Read Tzotzil Proverbios 11 Bible Online

Proverbios 11 - Tzotzil bible

Proverbios 11

¹Ti Diose mu'yuc stunel ta xil ti c'usi mu ts'acaluc yalal ta xich' bisele; oy stunel ta xil ti bu ts'acal ti sbisoltaque.

²Ti toyobbail une ta x'ac'van ta q'uexlal; ti buch'u biq'uit ta xac' sbae, oy ta stojol ti bijilile.

³Ti buch'u oy stuq'uil yutsile, tojobtasbil yu'un ti stuq'uile; ti buch'u vinic xa xa'i sba yaloje, ta scoj yuni pac'taobbail ta soques sba xchi'uc.

⁴Mu xa cha'bel xpojvan ti c'ulejal ta yorail ti chapanele, ja'uc ti lequil tuq'uilale, mu x'ac'van ta milel.

⁵Ti lequil tuq'uilale ta stojobtas batel ti buch'u stamojbe ti stuq'uile; ta scoj xchopolil, ta sjip sba ta lum stuc ma' ti buch'u mu'yuc xch'ulel xa'i sbae.

⁶Ti stuq'uile, ja' spojobbail ti buch'u stamojbe ti slequilale; ti jpay-c'opetique, uninbilic yu'un ti sc'upijel o'ntonale.

⁷C'alal ta xcham ti buch'u mu'yuc xch'ulel xa'i sbae, laj tub sc'oplal ec un ti c'usi spatoj yo'nton ta sta ya'ie.

⁸C'alal oy ta vocol ti buch'u stamojbe stuq'uile, ta xpoje yu'un ti Diose, ta sts'ic svocol yu'un ti buch'u mu'yuc xch'ulel xa'i sbae.

⁹Ta sc'op ya'yej ta soques xchi'iltac ti buch'u mu'yuc xch'ulel xa'i sbae, ja'uc sbijil ti buch'u oy stuq'uil yutsile, ta xpojvan.

¹⁰Ti oy no'ox c'usi xloc' x'ayan yu'unic ti buch'u oy stuq'uil yutsile, xmuyubaj no'ox ti jteclume; c'alal ta xcham ti buch'u mu'yuc xch'ulel xa'i sbae, xbitic no'ox ta muyubajel.

¹¹Cajal ta xc'ot sc'oplal jteclum ta sventa viniquetic ti oy slequilalique, ja'uc ti c'usi ta xloc' ta ye sti' ti buch'u mu'yuc xch'ulel xa'i sbaique, ta soquesic.

¹²Ti buch'u mu xa'i sbae, chopol ta xc'opoj ta stojol ti buch'u lec xil sba xchi'uque, ja'uc ti buch'u yich'oj sbijile, ts'ijil no'ox ta xcom xchi'uc.

¹³Ti jlo'iltavaneje, xpuquet no'ox ta alel yu'un scotol, ja'uc ti buch'u sna' stuc'ulan sbae, yo'nton no'ox sna'.

¹⁴Mi mu'yuc jun tuq'uil ajvalile, ta sta svocol ti muc' ta lume, yo' ta sta ti slequilale, ta sventa yepal ti jtojobtasvanej jbijubtasvanejetique.

¹⁵Svocol ta sa'be sba ti buch'u ta sva'an sba ta piarol ta stojol ti buch'u mu xojtiquine, ja'uc ti buch'u mu xac' ta sba ti piarolile, mu'yuc ta vul o'nton ta x'ech' yu'un ti c'ac'ale.

¹⁶Ti ants sna' x'ac'van ta ventae, ta sta ti ich'bil ta muc' ta xc'ote; ti vinic ti xjoybij no'ox ti c'usi ta spase, ta sta ti sc'ulejale.

¹⁷Ti buch'u oy xc'uxul yo'ntone, ti sna' xt'olbije, ta xc'uxubin sba stuc, ja'uc ti buch'u jti'o'nton xa'i sbae, ta sti'olta sba stuc.

¹⁸Naca yijil lo'lael ta sta ti buch'u mu'yuc xch'ulel xa'i sbae, ja'uc ti buch'u stamoj ta spasel ti c'usi leque, mu xch'ay ma' ti matanal yu'une.

¹⁹Mi ta xich' tamel batel ti c'usi lec tuc' ta pasele, cuxlejal xal; mi ta xich' tamel batel ti c'usi naca chopole, lajebal xal unbi.

²⁰Ti Diose chopol ta xil ti buch'u sjolinoj ta spasel ti chopole, ja'uc ti buch'u mu xtabat ti xchopolale, lec x'ile.

²¹Ti buch'u mu'yuc xch'ulel xa'i sbae, ta ono'ox stoj, ja'uc ti buch'u oy stuq'uilique, mu'yuc stijelic ta c'op.

²²Ti jun xot-xot oro ti xojol ta sni' ti chitome, ja' jech c'otem ti ants ti jun xa yutsil ta q'uelel c'alal mu'yuc lec ti snopobil yu'une.

²³Ti c'usi oy ta yo'nton ta sta ya'iic ti buch'u tuc' sjol yo'ntonique, lec ti c'usi ta staique, ja'uc ti buch'u mu xa'i sbaic xchi'uc ti spochanile, j'ac'-c'ac'al o'ntonal.

²⁴Ti buch'u sna' xt'olbijique, x'ech' to ta stabe xq'uexol ti c'u yepal laj yaq'uique, ja'uc ti buch'u mu xt'olbije, st'ut'il no'ox x'ac'un ta vocol xchi'uc.

²⁵Ti buch'u oy slequil yutsil ta stojol ti yane, mu'yuc no'ox c'usi sna'; ti buch'u oy c'usi ta xaq'ue, ja' jech ta sta ec.

²⁶Ti buch'u ta smac ta tsobel stuc ti sat ts'unubile, ta xchopol-c'optaat yu'un ti jnaclejetique, ja'uc ti buch'u ta xchone, ta sta ti lequil c'optabil ta xc'ote.

²⁷Ti buch'u ta sts'acli ta spasel ti c'usi leque, ta sta ti lec x'ilee, ja'uc ti buch'u ta sts'acli ta spasel ti c'usi chopole, yantic no'ox soc batel xchi'uc.

²⁸Ti buch'u spatoj yo'nton ta sc'ulejale, ta xbaj ta lum jech c'u cha'al ta xlilij ti yanal te'etique. ja'uc ti buch'u nijil chimilic ta spasel ti c'usi leque, caj tsacalic no'ox jech c'u cha'al x'uninaj ta q'uelel ti yanal te'etique.

²⁹Ti buch'u mu xtojob ta stuc'ulanel ti snae, jeche' pojol ta xcom; ti buch'u pimuneb xa'i sbae, mosovinbil o ta xcom yu'un ti buch'u oy sbijile.

³⁰Ti lequil tuq'uilale, ta xac' ch'iel c'opojel, ja'uc ti soquemal jol o'ntonale, ta xtuch' cuxlejal une.

³¹Mi ta x'ac'bat stojol li' ta banomil ti buch'u oy stuq'uile, bu xa la mu stabe stojol ec un ti buch'u mu'yuc xch'ulel xa'i sbae, xchi'uc ti jsa'mulile.