Read Tzotzil Proverbios 17 Bible Online

Proverbios 17 - Tzotzil bible

Proverbios 17

¹Jun yutsil mi lamajem c'op yu'un ti o'ntonale, manchuc mi jpech cha'pech uni yijil vaj ta xich' lajesel. ¿C'usi bal o mi xlic xcaj no'ox q'uin mi ja' sliqueb ti sts'otet no'ox liquel ti letoe?

²Ti bijil jtunele ta xlic spas ta mantal ti toyobba nich'onile. C'alal ta xich' xrextoic ti queremetique, ti bijil jtunele ta xich' comel xrexto jech c'u cha'al ti queremetique.

³Ti oroe, ti platae, ta c'oc' ta xvinaj mi staoj yav ja' bats'i oro, plata; ti Diose sbainoj ta slajeltsael bu oy ti o'ntonale.

⁴Ti buch'u mu'yuc xch'ulelique, xchi'uc ti jut c'ope, toj c'otel ta yo'ntonic ti c'usi chopol ta xich' alel ta xa'ie.

⁵Ti buch'u ta sna'le ti me'on mu'nate, ta soquesbe yo'nton ti Buch'u ac'bun xch'ulel yanimae; mu q'uelbiluc no'ox ta xcom ti buch'u xlabaj xa xchi'uc svocol ti yane.

⁶Mu xa buch'u xtaun o ta xa'iic ti muc'tot yayaile, ja' ta sventa ti smamobtaque; mu xa buch'u xtaun o ta xa'iic ti alab nich'nabe, ja' ta sventa ti stot sme'ique.

⁷Ti buch'u pimunebe, mu'yuc stu ta xa'i ti c'usitic jun yutsil ta xich' alele, jech ec ti buch'u tsots yabtel yich'oj ti xa'ibe lec xchiquinale, mu'yuc lec ta xa'i ti jutbil c'ope.

⁸Ti buch'u ta xac' jelavel ti mich'ob c'abale, ja' yip stsatsal ta yaluvanej, yu'un lec ta xc'ot ta loq'uel scotol ti c'usi ta spase.

⁹Ti buch'u mu stic' ta yo'nton ti oy c'usi chopol ta xc'ot ta pasele, ta sta ti lec x'ilee; ja'uc ti buch'u ta stic' ta yo'nton ti c'usi chopol c'otem ta pasele, laj c'op ti oy buch'u ta xnopaj ta stojole.

¹⁰Tojob ta juteb vulel ti buch'u bije, laj ya'i sba, ja'uc ti buch'u pimunebe, manchuc mi ta xich' vo'vinic (100) ta moj nucul, stselbun no'ox.

¹¹Ti capemal jolile, me' leto xa'i sba, le' une, ta xtacbat talel ta stojol ti cuxul j'ilbajinvanej j'ac'-vocole.

¹²Ja' xi smuc'ul ta xich' nupel ta be jcot jcapemal jol me oso, ja' x'ech' to xchopolal ti oy c'usi ta spas ya'i ti buch'u pimunebe.

¹³Ti buch'u ta chopol ta spac sutel ti oy c'usi lec pasbate, j'ech'el staoj yav mu x'ech' xjelav ti svocol ta sna sculebique.

¹⁴Ti leto ta xlique, ja' xchi'il jun yoc uc'um ta xt'om; ta lec no'ox, tam xi loq'uel yo' mu to xc'ac'ub ti c'ope.

¹⁵Cha'tos ti c'usi mu ts'icbaj ta xa'i ti Diose: ti q'uelbil no'ox ti buch'u oy smule, ti ja' j'ech'el ch'ab xi sc'oplal ti buch'u jech'e muts'ul sate.

¹⁶¿C'u cha'al xjopet xa xchi'uc staq'uin ta sman sbijil ti buch'u pimunebe, ti c'alal mu ono'ox xchiquintae?

¹⁷Mu sna' xlaj slequil yo'nton ta stojol ma' ti buch'u lec xil sbaic xchi'uque, co'ol s'elan xchi'il sbaic ta voq'uel c'alal yorail oy ti vocole.

¹⁸Ti buch'u mu'yuc sbijil ta sva'an sba ta piarol sventa ti buch'u lec xil sbaic xchi'uque, cajal ta xcom ta sba ti ilile.

¹⁹Ti buch'u sa'sun no'ox ta sliquesel ti c'ope, me' leto xa'i sba; ti buch'u xtoyet xa'i sbae, svocol ta sa' stuc.

²⁰Ti soquem no'ox ti snopbenale, j'ech'el mu sc'upin ti c'usi leque; ti buch'u xbet'bun no'ox ti yee, ta ono'ox sta svocol.

²¹Mi pimuneb loc' xnich'on ti totile, naca svocol ta sta xchi'uc; mi xcajet xtoyet loc' xnich'on ti totile, mu'yuc xmuyubaj yo'nton xchi'uc.

²²Lequil poxil c'otem ma' ti xmuyubaj no'ox ti o'ntonale; mi uni jchibal c'op no'oxe, ta xlubtsaj ta be xchi'uc.

²³Ti buch'u mu'yuc xch'ulele, lec xa'i ta mucul ta stsac ti mich'ob c'abale, yo' ta syanijesbe sc'oplal ti lequil tuq'uil chapanele.

²⁴Ti buch'u baxbole, batem ta yo'nton ta stael ti bijilile; ti buch'u pimunebe, xtal xbat no'ox ti snopbenal yu'une.

²⁵Ta sta svocol scapemal yu'un stot ti pimil nich'onile.

²⁶Ti buch'u mu'yuc smule mu xc'ot o ta xac' smulta; mu xc'ot o ta xich' tsitsel ti buch'u oy stuq'uile.

²⁷Ti buch'u sbisoj c'u s'elan ta xc'opoje, oy sbijil; ti buch'u ts'ijil no'ox ta smala ya'ie, oy sbijil.

²⁸Mi sts'ijet no'ox, mi mu'yuc c'usi ta xal ti buch'u pimunebe, ta x'albat sc'oplal ec un ti oy sbijile.