Read Tzotzil Proverbios 15 Bible Online

Proverbios 15 - Tzotzil bible

Proverbios 15

¹Ti xlamet no'ox ta taq'uel ti c'ope, ta xlamaj ti sti'emal jolile; mi ta tac'obil no'oxe, xchi'il xa yich' o unbi.

²Naca bijilil oy ta ye sti'ic ti buch'u oy sbijilique; ti buch'utic pimunebique, naca sbolil ta xalic.

³Ti buch'u oy stuq'uilique, ti buch'u chopolique; ilbilic lec yu'un Dios ti buyuc no'ox oyique.

⁴Jtec' cuxlejal te' c'otem ti buch'u xlamet no'ox ti sc'op sti' c'usi ta xale; ti xbet'bun no'ox ti eile ta soques o'ntonal.

⁵Ti buch'u pimuneb xa'i sbae ta sbaj ta sjip ti tojobtasel yu'un ti stote; ti buch'u ta xac' ta ventae, ta xvinaj ta stojol ti oy sbijile.

⁶Yepal no'ox oy c'usi x'ayan ta sna ti buch'u oy stuq'uile, ja'uc ti buch'u mu'yuc xch'ulel xa'i sbae, mu xjalij ti c'usi oy ta snae.

⁷Ti buch'u oy sbijilique, naca bijilil ta spucbeic sc'oplal; ti buch'u pimunebique, chopol ta xc'ot ta loq'uel yu'unic ti c'u s'elan ta xac' ti sjolique.

⁸Ti Diose, j'ac'-ib-o'ntonal ta xil ti matanal ta xaq'uic ti buch'u mu'yuc xch'ulel xa'i sbaique; xmuyubaj xchi'uc ti sc'opojel sti'inel ti buch'u oy stuq'uil sjol yo'ntonique.

⁹Mu ts'icbaj ta xa'i Dios stalelic ti buch'u mu'yuc xch'ulel xa'i sbaique; mu tuch'baj ta yo'nton ta xa'i ti buch'u oy stuq'uil xcuxlejale.

¹⁰Tsots ta xich' tojobtasel ti buch'u ta xicta comel ti lequil bee; ti buch'u ta sjip ta sten ti tojobtasele ta xcham.

¹¹Ti Diose, chajal ta sba ta sat ti chamel lajebale, xchi'uc ti muquinale, bu xa van mu chajaluc ta sba ta sat ti c'u s'elan ta snop ti jujune.

¹²Ti buch'u pimunebe mu junuc yo'nton xchi'uc ti buch'u ta xtojobtasvane, mi ja'uc ta sco'oltas yo'nton xchi'uc ti buch'u oy sbijile.

¹³Mi xmuyubaj no'ox ti o'ntonale, stse'et no'ox ti satile; mi soquem ti o'ntonale, sac pac'an no'ox ti satile.

¹⁴Ta sna' ya'i scotol ti buch'u oy sbijile, ja'uc ti buch'u pimuneb xa'i sbae, yac'oj no'ox sjol ta spasel ti chopole.

¹⁵Scotol no'ox c'ac'al chopol ta xa'i ti buch'u oy ta vul o'ntone; scotol no'ox c'ac'al q'uin ta xa'i ti buch'u xmuyubaj no'oxe.

¹⁶Ja' xitic no'ox ti c'ulejale, mi ja' xi'tabil ti Diose, manchuc mi jc'ulej mi mu albajuc oy ti vocole.

¹⁷Ja' xu' to ti oy c'uxulile, c'uc cha'al mi uni itaj ti ve'lile, c'uc cha'al mi naca beq'uet xe'el c'alal ta sti'emal scapemal ta xlaje.

¹⁸Ti buch'u jbel ta c'ope, ta sliques leto; ti buch'u oy sts'iquemal xcuchemal yu'une, ta spajes c'op.

¹⁹Ti buch'u ch'aj xa'i sbae, oy xch'ixal ta xa'i ti c'usi sc'an pasele; ti buch'u baxbole, jac'al no'ox yo'nton xchi'uc ti c'usi sc'an pasele.

²⁰Ti bijil nich'onile, xmuyubaj no'ox yu'un ti stot sme'e; ti pimil nich'onile ta sa'be sti'ol ti stot sme'e.

²¹Ti buch'u pimunebe, spimubel xve' yu'un; ti buch'u oy sbijile, ta sq'uel sba ti bu stamoj batele.

²²Mi mu'yuc jac'bil a'yej ti c'usi sc'an pasele, ta xch'ay ta be; naca xu' no'ox ti c'usi nopbile ta sventa ti epal jbijubtasvanejetique.

²³Xcuxet to banomil yu'un ti mu'yuc stselbuj ti c'usi laj yich' alel ti juteb ono'ox oy ta o'ntonale.

²⁴Muyebal stamoj batel ma' ti sbelel cuxlejale, ma'uc muquinal stamoj ma' ti buch'u oy sbijile.

²⁵Ti Diose sicotan ta xictabe comel sna ti buch'u toyobbae; sva'anoj sba ta stojol ti c'usitic x'ayan yu'un ti me'unal antse.

²⁶Ti Diose mu ts'icbaj ta xa'i c'u s'elan xchapanoj ti buch'u mu'yuc xch'ulel xa'i sbae; jun yutsil ta xil ti c'usitic lec ta xloc' ta eale.

²⁷Ti buch'u lec xa xa'i ti sc'upijel yo'ntone, mu xtojob ta sventainel ti snae; ti buch'u mu stsac ti mich'ob c'abale, ta xch'i xc'opoj.

²⁸Ti buch'u oy stuq'uile ta snop lec c'u s'elan ta xtac'av; ti buch'u mu'yuc xch'ulele, mu tabaj ti c'u s'elan ta staq'ue.

²⁹Ti Diose ta xch'ac sba loq'uel ta stojol ti buch'u mu'yuc xch'ulel xa'i sbaique, le' une, ta xa'ibe sc'opojel sti'inel ti buch'u oy yutsil stuq'uilique.

³⁰Ti ts'ililic no'ox ti satile, xmuyubaj to ma' ti o'ntonale; xac' to yip o'ntonal, ma' ti lequil c'op a'yeje.

³¹Ti buch'u ts'etel xa xchiquin ta xa'i tojobtasel ti sventa cuxlejale, ta sta ti jmoj ta xc'ot xchi'uc ti buch'u oy sbijilique.

³²Ti buch'u ta sbaj ti tojobtasele mu xc'uxubin sba; ti buch'u ts'etel xa xchiquin ta xa'i ti tojobtasele, ta sta yuni bijil.

³³Ti buch'u ta xi'ta ti Diose, yacal ta stael ech'el ti sbijile; ta xich' ich'el ta muc' ti buch'u biq'uit ono'ox yac'oj sbae.