Read Tzotzil Proverbios 22 Bible Online

Proverbios 22 - Tzotzil bible

Proverbios 22

¹Ja' xi to smuc'ul ti cajal ti c'oplalile, ti ich'el ta muq'ue, ja' mu sta sc'oplal manchuc mi busul no'ox ti oroe, ti platae.

²Xi s'elan co'olic ti jc'uleje xchi'uc ti me'un mu'nate: yu'un xchibalic ac'bil xch'ulelic yu'un ti Diose.

³Ti buch'u xa'i sbae mu stic' sba ta spasel ti bu xi'bal sba ta xile; ti buch'u mu xa'i sbae, xvelet no'ox batel ta sa'el ti yuni vocole.

⁴C'ulejal, ich'el ta muc, ch'iel c'opojel xal o, yabteltac ma' ti nijil chimilulil ta xi'tael ti Diose.

⁵Naca pets' cotajtic bu stamoj batel ti buch'u mu'yuc xch'ulel xa'i sbae, ja'uc ti buch'u mu to tuch'baj ta xa'i ti xcuxleje, ta stuc'ulan sba yo' mu sta svocol.

⁶Avi tana li'e, tojobtaso ti olol ti tuc'uc stamuc batele, mu xch'ay ta yo'nton ta spasel ti leque manchuc mi mol xa un.

⁷Ti jc'uleje, c'otem ta ajvalil xa'i sba ta stojol ti me'un mu'nate; ti buch'u ta xac' ta ch'om ti staq'uine, c'otem ta smosovtac ti jch'om-taq'uine.

⁸Ti ta xchanubtasvan ta yaq'uel iluc ti chopole, ja' jech ta xich' ec; ta scapemal ta soquemal yo'nton Dios, j'ech'el ta xtubbat sc'oplal.

⁹Ti buch'u ta xac' iluc yutsilal yo'nton ta stojol ti yane, ta sta c'uxubinel ta sventa ti laj yac'be ta ye ta sti' ti me'un mu'natetique.

¹⁰Mi tacbil ta xloc' ti buch'u mu xa'i sbae, laj ti contrainej baile, laj sc'oplal ti xlic xcaj no'ox ti leto ti ta soquesvane.

¹¹Ti ajvalile lec ta xa'i ti oy yutsil slequil ti o'ntonale; jech xtoc ta xac' ta ilel slequil yo'nton ta stojol ti buch'u oy stuq'uil ti sc'ope.

¹²Yac'oj sat ti Dios ta stojol ti buch'u oy sbijile; ta stselbunbe sc'op ti buch'utic lec xa'iic sjutel ti c'ope.

¹³Ti ch'ajil vinic ti mu sc'an x'abteje, xvulvun xa liquel ti oy león ta be ti ta xmilune.

¹⁴Natil joc' s'elan ye sti' ti jlo'laej vinic antse, ti bu ta xc'otic ta bajel ti buch'u bisbilic ta cotol chaval yu'un ti Diose.

¹⁵Ti bolibele ja' stalel ti ololetique, ja'uc mi ta xich' tojobtasele, ta xlic yich' smelol.

¹⁶Ti buch'u ta sventa slubel xchamel yoc sc'ob ti me'un mu'nat laj sta ti sc'ulejale, ti naca sq'uelan no'ox ta stojol ti jc'uleje, xbat ta yoc xchi'uc.

¹⁷Ts'etano achiquin ta ya'yiel slo'il ya'yejic ti buch'u yacal ta yalel ti oy xi x'ale ti c'ope; batuc avo'nton ta snopel ti c'u s'elan laj xchanubtasote.

¹⁸Jun yutsil ta xava'i yu'un ti bejel ta avo'ntone, ti jmojuc jcha'altic jcotoltique.

¹⁹Ta xcalbot ava'i tana li'e yo' ta xlic apat avo'nton ta stojol ti Diose.

²⁰Ta aventa laj jts'iba lajuneb xcha'vinic (30) ta bel ti c'ope, sventa atojobtasel ta sna'el ti c'usi leque,

²¹ta sventa achanubtasel ta yojtiquinel ti melele, ti chapetuc no'ox avu'un ta yalel ti buch'u ta sjac'bote.

²²Mu xavilbe svocol ta yilbajinel ti buch'u me'un mu'nat ta scoj ti sme'unale; mu xavic' ta stojol jchapanvanejetic ti buch'u mu'yuc c'usi xut sbae.

²³Ta xpoje yu'un Dios; ta x'ac'bat stoj ec ti buch'u ta xilbe svocol ti me'un mu'nate.

²⁴Mu xanupinbe sjol ti buch'u soquet ta xa'i ti banomile, xchi'uc ti buch'u ta x'ac'van ta vocole,

²⁵naca mi xachan ti c'usi chopol ta spase, ti ta xavac' o ajol abaquil xchi'uque.

²⁶J'ech'el mu xacajan ta aba ta stojbel yil ti yane,

²⁷c'alal ta atem ta spojic batel unbi mi mu xtoj avu'une.

²⁸Mu me xajelbe yavil ti ts'aquetic c'u s'elan laj yaq'uic comel ti amolmuc'totac ta vo'nee.

²⁹Ti buch'u lec ta spas yabtele, oy ta tunel ta stojol ti ajvalile, ma'uc ta xtunic ta stojol ti buch'u xocol viniquetic no'oxe.