Read Tzotzil Proverbios 24 Bible Online

Proverbios 24 - Tzotzil bible

Proverbios 24

¹Mu it'ixuc xava'i ti buch'u mu'yuc xch'ulele; mi ja'uc ti lec xa xava'i ta xchi'inele,

²yu'un yac'oj sjol ti naca ilbajinvanej sna'e, ti ye'inoj ta yalel ti chopole.

³Ta sventa bijilil, tojobtasbil ta stuc'ulanel ti snae, yich'oj liquel yip yu'un ta sventa ti snopbenale.

⁴Ta sventa xac' no'ox ti jolile, ti c'usitic toyol stojol ti spajeb yutsil ta q'uelele, noj no'ox ta jujuc'ol ti nae.

⁵Cajal sc'oplal ma' ti vinic buch'u oy sbijile, ja' mu sta ti buch'u naca tsalvanej sna'e; xtun ti buch'u xvul no'ox ta sjol ti c'usi ta spase, ja' mu sta ti buch'u jelavem xa'i sbae.

⁶Chapanbil lec c'alal ta x'och yajval ti letovajele; ti tsalvanej ta xc'ote, ta sventa yepal ti jbijubtasvanejetique.

⁷Ti buch'u pimuneb xa'i sbae mu sna' c'usi ta xal c'alal va'al ta chapanobbaile, yu'un ti bijilile mu'yuc ta sjol.

⁸Ti buch'u naca no'ox ilbajinvanej sna'e, ta xpuc sc'oplal ti ja' jun vinic ti me'inem xa xa'i ta spasel ti chopole.

⁹Mulil me'inem xa'i ti buch'u pimunebe; mu ts'icbaj x'a'yie ma' ti buch'u mu xa'i sbae.

¹⁰Mi ta xalubtsaj xchi'uc ti avocole, yu'un ch'abal ti yipal avu'un unbi.

¹¹Tic'o aba ta spojel ti buch'u mu'yuc smul ti chapal xa sc'oplal ta xmilee; tic'o aba ta spojel un ti buch'u ta xchame.

¹²Xu' nan xaval ti ma'uc c'otem ta aventae, ti Buch'u sbainoj ta xchapel ti c'usitic ta xc'ot ta pasele, sna' scotol. Xojtiquin lec un ma' ti Buch'u yilojote. Ta stojbe jujun ti c'u s'elan laj spase.

¹³Cuni nich'on, tuno ta slajesel yutsil xchi'il xpechequil ti ajapome; a'yio ava'i ti jun yutsil ta j'ech'ele.

¹⁴Jech yutsil ta xc'ot ta atojol ti bijilile xchi'uc ti yojtiquinele; mi laj ataune, lec xc'ot ta atojol, mu xtub ta be ti c'usi apatoj avo'nton ta xatae.

¹⁵Mu xapas ti mu'yuc ach'ulel xava'i aba ta scontrainel ti vinic oy stuq'uile, ti utsuc xa xasoquesbe sna ti bu nacale.

¹⁶Ac'o mi ta xyal ta lum vuc-cojuc (7), ta ono'ox stam sba liquel, ja'uc ti buch'u mu'yuc xch'ulel xa'i sbae, yacal xa ta tsatsajel ti svocole.

¹⁷Ma'ucuc ti xapas xa q'uin xamuyubaj xa ti laj xa sta svocol ti baj xa ta lum ti avajcontrae.

¹⁸Mu ts'icbaj ta xa'i Dios ti ta xil taje; ti sc'ac'al yo'ntone, ta sq'uej loq'uel ta stojolal.

¹⁹Mu xcap ajol yu'un ti buch'u mu'yuc xch'ulel xa'i sbaique, mi ja'uc it'ix xava'i ti buch'u mu albajuc xchopolal ti c'usi ta spasique.

²⁰Yu'un xi s'elan ta xc'ot ta stojolic ti buch'u mu'yuc xch'ulel xa'i sbaique: ta xtub sc'oplalic jech c'u cha'al ta xtub ti lámparae.

²¹Xi'tao ti Diose xchi'uc ti ajvalile, cuni nich'on; mu xavol aba xchi'uc ti jcontrainvanejetique.

²²Mu ta sjaliluc ta sta ti svocolique; mu'yuc buch'u sna' ti tsitsel ta xac' ti Diose, ti ta xac' ti ajvalile.

²³Ti li'e, slo'il ya'yej bijil viniquetic ti laj yalic ti oy xi x'ale ti c'ope: Mu sc'otebaluc o ti ajvaliletic ti yalel toyol ti c'u s'elan ta xchapanvane.

²⁴Ti buch'u ta xal ch'abal smul ti oy ono'ox ti smule, ta sbise ta cotol chaval yu'un ti jteclumetique, xchi'uc mu x'ich'e ta muc' yu'un ti muc'tiquil lume.

²⁵Ja'uc ti buch'u ta stoj yu'un ti c'usi chopol laj spase, lec stamoj batel, xchi'uc lequil c'optabil yu'un ti jnaclejetique.

²⁶Ti buch'u jun yutsil ti c'u s'elan ta stac' sutele, co'ol s'elan ti buch'u lec xavil aba xchi'uque.

²⁷Xu' xaliques ta smeltsanel ana mi stsacoj xa lec yip ti abolomale, mi oy xa c'usi x'ayan avu'un ta avosile.

²⁸Mu xlic ajol ta sa'bel smul ti avinquileltaque, mi ja'uc xapas ti jech xa yilel ti ac'ope.

²⁹Mi ja'uc xtal ta ajol ta spaquel sutel ti ac'oplale, ti jech ta xapas liquel jech c'u cha'al laj spasbote.

³⁰Xi s'elan laj quil li'ech' ta yosil ti buch'u ch'aj ta abtele, ti li'ech' ta ts'unub uva yu'un ti mu xac' sjolilal yu'une:

³¹Laj quil ti nojem ta ch'ix ti jsep osile, ti jinem xa smocal ti meltsanbil ta latsbil tone.

³²C'alal jech laj quil taje, laj jbejan ta jol, xi s'elan laj jchan yu'un ti jech laj quile:

³³Ti xavaichinaj xa xpajpun ajol ta vayele, ti ameyoj xa ac'ob ta xacux avo'ntone,

³⁴xamala xa no'ox ava'i un ta xtal ti ame'un amu'natile jech c'u cha'al j'ech'el-be chapal xchi'uc yabtejeb tsalbil ta xac'ot yu'une.