Read Tzotzil Proverbios 23 Bible Online

Proverbios 23 - Tzotzil bible

Proverbios 23

¹C'alal ic'bilot yu'un jun vinic ti cajal sc'oplale, nopo ava'i lec un buch'u oyot ta stojol.

²Manchuc mi ta xavi'naj xa, mala o no'ox ava'i.

³Mu xbic'taj avo'nton yu'un yutsiquil ti sve'ele, xu' ti naca no'ox ta slo'laote.

⁴Tsotsan xa no'ox ava'i mi ta xac'ot ta jc'ulej une, pajeso aba ta vul o'nton yu'un.

⁵Ta xlic avil ti ch'abal ac'ulejal mi ta xanop leque, co'ol s'elan oy xic', ech'el no'ox ta x'ech' jech c'u cha'al xvilet jelavel ti muc' ta xique.

⁶Mu xachoti ta sts'el xmexa ti buch'u mu xt'olbije; mu xbic'taj avo'nton yu'un yutsil ti sve'ele,

⁷co'ol s'elan tsotsil jolil ta spac sba ta nuq'uil; ma'uc ma' ti yut xa yo'nton ta xayic' ta ve'el ta uch' vo'e.

⁸Ts'acal to un, xacha'na' xa ti jech lave'e, mi jutebuc tun ti xlamet lac'opoj ta stojole.

⁹Ch'ay c'ac'al xal ma' ti batem xa avo'nton ta sc'oponel ti buch'u mu xa'i sbae, ta xlabaj xchi'uc ti c'usi jun yutsil ta xavalbee.

¹⁰Mu xajelbe yavil ts'aquetic c'u s'elan laj scomtsanic ti totil me'iletique; mu xapojbe yosil sbanomil ti buch'u mu'yuc buch'u x'ayan yu'unique.

¹¹Ti stuquique oy jun Muc'ul Jpojvanej yu'unic ti ta stic' sbae; ta scontrainot un c'alal ta spacbe ti sc'oplale.

¹²Bejeluc ta avo'nton, oyuc ta achiquin ti c'u s'elan laj avich' albele, xchi'uc ti c'u s'elan la'ac'bat ana' talele.

¹³Mu xavicta aba ta stojobtasel ti buch'u jch'iel jc'opojele, mu x'aq'ue ta lum ach'el yu'un ti tojobtasele.

¹⁴Mu aq'uelojuc no'ox ta xcham xlaj ti ta xatojobtase, yu'un ta xapoj loq'uel talel ta lajel tubel ti jech ta xatojobtase.

¹⁵Mi laj ata ti abijile, cuni nich'on, mu xa no'ox buch'u xtaun o ti ximuyubaje.

¹⁶Ximuyubaj no'ox avu'un ta j'ech'el c'alal ta xca'i ti naca oy smelol ti c'usi ta xavale.

¹⁷Mu xati'olta ti jsa'muliletique; c'otuc o ta avo'nton xi'tao ti Diose.

¹⁸Va'i unbi, lec ta xc'ot ta loq'uel ti acuxlejale, mu xmac ta be ma' ti oy c'usi apatoj avo'nton ta xatae.

¹⁹A'yio, ts'etano achiquin, oyuc abijil, cuni nich'on; ac'bo yipal ta stamel batel ti lequil bee.

²⁰Mu xacap aba ta voletel xchi'uc ti jyacubele, mi ja'uc ti buch'utic mu spajes sbaic ta ve'ele.

²¹Yu'un ti jyacubele xchi'uc ti xyalic o ta ve'el uch' vo'e, ta xac'be sba svocolic, jech ec ti buch'u ch'aj xa'i sbaique, lajem xa ti sc'u' slapojique.

²²Ich'bo ta muc' sc'op atot ti la'ayan talel yu'une; c'alal mi yayilub xa ti ame'e, mu xajip xaten.

²³T'uno ta sa'el ti bu melele, ti abijile, ti chanubtasele, xchi'uc ti snopbenale, mu aq'uelojuc ta xbat avu'un ta yan un.

²⁴Ti lequil bijil nich'onil yu'un ti totile, oy smelol ti xmuyubaj no'oxe, ti mu'yuc xa buch'u xtaun o ta xa'ie.

²⁵C'otuc ta pasel avu'un un cha'e ti stuc xa no'ox jech ta xa'iic ta yo'ntonic ti atot ame' ti xmuyubajique, ti mu'yuc xa buch'u xtaun o ta xa'iique.

²⁶Ts'etanbun ani' achiquin ta ya'yiel ti c'usi ta xcalbote, cuni nich'on, q'uelo ti c'u s'elan jtamoj ech'ele.

²⁷Ti jlo'laej vinic antse, ti sna' sbolomalin sbae, co'ol s'elan jun natil joc' ti yubul no'ox ti sti'e.

²⁸Xnaq'uet xa ta xloc'obinvan jech c'u cha'al ta spas ti j'eleq'ue, yepal no'ox ta xch'ay ta be yu'un ti viniquetique.

²⁹¿Buch'u ta scoj ta sta ti svocole? ¿Buch'u ta scoj ti x'ijet xchi'uc ti yipale? ¿Buch'u ta scoj ti xc'anobaj no'ox ti letoe, ti xnechet no'ox oq'uel yu'une? ¿Buch'u ta scoj ta jeche' no'ox laj sta ti yayijesele? ¿Buch'u ta scoj ti ic'-c'o'anic xa ti sate?

³⁰Taje, ja' ti buch'u mu xicta ti uch'ubajele, ti yac'ojbe yipal ta sa'el ti c'usitic xa yan stac' uch'anele.

³¹Mu me ta aveuc xa ava'i c'alal ta xavil ti vinoe. Ti sts'ayayet xa yutsil stsajal ta q'uelel ti ts'anal ta bise mu ta vocoluc sts'abet no'ox yalel.

³²Ta ts'acal to, ta spac yajval, co'ol s'elan sti'ben chon ta x'avan ti yipale.

³³Jtos o ti c'usitic ta xac' avile, xvul xa no'ox ta ajol ta yalilanel ti chopol c'opetic yu'une.

³⁴Ta xava'i ti xacajet ta o'lol muc' ta nab yu'une, ti quiquilot xa ta xava'i yu'un ta sni' muc' ta te' ti tsacal liquel ta barco oy ta toyole.

³⁵Xachi ta xaval une: “Quere, laj la sbalicun ta majel, mi juteb laj ca'i, laj la stsitsicun, mi jutebuc laj quil, le' une, c'alal vul ti jch'ulele, lic to cuch' yan.”