Read Tzotzil Proverbios 18 Bible Online

Proverbios 18 - Tzotzil bible

Proverbios 18

¹Ti oy xa ta tael yu'un ti c'usi ta xale, ja' ochem ta sa'el ti c'usi ta xtun yu'un ti stuque, mu xich' ta muc' scotol ti lequil bijubtasele.

²Ti buch'u pimunebe mu x'och ta yo'nton ti bijubtasele, c'ajomal no'ox xcajet xtoyet xchi'uc ti c'usi sna'e.

³Ta x'ac'van ta q'uexlal ma' ti c'usi chopole; mu'yuc xa ich'el ta muc' yu'un ma' ti toyobbaile.

⁴Ti c'u s'elan ta xloc' ta alel yu'un sbijil ti vinique, jun to snabil vo' s'elan, mi joc', mi uc'um ti x'oquin no'ox ti yoque.

⁵Mu xc'ot o ta lequil jchapanvanejetic ti ja' no'ox ta spacbeic sc'oplal ti buch'u oy smule, ti mu xchiquintabe sc'op ti buch'u mu'yuc smule.

⁶Ta ye no'ox stuc ta stic' sba ta c'oc' ti buch'u pimunebe; ta yuni lo'il no'ox stuc ta sta jisel ta nucul.

⁷Ta ye no'ox stuc ta soques sc'oplal ti buch'u pimunebe; ta xchuc o snuc' stuc ti c'usitic ta xloc' ta yee.

⁸Chi' poj xa yutsil ta a'yiel ma' ti lo'iltavaneje, c'alal ta yut o'ntonal ta xc'ot ta j'ech'el un.

⁹Slac' xa sbaic ti buch'u ch'aje xchi'uc ti j'ac'vanej ta vocole.

¹⁰Ti buch'u oy slequilique ta sa' spojelic ta jun tsatsal toyol luchlebal ti ja' stuc ti Diose.

¹¹Ti jc'uleje c'otem ta yo'nton ta xpoje yu'un ti sc'ulejale, jech c'u cha'al junuc jteclum ti yich'oj toyol smocal ta joyobe.

¹²C'alal oy ti toyobbaile, oy vocol; oy c'usi lec ta xich' tael mi oy ti nijil chimilulile.

¹³Pimubel q'uexlal xal o ti xtac'tun no'ox liquel c'alal mu'yuc to ya'yioje.

¹⁴Mu stsale ma' ti jchamel mi ta to stam sba ya'i liquele. ¿Buch'u la xu' ta svatsanun liquel mi mu stam sbae?

¹⁵Ti buch'u oy sbijilique xchi'uc ti sna'ic snopele, ta staic ta yojtiquinel ti c'usi yac'ojbeic yipal ta sa'ele.

¹⁶Ta naca matanal ta xjam ma' ti ti'naetique, xata no'ox ta c'oponel ti buch'u spajeb xa tsots yabtel yich'oje.

¹⁷Stuq'uil xa yilel ma' ti buch'u ba'yel ta xlic spac ti sc'oplale; ta xbaj ta c'oc' c'alal ta xlic svul sbaic xchi'uc ti scontrae.

¹⁸Ti chapanel yu'un ti Buch'u oy ta toyole, ta xc'ot ta tsutsel yu'un ma' ti c'op une.

¹⁹Ti jun jteclum bajal lec ta moque, ja' stac' to c'usi utel, ja'uc ti buch'u laj soques o'ntonale, mu cha'beluc xcha'lecub, yu'un ti naca letoe, ta xnamajic batel ta jujun.

²⁰Smalauc no'ox ya'i c'usi ta xc'ot ta stojol ti buch'u lec xa'i bet'bunel ti yee.

²¹Ti lajel tubele, xchi'uc ti ch'iel c'opojele, ja' ti c'u s'elan ta xloc' ta eile; ti buch'u ech'em ye sti' xa'i sbae, ta sta svocol xchi'uc.

²²Ti buch'u nupij tsaquije, laj xa sta ti mu'yuc c'usi sna'e, yu'un laj sta xc'uxubinel yu'un ti Diose.

²³Xvocolet no'ox ma' ti me'un mu'nate; cajal ye sti' ta xtac'av ma' ti jc'uleje.

²⁴Oy buch'utic lec x'ilvanic ti ta jech no'ox yepal mu xa xc'opojic liquele; oy buch'utic x'ech' to yutsil stuq'uil yo'nton, ja' xcom ta be yutsil ti xchi'il sbaic ta voq'uele.