Read Tzotzil Proverbios 30 Bible Online

Proverbios 30 - Tzotzil bible

Proverbios 30

¹Xi laj yal ec ti Agur xnich'on ti Jaquee, ti nacal ta jteclum Masae. Ti Agure une xi xcholet laj yalbe ya'i ti Itiele xchi'uc ti Ucale:

²Jtuc xa no'ox ma' ti jun jpimil lich'i ta banomile, ti mu xca'ibe ti xchiquinal ta j'ech'ele.

³Mu'yuc ma' ti jbijil une, mu cha'beluc jna' c'u s'elan oy ta sjol ta yo'nton ti Ch'ul Diose.

⁴¿Mi yu'un la oy buch'u muy batel ta vinajel, ts'acal to yal talel? ¿Mi yu'un la oy buch'u ta sc'ob no'ox xu' ta spajes ti iq'ue? ¿Mi yu'un la oy buch'u ta smochib c'u' no'ox xu' ta svol ti nabe? ¿Buch'u laj yac' bu c'alal ta xpaj talel spajeb ti banomile? Mu xalo'laun ma' ti xana'be sbie, ti xana'be sbi ec ti xnich'one.

⁵Ti Diose ta spoj ti buch'u spatoj yo'nton ta stojole; scotol ti c'usi yaloj une, stac' jpat co'ntontic yu'un.

⁶Mu xavepajes ta yalel ti c'u yepal yaloje, le'e, xu' xasvulilan, ta xacom ta jutc'op yu'un.

⁷Cha'tos ma' ti ayanem ta co'nton ta jc'anbote, Ch'ul Dios; c'uxubajan ti xiuc c'otuc ta jtojol ti mu to ta xichame:

⁸Tenbun jipbun loq'uel ta jtojol ti mu'yuc jmelol jtuq'uile, xchi'uc ti jutc'ope, mu yepaluc xavac'bun ti c'ulejale, mi ja'uc aq'ueloj ti jme'unale, ac'bun ti jve'el cuch'om ti tsots sc'oplal ta xtune.

⁹Yu'un mi yepal no'ox jtaoje, mu nan xacac'ot ta venta un, ta xlic cal ti mu xacojtiquinot une. Mi ch'abal une, xu' xi'och ta elec' liquel un, ta xlic chopol c'opojcun ta ach'ul tojol un.

¹⁰Mu chopoluc xac'opoj ta sba ta sat yajval ti mosovile, xu' nan ta sbisot ta cotol chaval unbi, ta xata avocol xchi'uc.

¹¹Oy buch'utic ta sbis ta cotol chaval ti stote, mi ja'uc ta slequil-c'optaic ti sme'e.

¹²Oy buch'utic mu sna' c'usi chopol ta spasic ti yalojique, mu'yuc yac'oj sbaic ta mesel tusel un.

¹³Oy buch'u cajal c'otem ta xa'i sbaic, xtoyet xa'i sba ta sq'uelel yan ti mu'yuc stue.

¹⁴Oy buch'utic ti co'ol s'elan espada, co'ol s'elan cuchilu, ta x'abtej ye sti'ic ta yilbel svocol ta stsutsesel ta j'ech'el ti me'un mu'natetic ti oy ta jteclume.

¹⁵Ti cha'cot yol ti jts'uts'-ch'ich'e xc'anlajetic no'ox ta j'ech'el. Xi s'elan ti oy oxtos mi chantos ti mu'yuc spajeb xc'anc'un ta xa'ie:

¹⁶ti muquinale, ti machero antse, ti mu'yuc spajeb ta stunes vo' ti taquin banomile, ti c'oc' mu'yuc spajeb ta xve'baje.

¹⁷Ti buch'u sc'a'epal sat ta xil ti stote, ti ta sbis ta jeche' mu yayil ti sme'e, xtun o ma' taj une ti ts'uts'batuc ya'i sbec' sat yu'un ti ic'al mute, lilineuc ta ti'el ya'i yu'un ti tararane.

¹⁸Xi s'elan oy oxtos mi chantos ti ch'ayal ta xic'ot yu'un ti mu xca'ibe ti smelole:

¹⁹c'usi xut ti xvilet ta vinajel ti xique, c'usi xut xquilet ta lican ch'entic ti chone, c'usi xut ta ba vo' no'ox ta xanav ti barcoe, c'usi xut ti ic'bil xch'ulel yu'un ants ti vinique.

²⁰Ti jlo'laej vinic antse xi ta xlic spase: ta xve', cus xa ye liquel un, ta sva'an sba ta j'ech'el ti mu'yuc c'usi chopol spasoje.

²¹Oy chantos ti xi s'elan stalel ti jnaclejetique, ti mu ts'icbaj ti c'usi ta spas ti ta xac'be xi'el ti muc' ta lume:

²²ti jun mosovile ta xc'ot ta ajvalil, ti buch'u xvanet no'oxe, oy no'ox sve'el,

²³ta xmalij ti ants jipbil tenbil xae, ti me' ajvalile ta xa x'och ta xq'uexol ti me' mosovile.

²⁴Oy chantos biq'uit chonetic ta banomil ti xi s'elan x'ech' to xtojobic ti ja' mu sta ti buch'utic oy sbijilique:

²⁵ti q'uise, mu'yuc yipal yu'unic un, ja'uc le'e, mu no'ox albajuc yepal svoloj sbaic ta yorail q'uepelaltic ta xepal-tsob ti sve'elique;

²⁶ti cotometique sna'inojic ti lican ch'entic ti xi no'ox yepal xvoletique;

²⁷ti c'ulubetique, mu'yuc ajvalil yu'unic, ja'uc le'e, jmoj xvolet ta xvilic;

²⁸ti ocotsetic ti jmich'el no'ox ta c'obale, ma'uc to ta sjac' ti c'usi s'elan ta x'och batel ta sna ti ajvalile.

²⁹Oy chanchop ti oy yipal yu'unique, ti xi s'elan c'upil sba ta xanave:

³⁰ti leone, chon bolom ti xi'bal sbae, mu jtosuc ti ta xi' yu'une;

³¹ti cots toyobba xa'i sbae, ti tot tentsune, ti ajvalil jba'be ta stojol ti yajsoldadotaque.

³²Mi ta bolatil xa no'ox xu' avu'un ti avaloje, ti acaj-nopoj xa ta spasel ti mu albajuc xchopolale, nopo xa no'ox ava'i unbi.

³³Mi ta xajuy ti pits'bil chu' vacaxe, ta xlic meltsajuc avu'un ti quexue; mi tsots ta xamaj abae, ta xloc' ch'ich' ta ani'; mi xavojet xa ta sa'bel sjol ti yane, ta leto xc'ot ta tsutsel unbi.