Read Tzotzil Proverbios 20 Bible Online

Proverbios 20 - Tzotzil bible

Proverbios 20

¹Yabtel ti vinoe, mi juteb xa oy ta na'el yu'un ti c'usi xloc' ta pasele; ti q'uixin uch'bolaletique, liquesej c'op sna', yu'un c'alal stsinet xa ti jolal yu'une, mu'yuc xa tuq'uil melolil.

²Co'ol s'elan jcot león xloquet no'ox snuc' c'alal capem sjol ti ajvalile; ti buch'u ta sa'be sjole, yu'un ta'lo xa'i ch'iel c'opojel.

³Yich'el ta muc' xal ti buch'u ta snit sba ta sa'sunel ti c'ope, ja'uc ti buch'u pimunebe stic' no'ox sba ech'el.

⁴C'alal yorail ta xich' loquel ti banomile, mu sloc banomil ma' ti buch'u ch'aj une; c'alal yorail ta xich' tsobel ti ts'unubale, yo'ntonuc xa ya'i jechuc ec un.

⁵Ti c'usi mucul yu'un ti snopbenale, c'otem jech c'u cha'al sninabil vo' ti mu xvinaj bu c'alal oye, ja'uc ti buch'u oy sbijile, xt'un yu'un ti smelole.

⁶Yepal no'ox ta sbis sbaic ma' ti oy stuq'uil yalojique, mi junuc oy buch'u stac' patel o'ntonal ta stojol.

⁷Mu'yuc c'usi sna' ta xcom yu'un yalab xnich'nab ti buch'utic lec nijil chimilic ech'ic ta banomile.

⁸C'alal chot xi ti ajvalil ta chapanobbaile, ta sat no'ox ta sq'uel yo' ta xtuch'be yip ti bu chopole.

⁹Mu'yuc ma' ti oy buch'u xu' xi ta xal une: “Lec co'nton ta j'ech'el, mi jts'ujucun ta mulil.”

¹⁰Cha'tos ma' ti xi s'elan mu lecuc ta sq'uel ti Diose: ti mu ts'acaluc ti ta yalal ta xich' bisele, ti mu ts'acaluc ti ta jaxbil ta xich' bisele.

¹¹Ta stalel no'ox ta xvinaj mi oy slequil stamoj ta spasel ti querem vinique.

¹²Ti Diose laj yac' chiquinil ta a'yiel ti c'ope, xchi'uc satil ta sq'uelel ti osile.

¹³Ti mu xc'ot ta atojol ti me'un mu'natile, mu xajavetuc ta vayel ta x'ech' avu'un ti c'ac'ale; tijo ach'ulel avanima mi ta xac'an yepal no'ox oy ave'el avuch'ome.

¹⁴“Ma'uc lequil bolomal ma' li'e”, xi ta xal ti jmanolajele, ja'uc mi laj xa sman une, xmuyubaj xa liquel xchi'uc.

¹⁵Ti buch'u oy sbijil ta xlo'ilaje, cajal sc'oplal ta j'ech'el; peq'uel com scotol sc'oplal ti oroe, xchi'uc ti c'usitic jun yutsiquil oy ta banomile.

¹⁶Ti buch'u ta sva'an sba ta piarol yu'un ti buch'u mu ojtiquinbaje, c'anbo comel ta rental ti sc'u'e.

¹⁷Ti buch'u xyal o xchi'uc ta xa'i ta slajesel ti xitic no'ox staoje, sna' to me ya'i ti co'ol s'elan lum noj ta ye ta ts'acale.

¹⁸Ta stsac lec yip ti c'usitic ta xich' nopele ta sventa ti oy lec bijubtasele; xu' tsalvanej ta leto mi nopbil bu ch'ambilic ta xc'ot ta bee.

¹⁹Ti jlo'iltavaneje mu xmuc yu'un ti c'usi ta xa'ie, ja' yu'un un, mu xanupin ajol xchi'uc ti jlo'iltavaneje.

²⁰Ti buch'u ta sbis ta cotol chaval ti stot sme'e, ic'uneb ma' ti osil banomil ta j'ech'el xc'ot ta tsutsel ti xcuxleje.

²¹Ti c'usi mu ta vocoluc laj yich' tael ta sliquebe, ta ts'acal un, mu xa xac' muyubajel.

²²Ma'ucuc aveinoj ta yalel ta spaquel sutel; pato avo'nton ta stojol ti Diose, jtsalvanej ta xac'ot yu'un.

²³Ti Diose mu lecuc ta xil ti mu'yuc ts'acal ti c'usi chechbil ta xich' bisele, xchi'uc ti c'usi cunanbil ta xich' bisel ti mu'yuc ts'acale.

²⁴Tojobtasbil yu'un Dios bu ta stam batel ti vinique; mu'yuc buch'u sna' ti c'usi ta xc'ot ta stojole.

²⁵Xi'bal sba ti yac'oj xa ye ti vinic oy c'usi ta xac'be Dios c'alal ta xlic xcha'na' ti c'usi yaloj ta xaq'ue.

²⁶Ti ajvalil ti oy lec sbijil xa'i sbae ta sjipan loq'uel ta stojol ti buch'u mu'yuc xch'ulel xa'i sbaique, xchi'uc ta x'ech' snel ta scarreta.

²⁷Ti vinique, ac'bat xch'ulel yanima yu'un ti Diose, xojobin no'ox co'ol s'elan saquilal osil ti oy ta sjunule.

²⁸Ti ajvalile j'ech'el stsinanoj sba ta spasob mantal c'alal yacal ta spasolanel ti xc'uxul o'ntonale, melel ti sc'ope.

²⁹Ti mu'yuc xa buch'u xtaun ta xa'i ti queremetique, ja' ti oy to yipal yu'unique; yich'el ta muc' ti moletique, ja' ti sac chijanic xae.

³⁰Mi c'ux c'uxtic ti tojobtasele, ta stam stuq'uil ti buch'u mu'yuc xch'ulel xa'i sbae; ti sjisluj slajele, ta xtuq'uib ti snopbenale.