Read Tzotzil Proverbios 27 Bible Online

Proverbios 27 - Tzotzil bible

Proverbios 27

¹Mu xacajnopilan ta alel c'usi q'uelel talel ti oc'ome, yu'un mu xana' c'usi xc'ot ta pasel ti oc'ome.

²Ich'bilucot ta muc' yu'un ti yane; yan xa sc'oplal ti ta xavalbe aba atuque.

³Ol ta j'ech'el ti tone xchi'uc ti yi'e, yepal ta xac' vocol yu'un scapemal ti buch'u pimunebe.

⁴Ti sti'emal scapemale, jsoquesvanej j'ac'-ti'ol ta j'ech'el, ja'uc ti buch'u xojol ta it'ixale, mu'yuc xpoxil.

⁵Ja' lec jamaluc o'ntonal ta tojobtasvanej; altic ti sba no'ox eal ti c'uxubinel xa yilele.

⁶Ti xbajluj yu'un ti buch'u lec xquil jbatique, jpat to co'ntontic yu'un, ja' mu sta sc'oplal ti acontra ti xasmey xa yilele.

⁷Xtaet xa ta xa'i slajesel ajapom ti buch'u noje; ti c'usi ch'ae, jun yutsil ta xa'i ta slajesel ti buch'u ta xvi'naje.

⁸Ti buch'u loc' xa batel ta nom ti bu voq'ue, co'ol s'elan jcot mut yictaoj comel ti stase.

⁹Xmuyubaj to o'ntonal yu'un ti xpaq'uet smuil ti muil poxiletique; ti lequil bijubtasel ta xal ti buch'u lec xquiltique, xcuxet to ti banomil yu'un une.

¹⁰Mu j'ech'eluc xaten o comel ti buch'u lec xavil aba xchi'uque, mi ja'uc xaten o comel ti buch'u lec xil sbaic xchi'uc ti atote. Mu xavalilan avocol ta stojol ti achi'iltac ta voq'uele. Ja' xloc' venta ti alac'na nopol oye, ja' mu sta ti achi'il ta voq'uel nom oye.

¹¹Ich'o abijil, cuni nich'on, mu'yuc c'usi jna' avu'un unbi; xtac' cu'un sutel sc'opic unbi ti buch'utic ta soquesbeicun co'ntone.

¹²Ti buch'u xa'i sbae mu stic' sba ta spasel ti bu xi'bal sbae; ti buch'u mu xa'i sbae buyuc no'ox ta stic' sba ech'el, ta sta svocol un.

¹³Ti buch'u ta sva'an sba ta piarol yu'un ti mu xojtiquine, pojbo comel ti sc'u'e, comuc ta rental.

¹⁴Ti sob xa xa'avet ta sc'oponel ti buch'u lec xavil aba xchi'uque, ilbajinel ta xa'i ti stuque.

¹⁵Ti jti'oltavanej antse, co'ol s'elan ts'ujel xbajbun no'ox ti ta yorail vo'tique.

¹⁶Jc'antic ti ac'o spajes sbae, le'e, lijc'ot jech c'u cha'al mu c'u xcutic ta spajesel ti iq'ue, mi ja' co'ol xchi'uc ti aceite ti mu c'u xut xch'am yu'un ti c'obale.

¹⁷Ti tsatsal taq'uine, ta xich' juxel ta tsatsal taq'uin, jech ec ti buch'uuc no'oxe, ta sventa yan ta xlub.

¹⁸Ti buch'u ta stuc'ulan ti icuxe, ta slo'be ti sate; ti buch'u ta sbain lec ti yajvale, ich'bil ta muc' ta xc'ot un.

¹⁹Jech c'u cha'al xvinaj ta q'uelel ti satil ta yut vo'e, ja' jech ti vinic eque oy lec ta sjol ti c'u s'elane.

²⁰Ti lajebale, ti muquinale, ti sc'upijel o'ntonale mu'yuc spajeb ta xc'anolaj.

²¹Ti oroe, ti platae, ta xich' q'uelel ta c'oc'; ti c'u s'elan oy ti buch'ue, ta lequil c'optael ta xvinaj ec.

²²Mi xajisbe jisbe ya'i ti buch'u pimunebe, me'inem xa'i.

²³Tuc'ulano ti achijtaque, tijo avo'nton yu'un ti chon bolometique,

²⁴yu'un ti c'ulejale, ti ich'el ta muq'ue, mu xjalij sbatel osil.

²⁵C'alal yaxju'an xa ta q'uelel ti jobele, ti yaxal ta xvul ta loq'uele, ta xich' tsobel un ti momol oy ta osiltique.

²⁶Ti ta avuni chijtac une, ta xpul stsatsal ta xac'u'in un; ti atentsuntac une, ta xachon yo' ta xaman avosil.

²⁷Yepal no'ox ta xac' ya'lel xchu' sme' ti atentsuntaque, ta xamalq'uin aba xchi'uc ti c'u yepal oy ta anae, xchi'uc scotol ti avajtuneltaque.