Read Tzotzil Proverbios 28 Bible Online

Proverbios 28 - Tzotzil bible

Proverbios 28

¹Manchuc mi mu'yuc nutsbil ti buch'u mu'yuc xch'ulel xa'i sbae, xbitet no'ox ta jatvil, mu'yuc buch'u ta snutsun un; ti buch'utic oy stuq'uile, co'ol s'elan jcot león jun yo'nton ta xcuxi.

²C'alal mu lecuc ta xc'ot ta pasel ta muc' ta lume, sjel ts'ac no'ox sba ta x'ech' ti ajvaliletique, ti lequil jvolvanej une sna' spajesel ti c'alal xvochvun ti lume.

³Ti ta xilbe svocol me'un mu'nat ti buch'u mu'yuc xch'ulel xa'i sbae, co'ol s'elan tsatsal chaquilo' ta soques ti ts'unubale.

⁴Ti buch'u mu xc'ot ta pasel yu'un ti oy jbel c'usi tsots albile, ta xich' ta muc' ti buch'u mu'yuc xch'ulel xa'i sbae; ti buch'u ta xc'ot ta pasel yu'un ti oy c'usi jbel tsots albile, ta x'ich'e ta contra yu'un.

⁵Ti buch'u mu'yuc xch'ulelique, mu xa'ibeic smelol ti tuq'uilale, ja'uc ti buch'u ta sc'anic sva'anuc sba ti Dios ta stojolique, scotol ta xa'ibeic smelol.

⁶Xi to smuc'ul ti mu xbac' coc jc'obtic ac'o mi me'un mu'natotique; altic mi jc'ulejotic xchi'uc ti xitic no'ox tabile.

⁷Ti buch'u ta xc'ot ta pasel yu'un ti oy c'usi jbel albil yu'un ti Diose, bijil nich'onil unbi; ti buch'utic jmoj xvolet xchi'uc ti jve'el j'uch' ometique, ta xac' ta q'uexlal ti stote.

⁸Ti buch'u ta xc'ot ta c'ulej ta sventa ti sjol staq'uine, busul ta xictabe comel ti buch'u sna' xc'uxubin ti me'unetique.

⁹Mi oy buch'u mu xc'ot ta pasel yu'un ti oy c'usi jbel tsots albil yu'un ti Diose, mu stsacbat sc'op yu'un Dios ti ta xc'opoj xti'ine.

¹⁰Ti buch'u ta xic' batel ta yan be ti buch'u oy slequilique, ta sta svocol ta spets' stuc un, oy c'usi lec ta staic ti buch'uc mu xyanij ti sjolique.

¹¹Ti buch'u jc'uleje ta xalbe sba ti oy sbijile, le' une, ta xq'uelbat yo'nton yu'un ti me'un mu'nat ti oy sbijil ec une.

¹²C'alal tsalvanem ta xc'otic ti buch'u oy slequil yo'ntone, ta xich' pasel muc' ta q'uin; c'alal tsalvanem ta xc'ot ti buch'u mu'yuc xch'ulel xa'i sbae, ta snac' sbaic ma' ti jnaclejetique.

¹³Mu lecuc ta xc'ot xchi'uc ti buch'u smucoj no'ox ti smule; ti buch'u ta sjam ti smule, ti ta xicta comele, ta xch'aybat.

¹⁴Mu'yuc c'usi sna' ta j'ech'el ti buch'u ta ono'ox xi'ta ti Diose; ti buch'u xtactun no'ox ta spas sba une, ta sta svocol.

¹⁵Ti mu'yuc xch'ulel xa'i sba ti ajvalil ta sventain jun jteclum ti mu'yuc c'usi xut spoj sbae, co'ol s'elan jun león ti naca slilin no'ox ta ti'ele, mi co'ol s'elan jech c'u cha'al jun oso ti capem ti sjole.

¹⁶Ti jbainvanej ajvalil ti mu xa'ibe xchiquinale, ta x'epaj vocol yu'un; ti buch'u mu'yuc sbic'tal yo'ntone, ta xil lec ti xch'iel sc'opojele.

¹⁷Ti buch'u laj soques yoc sc'ob ta milvaneje, muquinaluc teq'uel ech'el yoc ti xi s'elan q'uelel ta stojole: jax q'uelbiluc xa no'ox, ac'o xcuch xa'i stuc un.

¹⁸Ta xpoje ma' ti buch'u oy stuq'uile; ta sta svocol ma' ti buch'u mu albajuc chopol c'usi ta spase.

¹⁹Oy no'ox sve'el ma' ti buch'u ta sts'unubaj ta yosile; ti buch'u xvolet xchi'uc ti buch'u ch'ajique, sal me'un xal ta j'ech'el.

²⁰Ti sc'otebal o oy jpat-o'ntonal ta stojole, lequil c'optabil un; ti buch'u bic'tajem yo'nton yu'un ti c'ulejale, ta stoj ono'ox.

²¹Ti t'ujbil no'ox buch'u lec xavile, mu scotebaluc o; xu' ta jxet' no'ox uni pan xata o amul yu'un.

²²Ta jech yepal c'otuc ta jc'ulej ya'i ma' ti buch'u bic'tajem ti yo'ntone, mu sna' mi ta xvul ta stojol ti sme'inale.

²³Oy bu ta sta sc'ac'alil, ich'bil ta muc' ti buch'u ta xvulvane. ja' mu sta sc'oplal ti buch'u xlequil-c'opoj no'oxe.

²⁴Ti buch'u ta xal mu muliluc ti oy c'usi xu' ta xelc'anbe ti stot sme'e, cuxul j'ac'-ti'ol ma' le' une.

²⁵Ti buch'u bic'tajem no'ox yo'ntone, ta sliques leto ta j'ech'el; ti buch'u ta spat yo'nton ta stojol ti Diose, ta scajtsaj batel.

²⁶Ti buch'u ta yip no'ox stuc ti spatoj yo'ntone, pimuneb xa'i sba; ti buch'u oy sbijile, ti ma'uc ta yip stuc ti c'usi ta spase, ta xc'ot ta loq'uel lec xchi'uc.

²⁷Oy no'ox c'usi x'ayan yu'un ma' ti buch'u ta scolta ti me'un mu'nate; ti buch'u ta sjalta sba ta xcoltavane, yepal ta xchopol-c'opojic ta stojol.

²⁸C'alal stamoj sbaic ti buch'u mu'yuc xch'ulel xa'i sbaique, ta snac' sba ti jnaclejetic yu'une; c'alal ta xtub sc'oplalique, ta stam sbaic liquel ec ti buch'u oy stuq'uilique.