, ta xtuch' xcuxlejal.

²⁸Ti buch'utic oy stuq'uilique, ta staic ti smuyubajelique; ti buch'u mu'yuc xch'ulel xa'i sbaique, q'uelel talel ta stojolic ti ta xtub yuni c'oplalique.

²⁹Ti Diose ta stic' sba ta spojel ti buch'u oy slequil ti c'usi ta spasique; ta stubbe sc'oplal ti buch'u yacalic ta spasel ti c'usi chopole.

³⁰Mu'yuc c'usi ta snuptan ta j'ech'el ma' ti buch'u oy yutsil stuq'uile, ja'uc ti buch'u mu'yuc xch'ulel xa'i sbae, mu jaluc ta xch'i ta banomil.

³¹Ti c'usi ta xal ti buch'u oy stuq'uil yutsile, ta x'ayan bijilil yu'un; ta x'ac'bat smac ye ma' ti buch'u mu'yuc xch'ulel xa'i sbae.

³²Jun no'ox yutsil ta a'yibel sc'op ti buch'u oy stuq'uil yutsile; ti buch'u mu'yuc xch'ulel xa'i sbae, naca chopol ta xloc' ta ye.