Read Tzotzil Proverbios 14 Bible Online

Proverbios 14 - Tzotzil bible

Proverbios 14

¹Ti bijil ants lequil yajval nae, ta stuc'ulan lec scotol, ja'uc ti pimuneb xa'i sbae, ta xc'ot ta soquel yu'un scotol.

²Ti buch'u oy stuq'uil yutsil yo'ntone, sna' xi'ta ti Diose; ti buch'u xitic no'ox yelan ti yuni nopbenal yu'une, mu xac' ta venta.

³Naca toyobbail ta xloc' ta ye ti buch'u pimunebe; ti c'usi ta xloc' ta ye ti buch'u oy sbijile, mu sta c'op xchi'uc.

⁴Ch'abal trigo mi mu'yuc ti j'abtel vacaxetique; ta yabtel j'abtel vacaxetic, ta xlic ch'iuc ti c'usitic xloc' x'ayane.

⁵Mu sjut c'op ma' ti buch'u lequil bats'i rexticoe; ti chopol rexticoe, lec sna' sjut ti c'usi ta xale.

⁶Ti buch'u me'inem spucujile, manchuc mi ta sa' ti lequil bijilile, mi ja'uc ta sta, ja'uc ti buch'u oy sbijile, mu vocoluc ta sta ti c'usi ta sc'ane.

⁷Ch'aco aba ta stojol ti buch'u pimunebe, mu'yuc c'usi xata yu'un ti c'usi ta xloc' ta ye sti'e.

⁸Ti bijilile ta xac'be sna' bu ta stam batel ti buch'u sna' stuc'ulan sbae, ja'uc ti buch'u pimunebe, spimubel xa xve' yu'un.

⁹Ti buch'utic pimunebe, stse'inic no'ox yu'un ti smulique, ja'uc ti viniquetic ti buch'utic oy stuq'uilique, sc'anicuc xa ya'iic ti oyuc ti lequil utsil o'ntonale.

¹⁰Mu'yuc buch'u stac' xcuch yan ti svocol o'ntonale, mi ja'uc ti muyubajel xu' ta xch'am ti yane.

¹¹Ti buch'u mu'yuc xch'ulel xa'i sbae, ma'uc lequil yajval na ta stuc'ulanel scotol, ja'uc ti buch'utic sna' snijan xchiman sbaique, lequil yajval na ta stuc'ulanel scotol.

¹²Oy xa bu lec ta ts'acliel yilel ti bu stamojic batel ti yane c'alal lajel tubel xal oe.

¹³Staoj yav ta x'oc' x'avan ti o'ntonale manchuc mi stse'in xa yilel ta q'uelel ti buch'ue, yu'un mu x'ech' ti svocole.

¹⁴Ma' ti buch'u mu'yuc xch'ulel xa'i sbae, xch'i xc'opoj xa ta xa'i xchi'uc ti c'u s'elan yuni talele, ja'uc ti buch'u oy stuq'uil yutsile ta sta ono'ox ti bu stamoj batele.

¹⁵Ti buch'u pimunebe, tac'al no'ox ta xc'ot yu'un scotol ti c'usi ta x'albate, ja'uc ti buch'u yich'oj sba ta c'ac'ale, ta sq'uel lec ti bu stamoj batele.

¹⁶Ti buch'u oy sbijile, oy xi'elal ta xa'i ti c'usi chopole, mu vocoluc ta xicta comel, mu stic' sba ta spasel, ja'uc ti buch'u pimuneb xa'i sbae, mu slaban sba xchi'uc.

¹⁷Ti buch'u jbel ta c'ope, ma'uc to ta sc'an ti scaj-nopoj ti c'usi ta xloc' ta yee, ja'uc ti buch'u oy sca'alil xpuxulile, smala no'ox ya'i c'usi ta xc'ot ta pasel.

¹⁸Ti buch'u mu'yuc xch'ulelique, ta snijan sbaic ta stojol ti buch'u oy stuq'uilique; ti buch'u mu'yuc slequilique, xvocoletic xa ta snaic ti buch'u oy stuq'uilique.

¹⁹Ti buch'u mu'yuc xch'ulelique, xnupuletic xa ta stojol ti buch'u oy stuq'uilique; ti buch'u mu'yuc slequilique xvocoletic xa ta snaic ti buch'u oy stuq'uilique.

²⁰Ti me'un mu'nate, ma'uc xa lec x'ile yu'un ti buch'u lec xil sbaic xchi'uque, ja'uc ti jc'uleje, yepal no'ox oy buch'u lec xil sbaic xchi'uc.

²¹Ti buch'u ta sjip ta sten ti buch'u lec xil sbaic xchi'uque, oy smul, ja'uc ti buch'u ta xc'uxubin ti me'un mu'nate, mu'yuc c'usi sna'.

²²Ti buch'u stamojic ta spasel ti chopole, ch'ayemic ta be, ja'uc ti buch'u stamojic ta spasel ti c'usi leque, staojic ti c'uxubinele, ti lec sc'oplalique.

²³Scotol ti c'usi ac'bil yipal ta sa'ele, xloc' venta; mi naca vulvunel ta x'ech'e, mu sal me'unal xal.

²⁴Ti buch'u oy sbijile, srona c'otem yu'un ti lec snopobile; spimubel xve' yu'un ti buch'u pimuneb xa'i sbae.

²⁵Ti tuq'uil rexticoe, ta stic' sba ta spojel ti yane, ja'uc ti jut c'op rexticoe, ac'vanej ta milel.

²⁶Ti xi'tabil ti Diose, j'ech'el oy patob o'ntonal ti mu'yuc c'usi xal o'ntonal xchi'uc ti alab nich'nabe.

²⁷Ti xi'tabil ti Diose, cuxlejal xal ta j'ech'el, mu sts'otvan ta xch'ojon ti lajebale.

²⁸Ti yepal no'ox sventainoj ta sventainel ti ajvalile, ja' yich'el ta muc' xchi'uc; mi uni juteb sbainoj ta sventainele, mu vocoluc ta xc'ot ta lilijel xchi'uc.

²⁹Ti buch'u oy sts'iquemal yu'une, svinajeb ti oy lec snopbenal yu'une; ti mi mu'yuc sts'iquemale, mu vocoluc ta xvinaj ti uni pochanile.

³⁰Mi lamajem ti jolile, ch'iel c'opojel xal, ja'uc ti yit'ixal o'ntonale, c'alal to ta yol baquetic ta slilin.

³¹Ti buch'u ta xilbe svocol ti me'un mu'nate, ta soquesbe yo'nton ti Buch'u ac'bun xch'ulele, ja'uc ti buch'u sna' xc'uxubaje, ich'bil ta muc' ta xc'ot yu'un ti yajvale.

³²Ti buch'u mu'yuc xch'ulel xa'i sbae, ta scoj xchopolal ta soques sba; ti buch'u sna' stuc'ulan sbae, ich'bil ta muc' ta xc'ot yu'un.

³³Ti bijilile oy ta stojol ti buch'u xa'ibe xchiquinale; ti buch'u pimuneb xa'i sbaique, mi juteb oy ta stojolic.

³⁴Ti oy stuq'uilal ta xich' pasele, stuc xa no'ox mu'yuc buch'u xtaun ta xa'i ti jteclume; ti naca mulile, q'uexlal xal.

³⁵Ti jtunel ti xjoybij no'oxe, ta sta ti lec ta x'ile yu'un ti ajvalile; ti buch'u mu xjoybij une, ta sta ti iltabil ta xc'ote.